Susan Pollack warokotse Jenoside Adolf Hitler n’ingabo ze bakoreye Abayahudi, yashimye ingamba zafashwe na Guverinoma y’u Rwanda zo kubaka inzibutso zitandukanye zigaragaza amateka ya Jenoside yakorewe Abatutsi.

Uyu mukecuru w’imyaka 86 avuga ko inzibutso za Jenoside ari ikimenyetso cyo kwihanangiriza undi wese ushobora kuzagira ingengabitekerezo ya Jenoside yaba ubu no mu gihe kizaza.

Mu kiganiro yatangiye ku rwibutso rwa Jenoside yakorewe Abatutsi ruri ku Gisozi ku mugoroba wo kuri uyu wa Gatanu, tariki ya 11 Kanama 2017, Pollack yavuze ko nta yindi jenoside ishoboka mu Rwanda kubera ingamba zafashwe.

Yagize ati “Hano ni byiza, mufite inzibutso za Jenoside nyinshi, nta watinyuka kuzana iby’urwango, ziriya nzibutso ni gasopo kuri buri wese washaka kwishingikiriza urwango, ntaho yabihera.”

Avuga uburyo yarokotse n’uko abo mu muryango we bishwe, Pollack yavuze ko habanje kwigishwa urwango, abantu bose banga Abayahudi ndetse byigishwa no mu nsengero.

Yagize ati “Kiliziya yari ibiri inyuma. Biba mu Budage, yavuze ko Abayahudi aribo bishe Yezu Kirisitu, ariko se ubwo ninjye wamwishe, ni umuryango wanjye se? Jenoside y’Abayahudi yari ishyigikiwe na Leta ndetse na Kiliziya…hari n’itangazo ryatanzwe na Papa ngo Abayahudi nibo bashinjwa kwica Yezu”.

IKibazo cyose cyabaga i Burayi, Pollack avuga ko cyahitaga gitwererwa Abayahudi.

Uyu mukecuru yabyirukiye mu gace kari kiganjemo abantu banga urunuka Abayahudi muri Hongiriya. Mu 1938, umwe muri abo bantu bari baturanye yishe nyirarume, akatirwa gufungwa imyaka ibiri ariko nayo ntiyayimazemo yarekuwe idashize agaruka gutura hafi ya ba Susan.

Mu ntambara ya Kabiri y’isi ubwo u Budage bwa Hitler bwateraga Hongiriya muri Werurwe 1944, Abayahudi bose bategetswe kujya bagenda bambaye akarango k’inyenyeri y’umuhondo kugira ngo babashe kubamenya.

Nyuma gato Abayahudi bose b’abagabo bari baturanye na Susan bandikiwe ibaruwa ibamenyesha ko bafite inama izigirwamo ibifitiye akamaro imiryango yabo.

Susan wari ufite imyaka 14 aheruka Papa we ajya mu nama kugeza n’ubu ntazi aho ibye byarangiriye. Susan avuga ko icyo gihe papa we n’abandi bagabo bakigera aho inama yagombaga kubera, haje amakamyo babapakiramo bajyanwa mu nkambi Abayahudi bicirwagamo. Yagize ati “Nzi aho bamujyanye ariko sinzi niba ariho yaguye.”

Muri Gicurasi 1944, hatanzwe itegeko ko Abayahudi bose babaga muri Hongiriya bahavanwa, Susan n’umuryango bisanga mu nkambi y’akababaro ya Auschwitz –Birkenau muri Pologne.

Iyi nkambi yajyanywemo Abayahudi basaga miliyoni 1.3, muri bo abasaga gato miliyoni barahiciwe aho bicishwaga umuti wica udusimba uzwi nka Zyklon B, ikiboko, kwicishwa inzara, kwanduzwa indwara, kwica umwe umwe n’ubundi buryo.

Bakigezwa mu nkambi, Susan na mama we baratandukanyijwe kuko abakobwa n’abasore bajyanwaga gukora imirimo y’agahato, abana n’abakecuru bakajya kwicwa.

Yagize ati “Hari umuntu wambwiye ngo mbeshye ko mfite imyaka 15, ndabivuga kuko nari mfite n’igihagararo banjyana n’abandi bakobwa. Mama yashyizwe mu rindi tsinda ry’abakecuru n’abana ajya kwicishwa gaz.”

Nyuma yo kujyanwa mu mirimo y’agahato mu Budage, tariki 15 Mata 1945 we n’abandi bacakara b’Abayahudi babohowe n’ingabo z’Abongereza, ajyanwa mu bitaro kubanza kuvurwa, nyuma yoherezwa muri Suède.

Uretse musaza we Laci, nta wundi muntu wo mu muryango wa Pollack warokotse, abasaga 50 bose barahaguye.

Susan ufite abuzukuru batandatu, avuga ko leta ziyoboye isi zikwiye kuba maso, zikagenzura ibyitwa kwishyira ukizana mu kuvuga kuko ngo nabyo bishobora gufasha mu ikwirakwizwa ry’ingengabitekerezo ya Jenoside.

Jenoside yakorewe Abayahudi yahitanye abasaga miliyoni esheshatu.

Susan Pollack warokotse Jenoside yakorewe Abayahudi yashimye ingamba zafashwe n’u Rwanda zo kubaka inzibutso zigaragaza amateka ya Jenoside yakorewe Abatutsi
Iki kiganiro cyitabiriwe n'abantu batandukanye
Pollack yatanze ikiganiro gisobanura uko Jenoside y'Abayahudi yateguwe ikanashyirwa mu bikorwa


Kwamamaza

ANDIKA ICYO UTEKEREZA KURI IYI NKURU

Izina

Email


IBITEKEREZO

ANDI MAKURU

2009 - 2017 ©. All rights reserved