Radiyo yatambukiyeho ubutumwa busebya abagore na Kiliziya yasabiwe guhagarikwa by’agateganyo

33 12-02-2018 - saa 17:47, Jean Pierre Tuyisenge

Urwego rw’abanyamakuru bigenzura (RMC) rwasabye Urwego Ngenzuramikorere (RURA) guhagarika by’agateganyo Amazing Grace Christian Radio amezi atatu izira kuba yarahaye urubuga umuvugabutumwa witwa Niyibikora Nicolas akigisha yibasira abagore na Kiliziya Gatolika.

Ni icyemezo cyafashwe kuri uyu wa Mbere nyuma y’ikirego Impuzamiryango iharanira uburenganzira bw’abagore, Pro-Femme Twese Hamwe yagejeje kuri RMC.

Hashingiwe ku ngingo ya 30 n’iya 31 mu mategeko ngengamyitwarire agenga umuwuga w’itangazamakuru, RMC yategetse Niyibikora gusaba imbabazi Abanyarwanda bose n’abagore by’umwihariko mu gihe kitarenze amasaha 48.

RMC kandi yasabye ko RURA yaba ihagaritse Amazing Grace Christian Radio by’agateganyo mu gihe cy’amezi atatu ndetse nayo ikandika ibaruwa isaba imbabazi Abanyarwanda mu gihe kitarenze amasaha 48.

Impamvu ihagaritswe ni uko ngo itagira Umuyobozi w’ibiganiro ubasha kumva ibivugirwa kuri iyo radiyo mu ndimi zikoreshwaho, ikaba inavugwaho imikorere itanoze.

Ku wa 29 Mutarama 2018, nibwo Niyibikora yumvikanye kuri Radio Amazing Grace yigishaga avuga ko nta cyiza cy’umugore.

Yagize ati “Ikibazo abagore bafite uyu munsi ni uko babaye indaya, reka rero nze mbabwire umugore uko agaragara imbere y’Imana. Icya mbere afitanye ikibazo n’Imana […] Isi ya mbere ijya kurimbuka abagore babigizemo uruhare. Icyiza cy’umugore ni iki? Wakivana he? Aburahamu ananirwa guhamya Imana mu Misiri, uwamugiriye inama yo kwicecekera si umugore? Wicare uzi ngo Imana ifitanye ikibazo n’umugore ndetse n’amatorero.”

Yakomeje agira ati “Aburahamu ajya kwisohoreza amasezerano uwamugiriye inama ngo anyuranye na gahunda y’Uwiteka si umugore? Umugore mwebwe muramwitiranya. Umugore ni mubi noneho mbivuge. Umugore ni mubi adindiza gahunda z’Uwiteka […] wagiye wumva neza ububi bw’umugore.”

Ubutumwa bwe bwanumvikanishije ko Itorero rifashe ukuri rikavanga n’ibinyoma ryitwa maraya, rikajya ku murongo wa Kiliziya Gatolika.

Inzego z’abagore ni zo zahise zihagurukira kwamagana uwo muvugabutumwa ndetse Pro-Femmes Twese Hamwe inarega radiyo yigishirijeho.

Ubwo yasobanuraga impamvu batanze icyo kirego muri RMC, Umuyobozi wa Pro-Femmes Twese Hamwe, Kanakuze Jeanne D’Arc, yavuze ko bafashe icyemezo cyo kugeza radiyo kuri RMC kuko ngo abayobozi bayo bemeye ko hanyuzwaho ibiganiro bitesha agaciro umugore w’Umunyarwandakazi.

Yagize ati “ Ku wa 29 Mutarama kuri Radio Amazing Grace hanyuze ikiganiro cyaje ari inshamugongo, ari rutwitsi, iyo ugiteze amatwi ukagisesengura, ibigikubiyemo ni ibintu bipfobya umugore. Bikibutsa ibintu bikomeye byabaye muri iki gihugu mu gihe cya Jenoside yakorewe Abatutsi igihe itangazamakuru ryabaga ryibasiye igice cy’abantu.”

Umuyobozi wa Radio Amazing Grace, Gregg Schoof, wabanje kuvuga ko atazi neza ibyavugiwe kuri radiyo ye kuko ngo byavuzwe mu Kinyarwanda kandi atacyumva, yavuze ko akeneye igihe kirambuye cyo kubisoma kugira ngo abisobanukirwe kuko bamaze kubimushyirira mu Cyongereza.

Gusa yavuze ko muri bike yari amaze gusoma yasanze Umuvugabutumwa yaravuze ibintu bibi ndetse yongeraho ko yitandukanyije nawe.

Yagize ati “ Nasomye hafi nka kimwe cya kabiri cyabyo bari bamaze kunshyirira mu Cyongereza, gusa nanjye sinshigikiye umuntu utesha agaciro abagore, mpamya ko umukirisito nyakuri adashobora kuvuga nabi abagore ahubwo arabarinda.”

