IGIHE

Perezida Macron yagiriwe inama yo gusabira u Bufaransa imbabazi ku ruhare rwabwo muri ‘Jenoside’

0 6-04-2021 - saa 14:59, Akayezu Jean de Dieu

Icyumweru kimwe ishyizwe hanze, raporo igaragaza uruhare rw’u Bufaransa mbere no mu gihe cya Jenoside yakorewe Abatutsi yiswe ‘Raporo Duclert’ ikomeje kuvugwaho cyane nyuma yo gushyira hanze ukuri ku ruhare rw’icyo gihugu muri Jenoside yakorewe Abatutsi, cyari kimaze imyaka 27 cyihunza.

Kuri ubu umunyamateka w’Umufaransa, Stéphane Audoin-Rouzeau, yavuze ko ibyo u Bufaransa bwakoze biteye isoni ku buryo Perezida Emmanuel Macron akwiriye gusaba imbabazi u Rwanda n’Abanyarwanda.

Audoin-Rouzeau yabitangaje kuri uyu wa Kabiri tariki 6 Mata 2021, nyuma y’iminsi mike Komisiyo Duclert itangaje ku mugaragaro ibyavuye mu icukumbura ryimbitse ku ruhare rw’iki gihugu hagati ya 1990 na 1994 rwagejeje kuri Jenoside yakorewe Abatutsi.

Iyo Komisiyo yayobowe n’Umuhanga mu by’Amateka, Prof. Vincent Duclert, yashyikirije raporo yayo Perezida Emmanuel Macron ku wa 26 Werurwe 2021, aho igaragaza ‘uruhare rukomeye kandi ntagereranywa’ rw’u Bufaransa mbere no muri Jenoside yakorewe Abatutsi.

Iyi raporo kandi yazamuye amarangamutima y’abandi basirikare bakomeye bahoze mu butumwa bw’ubutabazi u Bufaransa bwakoreye mu Rwanda guhera muri Kamena 1994 bwiswe ‘Opération Turquoise’ ndetse n’abari bari mu zindi nzego z’ubuyobozi, aho bagiye bagaragaza ko ubutegetsi bwa Mitterrand bwagiye bwirengagiza kenshi amakuru n’ibimenyetso byagaragazaga ko mu Rwanda hari gutegurwa Jenoside.

Radio France Inter iri mu zikomeye mu Bufaransa, kuri uyu wa Kabiri yakoze ikiganiro kigaruka kuri ‘Raporo Duclert’ cyari cyatumiwemo impuguke mu mateka, Audoin-Rouzeau n’Umunyarwandakazi warokotse Jenoside yakorewe Abatutsi, Jeanne Allaire Kayigirwa.

Umunyamateka Audoin-Rouzeau wavanywe muri Komisiyo Duclert, yavuze ko kugaragaza uruhare rw’u Bufaransa muri Jenoside yakorewe Abatutsi mu Rwanda ari ‘intambwe ikomeye cyane’ yo kuziba icyuho mu guhakana Jenoside kw’Abafaransa.

Ati “Ibiro by’Umukuru w’Igihugu byari bifite uburyo bwose bwo kumenya no kwanga ko habaho amoko [mu Rwanda] , ni ukuvuga ivanguramoko n’imiterere ya Guverinoma ya Habyarimana. Yanze gufungura amaso ngo ibone ubwicanyi bwabaye mu 1990 kandi burakomeza bigizwemo uruhare n’abayobozi muri guverinoma [….]. Raporo ya Duclert irasobanutse neza.”

Audoin-Rouzeau avuga ko hari ibihugu byinshi byagiye bisaba imbabazi ku ruhare rwabyo muri Jenoside yakorewe Abatutsi birimo na Vatican, bityo ko n’u Bufaransa bukwiriye kubikora.

Ati “Ndinginga Perezida Macron ngo asabe imbabazi mu izina ry’u Bufaransa. Perezida wa Repubulika agomba gushyigikira uku kuri. Ababiligi basabye imbabazi, Vatican irabikora. Ni iyihe mpamvu u Bufaransa bwakwinangira gusaba imbabazi? Perezida wa Repubulika agomba kubikora.”

Jeanne Allaire Kayigirwa warokotse Jenoside yavuze ko ibiri muri raporo bisobanutse, gusa akanenga ijambo Komisiyo Duclert yakoresheje ry’uko u Bufaransa bwashyigikiye Guverinoma ya Habyarimana ‘buhumyi’.

Ati “Ni intambwe nziza itewe ariko ijambo ‘buhumyi’ ntabwo rikwiye. Ntabwo wavuga ko habayeho ubuhumyi kandi umuntu yari azi ko ubutegetsi bwa Habyarimana bwari bugizwe n’ivangura rishingiye ku moko, bwateguye gahunda zo gutsemba Abatutsi. Turabizi ko inyandiko zerekana uko ababishinzwe icyo gihe bari babizi.”

Kayigirwa yunze mu rya Audoin-Rouzeau, avuga ko Macron akwiriye gutera indi ntambwe, agasaba imbabazi z’uruhare rw’u Bufaransa muri Jenoside yakorewe Abatutsi.

Ati “Dutegereje kumenya icyo agiye kubikoraho. Icyo tumusaba gukora ni ugutanga imbwirwaruhame ku wa 7 Mata, umunsi wo Kwibuka Jenoside yakorewe Abatutsi mu gihugu cye kandi bikaba byarashyizweho na we ubwe. Igihe kirageze ko Perezida wa Repubulika asaba imbabazi imiryango y’abarokotse.”

Biteganyijwe ko kuri uyu wa 7 Mata 2021 u Bufaransa buzashyira hanze inyandiko zifashishijwe na Komisiyo Duclert zigaragaza uruhare rw’icyo gihugu mu mateka yagejeje kuri Jenoside yakorewe Abatutsi, nkuko Perezida Macron yabisezeranyije kugira ngo abandi bashakashatsi bakomeze icukumbura.

Byitezwe ko kandi vuba aha, Perezida Macron azagirira uruzinduko mu Rwanda. Ni uruzinduko rw’amateka kuko yaba abaye uwa mbere uyoboye u Bufaransa ugeze mu Rwanda nyuma yo kwemera ko igihugu cye cyagize uruhare rukomeye muri Jenoside. Undi mukuru w’Igihugu cy’u Bufaransa wasuye u Rwanda ni Nicolas Sarkozy warugendereye mu 2010.

Stéphane Audoin-Rouzeau yavuze ko nta mpamvu ibindi bihugu byaba byarasabye imbabazi ku ruhare rwabo muri Jenoside yakorewe Abatutsi ngo u Bufaransa bukomeze kwirengagiza
Kwamamaza
Kwamamaza

Izindi nkuru wasoma

Kwamamaza

TANGA IGITEKEREZO

AMATEGEKO AGENGA IYANDIKA RY'IGITEKEREZO CYAWE
Kwamamaza