Rubavu: Mu cyumweru kimwe umunyonzi wa gatatu yagonzwe yitendetse ku modoka arapfa

3 12-02-2018 - saa 20:19, Mukwaya olivier

Umunyonzi witwa Mugabo w’imyaka 24 y’amavuko wari utuye mu Murenge wa Cyanzarwe yagonzwe n’ikamyo ubwo yari afashe ku modoka ya Sosiyete itwara abagenzi ya Trinity yerekezaga i Musanze.

Iyi mpanuka yabereye mu Kagari ka Gikombe, Umurenge wa Nyakiriba ahagana saa kumi n’imwe n’igice ubwo yari yitendetse ku modoka yarekura akagwa mu ikamyo yari iturutse inyuma.

Akimara kugongwa yahise yitaba Imana, umurambo we ukaba wajyanywe ku Bitaro bya Gisenyi.

Umunyamabanga Nshingwabikorwa w’Umurenge wa Nyakiriba, Hagenimana Epimaque, yemeje aya makuru agira inama abanyonzi kwirinda kwitendeka ku modoka.

Yagize ati "Impanuka yahitanye umunyegare wa gatatu mu cyumweru kimwe kubera kwitendeka ku modoka; ndagira inama abatwara amagare kwirinda kwitendeka ku modoka kuko binyuranyije n’amategeka. Birababaje kubona tumaze kubura abantu batatu mu cyumweru kimwe muri aya makorosi, ni igihombo gikomeye."

Mu bice bitandukanye cyane cyane ahantu haterera usanga abanyonzi bitendetse ku makamyo yikoreye imizigo bicaye ku magare yabo.

Mu mpera z’umwaka wa 2017, Ishami rya Polisi rishinzwe umutekano wo mu muhanda, ryatangaje ko abanyonzi baza ku mwanya wa gatatu mu guteza impanuka zo mu muhanda nyuma y’abanyamaguru n’abamotari.

Umunyonzi ufashwe yitendetse ku igare cyangwa yishe amategeko yo mu muhanda acibwa amafaranga agera ku bihumbi icumi by’amanyarwanda.

Kubera igihe ibihano ku bica amategeko yo mu muhanda byashyiriweho, Polisi yavuze ko bidakanganye nko ku banyonzi cyangwa abandi bishe amategeko y’umuhanda ariko ngo bari gusaba ko itegeko rivugururwa ibihano bigakazwa.

Umunyonzi yagonzwe ubwo yarekuraga imodoka yari yitendetseho akagwa mu muhanda
Kwamamaza
Kwamamaza

Izindi nkuru wasoma

Kwamamaza

TANGA IGITEKEREZO

AMATEGEKO AGENGA IYANDIKA RY'IGITEKEREZO CYAWE

1
uwimanimpaye jean bosco 2018-02-13 03:48:20

imana imwakire mubayo ariko niwe wabiteye ameze nkuwiyahuye

2
Frank 2018-02-13 00:34:42

None se ko buri munsi babwirwa bakavunira ibiti mu matwi,ubwo ntiyarazi ibyabaye kuri bagenzi be? Abasigaye ubwo nibo babwirwa,ariko ku myaka ingana ityo umuntu ntiyakabaye azira kutumva ibyo abwirwa

3
Bimawuwa 2018-02-12 14:45:34

ko muvuga ko ikamomyo ya mugonze yaguye kandi nkaba mbona ikamyo yarangiritse hejuru byagenze gute.ko ubonye aho iyo kamyo yangiritse urabona ko bitatewe no kugonga uwo munyonzi gusa.

Kwamamaza