Nyuma y’imyanzuro yafashwe, Kanakuze wo muri Pro-Femmes Twese Hamwe yavuze ko banyuzwe n’imyanzuro yafatiwe Umuvugabutumwa Nicolas na radiyo yamuhaye urubuga rwo kuvugiraho ibibangamira umugore.

Ati “ Ikidushimishije kurushaho ni uko imbabazi azisaba Abanyarwanda ndetse na radiyo yamuhaye umwanya igasabirwa guhagarikwa amezi atatu, twebwe turabona bitunyuze , biratuma iriya radiyo yumva ko ibintu bitoroshye, Abanyarwanda batakwemera umuntu wese ubiba inzangano, upfobya ndetse n’ugira ivangura iryo ari ryo ryose.”

Umuvugabutumwa Nicolas ntiyagaragaye muri uru rubanza rwo muri RMC, ngo yahamagaye kuri telefoni ye ntiyaboneka.

Komiseri muri RMC, Edmond Kagire niwe wari uyoboye iburanisha
Rev. Past. Uwimana Jean Pierre, Komiseri muri RMC uri mu bafatiye imyanzuro Radio Amazing Grace
Umuyobozi wa Radio Amazing Grace, Gregg Schoof yavuze ko agikeneye igihe kugira ngo arangize gusoma ibikubiye mu by'Umuvugabutumwa Nicolas yavugiye kuri radiyo ye kuko ngo yabivuze mu Kinyarwanda atumva, yakorewe ubusemuzi
Umuyobozi wa Pro-Femmes Twese Hamwe, Jeanne D’Arc Kanakuze
Umuyobozi wa Radio Amazing Grace, Gregg Schoof akurikiye iburanisha muri RMC
Umuyobozi wa Transparency International Rwanda, Ingabire Marie Imaculee yamaganye amagambo y'Umuvugabutumwa Niyibikora, anemeza ko byamwibukije ibihe bya RTLM
Kwamamaza
Kwamamaza

Izindi nkuru wasoma

Kwamamaza

TANGA IGITEKEREZO

AMATEGEKO AGENGA IYANDIKA RY'IGITEKEREZO CYAWE

Paji: 1 | 2 | 3 | 4  

1
Rev. Nathan 2018-02-13 12:14:31

Kuvuga ko ibyo Pasteur Nicolas yanditse Biri muri Bibiliya tugomba kwitondera iyo myumvire kuko Bibiliya idasobanurwa uko buri wese yishakiye. BIBILIYA iravuga iti: "Ariko mubanze kumenya yuko ari nta buhanuzi bwo mu byanditswe bubasha gusobanurwa uko umuntu wese yishakiye..." (1 Peter 1:20). "I cyakora zirimo bimwe biruhije gusobanura, ibyo abaswa bahindagurika bagoreka, nk’uko bigira ibyanditswe bindi bakizanira kurimbuka" (2Petero 3:16).
Bibiliya ifite ireme mu byo ivuga byose. Icyo yamagana ni ukuyisobanura uko umuntu yishakiye (interpretation particuliere). Niyo twigisha Bibiliya dushingiye kuri Hermeneutique (how to interpret the Bible). Usobanuye nabi arabibazwa Bibiliya ikagumana ubusugire bwayo.

2
nyikundiyukuri marcel 2018-02-13 10:38:38

jye ndumva uwakoze ikosa live rimureba akaba yari hanirwa ariko ntakosa mbona rifungisha radio
uwomuvugabutumwa wasanganawe afite ingingo imurengera.

arikorwose radio yafungurwa keretse niba ibiganiro byose itambutsa ntacyubaka.

ntamuntu muri ikikinyejana ukwiye kuzira ikosa ry’undi.cyane ko uwavuze azwi.

3
Aly vera 2018-02-13 09:21:25

Harya iriya radio si iy’abadventiste b’umunsi wa karindwi? Nta gitangaje kirimo niba ari bo kuko ntibanakurikirana ibyo hirya no hino bigisha mu biterane bita iby’ububyutse!!!!! Bakangurira abantu amacakubiri ashingiye ku madini, basakuriza abantu saa kumi z’ijoro aho bafite ibiterane, ... Ni birebire SI nzi uko idini ryazikosora rikagenzura abayoboke babo kuko bigisha ibyo bishakiye bavuga ko bishingiye kuri bibiriya kandi ukabona bisenya....

