Ubuyobozi bw’Akarere ka Rubavu buvuga mu rwego rwo kunoza serivisi kuri bose abayobozi b’inzego zibanze bagiye guhabwa amahugurwa ku mikoresherezwe y’ururimi rw’amarenga ku bufatanye n’ihuriro nyarwanda ry’abafite ubumuga bwo kutavuga no kumva(RNUD),ibi bikazakorwa mu rwego rwo kuvana mu bwigunge abatabasha kumva no kuvuga.

Nkuko byagaragajwe na bamwe mu bayobozi b’inzego z’ibanze birabagora cyane kuvugana n’abafite ubumuga bwo kutavuga no kutumva bigatuma serivisi bifuza batazihabwa nkuko bikwiye cyangwa bagatinya kugana ubuyobozi kubera ko batavugana ugasanga basigaye inyuma muri gahunda za leta.

Umunyamabanga Nshingwabikorwa w’akagari k’amahoro mu Murenge wa Gisenyi, Gikundiro avuga ko bigora guha serivisi umuntu utavuga ntiyumve keretse iyo azi kwandika.

Yagize ati “Ndabafite mu kagari kanjye ariko birangora cyane kubera kutabasha kuvugana na bo uretse iyo azi kwandika naho ubundi ni ugukoresha amarenga kandi na yo ntituba tubyumva ariko nitwiga gukoresha amarenga tuzajya tuvugana nabo neza.’’

Uvugamake Osee uyobora akagari ka Nyundo mu murenge wa Nyundo avuga ko bigorana kurenganura uwahohotewe kubera kutabasha kumvikana na we ntumenye ibyo ashaka kuvuga.

Yagize ati”Biratugora cyane cyane iyo akugannye yahohotewe ntiwabasha kumenya uko byagenze kandi aba agomba kurenganurwa nk’umunyarwanda wese; nitumara kumenya amarenga akazi kacu kazagenda neza’’

Munyanziza Wellars ufite ubumuga bwo kutumva no kuvuga yagaragaje ko gahunda za leta batazimenya kubera kutavugana n’abayobozi.

Ati “Ntitumenya amakuru agezweho na gahunda za leta iyo tubonye abantu benshi bagiye turabakurikira kuko nta muyobozi ubasha kuvugana natwe kandi dukeneye kujyana n’abandi mu iterambere.’’

Ushinzwe urubyiruko mu Rugaga nyarwanda rw’abafite ubumuga bwo kutumva no kutavuga, Jean Damascene Bizimana yavuze ko bagiye gutangirana n’abayobozi bo mu tugari n’imirenge.

Ati ’’Guhera mu kwezi kwa cyenda turatangirana n’inzego z’utugari n’imirenge kugira ngo babashe kujya bavugana n’abafite ubumuga bwo kutavuga no kumva bityo babahe serivisi nziza. Hazabanza ba gitifu b’utugari n’imirenge ndetse n’abashinzwe imibereho myiza n’abandi bahura na bo muri serivisi zabo ku rwego rw’akarere.’’

Urugaga nyarwanda rw’abafite ubumuga bwo kutavuga no kutumva rwashoreje mu Karere ka Rubavu, amahugurwa rwahaga abakozi bo mu nzego za Leta bakoreramo umushinga wo kwigisha uburengazira bw’abafite ubumuga bwo kutavuga no kumva aritwo Huye, Nyagatare na Rubavu.

Akarere ka Rubavu gafite abafite ubumuga basaga 2900 ariko hakaba nta mibare y’abafite ubumuga bwo kutavuga no kumva yari yashyirwa ahagaragara.

Kagaba Jeannette ukuriye Inama Nkuru y'abafite ubumuga mu Karere ka Rubavu
Umunyamabanga Nshingwabikorwa w'Akarere ka Rubavu, Nsabimana Sylvain


Kwamamaza

ANDIKA ICYO UTEKEREZA KURI IYI NKURU

Izina

Email


IBITEKEREZO

ANDI MAKURU

2009 - 2017 ©. All rights reserved