Perezida wa Sena yavuze icyitezwe mu ruzinduko rwa Minisitiri w’Intebe w’u Buhinde mu Rwanda

0 11-07-2018 - saa 21:07, Mathias Hitimana

Perezida wa Sena, Bernard Makuza, yavuze ko uruzinduko rwa Minisitiri w’Intebe w’u Buhinde, Narendra Modi utegerejwe mu Rwanda muri uku kwezi, ari inyungu ikomeye ku mubano w’ibihugu byombi, rukazaba ari n’urwa mbere Minisitiri w’Intebe w’icyo gihugu agiriye mu Rwanda.

Mbere y’uru rugendo, Perezida wa Sena, Bernard Makuza yagiriye uruzinduko mu Buhinde, yakirwa na Visi Perezida wa bwo Venkaiah Naidu, kuri uyu wa Kabiri tariki 10 Nyakanga 2018.

Nk’uko ikinyamakuru The Times of India cyabitangaje, Makuza yakomoje ku cyo u Rwanda rwiteze ku ruzinduko rwa Narendra Modi, avuga ko ruzakomeza umubano usanzwe hagati y’ibihugu byombi.

Yagize ati “Ndamuzi, ubwo yari muri Gujarat [imwe muri leta zigize u Buhinde] ni umuntu ugira ubushake bwo gutanga …Birashoboka cyane ko amasezerano amwe azasinyirwa muri urwo ruzinduko kandi bizakomeza umubano w’ibihugu byombi.”

Yakomeje agira ati “U Rwanda rurashaka iterambere y’ubufatanye n’u Buhinde mu nzego zitandukanye zirimo ubuhinzi bwifashisha ikoranabuhanga, kuhira imyaka, ingufu, ishoramari, ibyanya by’inganda, uburezi n’ubuzima. Guverinoma yacu yashyizeho ingamba zorohereza abikorera gushora imari.”

Mu 2011 u Buhinde bwagurije u Rwanda miliyoni 80 z’amadolari zo kubaka urugomero rwa Nyabarongo I, rutanga megawatt 27 z’amashanyarazi; mu 2013 butanga inguzanyo ya miliyoni 120 $ mu mushinga wo kuhira mu Karere ka Kirehe; mu 2016 buguriza u Rwanda miliyoni 81 z’amadolari zo kubaka amashuri y’imyuga n’ibigo bihugura urubyiruko ku kwihangira imirimo.

Muri Gicurasi uyu mwaka ibihugu byombi byasinyanye amasezerano y’inguzanyo ya miliyoni 66.6 z’amadolari, ni ukuvuga miliyari zigera kuri 56 Frw, yo kubaka umuhanda Base-Butaro-Kidaho mu Ntara y’Amajyaruguru.

Makuza yanavuze ko u Rwanda rushyize imbere gukora n’umuryango mpuzamahanga kugira ngo rutange umusanzu ufatika mu karere no ku Isi mu kurinda amahoro n’umutekano.

Perezida wa Sena y’u Rwanda yanahishuye ko ruzasinyana n’u Buhinde amasezerano yo gukuraho uburyo bwatumaga ibicuruzwa bikorerwa muri ibi bihugu bisoreshwa kabiri, gusa ntiyeruye niba nayo azasinyirwa mu ruzinduko rwa Narendra Modi i Kigali.

Mu gihe u Rwanda ruzakira Modi w’u Buhinde rukanakira na Xi Jinping, Perezida w’u Buhinwa, igihugu nacyo gikomeye muri Aziya, Makuza yavuze ko nta mpunge biteye kugirana umubano na byombi kuko rushyize imbere umubano ushingiye ku nyungu zihuriweho.

Ntiharatangazwa itariki Modi azazira mu Rwanda ariko bizwi ko ari mu gihe azaba ari ku mugabane w’Afurika aho azitabira inama y inama y’ibihugu bitanu bifite ubukungu buri kuzamuka cyane ku Isi izwi nka BRICS (Brazil, India, China na South Africa) ku wa 25 -27 Nyakanga 2018 muri Afurika y’Epfo.

Ubuhahirane bw’u Rwanda n’u Buhinde bwaroroshye kuko ubu hari ingendo zidahagarara za RwandAir, Kigali – Mumbai, kuva muri Mata 2017.

Bernard Makuza yari mu ruzinduko mu Buhinde

[email protected]

Kwamamaza
Kwamamaza

Izindi nkuru wasoma

Kwamamaza

TANGA IGITEKEREZO

AMATEGEKO AGENGA IYANDIKA RY'IGITEKEREZO CYAWE

Nta gitekerezo kirajyaho. Ba uwa mbere!  

Kwamamaza