4
RKUS 2018-02-13 07:47:52

Amagambo yabaye menshi ariko jye mbona icyo twakwibaza ari kimwe gusa : Ese umugore ni mubi nkuko uriya mugabo amuvuga ? Umugore utubyara , umugore utubyarira, umugore tubyara. Abaye mubi ni ukuvuga na nyoko ukubyara ni mubi ,na buriya bukobwa ubyara ni bubi kuko niyo nzira burimo nabwo buzaba abagore.
Uyu mu Pasteri ni umuswa gusa, nasabe imbabazi ,usibye ko burya abaswa gusaba imbabazi birabagora sinzi ko ari bubishobore. Ariko nagaragaze ko ibyo tumukekaho ataribyo . ubundi nta gihano cy’umuswa ahubwo arigishwa.
Iriya Radiyo , amezi 3 ni menshi. Niba bemera ko ibyavuzwe atari byiza bakaba babisabira imbabazi se kandi bazihawe, bagahabwa amahirwe wenda bakazahanwa bikomeye baramutse bongeye ? Iyi ni business , buriya hari ingaruka nyinshi zibaho mugihe hafashwe icyemezo nka kiriya. Radiyo ifite abakozi , ifite n’abayumvaga, aba bose ntibakagombye kuba victims z’umuntu umwe uvuga amagambo nk’ayabasazi.

5
Hoho 2018-02-13 06:53:18

Uhhmmm!!!!!!!!!!!!!!!!!!!!
Mbese iyo uwo mugabo avuga nk ibi(umubwiriza 7:26,28 byari gucura iki? Ntabwo nibwirako ari ubugome bwo kuvuga nabi ba Mama uretse ko yanasobanuye ko ashaka kuvuga amatorero/amadi ibyo yise ko ari ubwiru. Bikwiye gukorerwa ubugororangingo ntihabeho guca iteka cg ngo byitiranwe n ibitari byo. Niko mbyumva

6
shalom 2018-02-13 05:16:11

Bibiliya niyo ifite amakosa kuko ni gake ivuga ineza ku magore. ahubwo bayikosore. kandi Eglise catholique nta kirego yatanze,mwiyivugira.ibyo ntacyo biyibwiye. ahubwo murebe kuri ba nyinawumuntu.

7
Esquadro 2018-02-13 04:20:28

Ndibaza ko Pasiteri Nicolas ubwo abagore bari kumugambanira, NTA GITANGAZA azabibonamo, abyongere kumasomo abafiteho.

8
Anan 2018-02-13 03:39:13

Lol! Iki cyemezo cyafatannywe amarangamutima niyo mpamvu ari ukwibeshya bikomeye. Amakosa ya pastor ahurirahe n’itangazamakuru? Ese igihugu cyuzuye ubushomeri hahagarikwa ibikorwa bitanga akazi muri ubu buryo? Pastor najyanwe munkiko ubundi radio bayireke. Gusa nihakurikizwa amategeko neza nawe biragoye kubona icyaha kimuhama mumategeko yo murwanda!

9
joan 2018-02-13 02:29:32

kiki wowe se uri umunyamahanga mama we, ngo Mu Rwanda ibintu byose ni uguhubuka niba udashimishijwe nokuba umunyarwanda ndetse nabandi bameze nkamwe mujye gushaka ubundi bwene gihugu ariko nihahandi hanyu aho muzajya hose muzitwa Abanyarwanda jyewe rero ndi mwebwe naguma hamwe hummm ngo abanyarwanda sha urashekeje kabisa kimwe nabandi mutekereza kimwe , noneho bamureke akore ibyo ashaka hummmm murasetsa koko ariko ngirango iyo bavuze umugore cyagwa abagore ntago wibuka ko na mama wawe arimo na mushiki wawe ngirango ugirango nabahandi bavuga , ubu bajye bareka abantu bavuge , bakore ibyo bashaka ibyo ni ukwica igihugu niho abantu bamwe bahera bigira ibyihebe , ahubwo umuco wo kudahana ucike burundu abantu bareke kwigira uko bashaka ngo babihorere twazisanga dufite Igihugu kimeze nkabimwe tujya tubona Abantu bamwe baba barigize intagondwa rero ahubwo nabandi barebere kuruwo ibintu bibi bibarimo babimire bunguri nibabaniga babimirishe amazi bigume muribo , bige gukora nokuvuga ibifite akamaro

10
Maniriho 2018-02-13 01:59:42

Abavuga ngo yigishije ibiri muri Bibiriya nabo baribeshya bakanabeshya abantu. Umugore runaka niba yarakoze ikosa yarikoze ku giti cye, ntirigomba kwitirirwa abagore bose. Ufashe ikiciro cy’abantu cyose ntiwaburamo abagiye bakora ibibi, ariko siko tugomba kubyitirira abagize icyo kiciro bose. Mu bakoze bibi harimo abagore harimo n’abagabo; hari Abayisiraheri hari n’abanyamahanga. Ubukangurambaga bwo kwibasira igice cy’abantu burabujijwe kuko ni ivangura. Bibiriya ni inyanja buri wese ashobora kuyikoresha mu nyungu ze bwite. Ntimwibuka se ko muri jenoside yakorewe Abatutsi abanyamatorero bayishingiragaho bigisha abayoboke babo ko bagomba kwica Abatutsi. Ntibabikoze se? Uwumva mu Rwanda abigisha urwango bakwiye kongera guhabwa urubuga ni nde? Ashingira kuki?

Paji: 1 | 2 | 3 | 4  

Kwamamaza