IGIHE

Nta somo na rimwe dukeneye kuri BBC - Perezida Kagame asubiza abanenga u Rwanda kutagira indangagaciro

0 25-06-2022 - saa 21:37, Philbert Girinema

Perezida Kagame yabwiye ibihugu n’abantu bumva ko u Rwanda rutagendera ku mahame n’indangagaciro zo kurengera ikiremwamuntu, avuga ko atari byo ko nta muntu n’umwe ukwiriye kumva ko afite indangagaciro kurusha Abanyarwanda.

Yabigarutseho mu kiganiro n’abanyamakuru cyakurikiye isozwa ry’inama ya CHOGM.

Cyabaye nyuma y’amasaha arenga atanu abakuru b’ibihugu bari mu mwiherero wafatiwemo imyanzuro irimo ko Togo na Gabon ari abanyamuryango bashya, hanyuma Samoa yo ikaba ariyo izakira inama itaha.

Cyitabiriwe na Perezida Kagame ugiye kuyobora Commonwealth mu gihe cy’imyaka ibiri; Umunyamabanga Mukuru wa Commonwealth, Patricia Scotland; Perezida wa Sierre Leone, Julius Maada Bio; Perezida wa Guyana, Irfaan Ali na Minisitiri w’Intebe wa Samoa, Fiamē Naomi Mataʻafa.

Umukuru w’Igihugu yavuze ko hari igice kimwe cy’Isi gisa n’icyashyizeho icyitwa indagagaciro, ku buryo aricyo cyibona nk’ikizifite abandi bo ntibabe bazifite.

Ati “Ni inde ugena indangagaciro, cyangwa ni inde utagira indangagaciro? Iyo abantu bavuga indangagaciro, [wumva ko] hari igice cy’Isi cyihaye inshingano zo kugena indangagaciro. [Bisa nk’aho] abasigaye twese tutagira indangagaciro, tukagomba guhora twigira kuri abo bandi bagena indangagaciro."

Umukuru w’Igihugu yavuze ko igitangaje ari uko nta gihe runaka umuntu ashobora kwiga izo ndangagaciro ngo azimenye neza, ati "Igiteye inkeke ni uko igihe wamaze wiga nta gaciro gifite, [kuko] utazigera ugira ubushobozi [bwo kumenya izo indangagaciro]. Uzahora witwa umuntu utagira indangagaciro cyangwa uturuka ahantu hataba indangagaciro."

Umukuru w’Igihugu yavuze ko ibihugu byo mu Majyaruguru y’Isi, ari naho BBC ikomoka, bihora bitekereza ko ari byo bifite indangagaciro, abandi ntazo bafite.

Ati “Abo bo mu Majyaruguru bahora batekereza ko ari aba mbere mu kugira indangagaciro, abandi bakwiriye kuzikurikiza. Ni ikosa rikomeye, ntabwo ari ukuri. Natwe dufite indangagaciro, twebwe hano mu Rwanda no muri Afurika, dufite indangagaciro, ntabwo ari ibyo gushidikanyaho."

Perezida Kagame yavuze ko hari ibibazo u Rwanda rwagiye ruhura nabyo, bigizwemo uruhare n’abo bo mu Majyaruguru, atanga urugero kuri Jenoside yakorewe Abatutsi.

Ati "Abo bo mu Majyaruguru bifuza kugena indangagaciro bagize uruhare muri ibi bibazo twahuye nabyo. Bamwe muri bo nibo babaye intandaro y’ibibazo twahuye nabyo." Nka Jenoside [yakorewe Abatutsi] aho abarenga miliyoni imwe bishwe. Niba mwibuka neza, nta kintu na kimwe ndi guhimba, ibiganiro mpaka byabereye muri Loni, ibyo bihugu biteye imbere bishyiraho indangagaciro, byabifataga nk’aho ari Abanyafurika bari kwicana, ibi biganiro byabereye mu ruhame, ariko se utekereza ko ibyo ari ukuri?"

Perezida Kagame yavuze ko bamwe mu bantu bo mu Majyaruguru y’Isi ari bo babibye urwango mu Banyarwanda, bakababwira ko bari mu moko atandukanye.

Umukuru w’Igihugu yasubije umunyamakuru wa BBC wari umubajije ikibazo, ko nta muntu n’umwe wo muri BBC ufite cyangwa ugendera ku ndangagaciro kurusha Abanyarwanda.

Perezida Kagame yagarutse ku bibazo byatewe n’ubukoloni, yibaza impamvu abo mu Majyaruguru babigizemo uruhare, batekereza ko nyuma yo kugenda byahise bikemuka.

Ati "Utekereza ko ibyo byose byahise bizimira ako kanya, noneho abaturage bagatangira kwicana? Noneho hakabaho abandi bishyize hejuru, bari hejuru iyo mu Majyaruguru bakajya badutunga intoki, batekereza ko nta ndangagaciro tugira, turi aho gusa tutubaha ubwisanzure bwa muntu, tutubaha uburenganzira bwa muntu, nibyo? BBC ubitekereza utyo?"

Umukuru w’Igihugu yavuze uburyo ibigo nka BBC bitangaza amakuru yabyo harimo kurenganya Abanyafurika muri rusange.

Yavuze ko u Rwanda rudakeneye kwigishwa indangagaciro, ati "Ndashaka kukwizeza ko nta muntu n’umwe kuri BBC cyangwa ahandi aho ari ho hose wubahiriza indangagaciro neza kurusha uko tubikora hano mu Rwanda, kereka niba ushaka guhisha amakosa y’abo bantu bifuza kutugenera indangagaciro."

Perezida Kagame yavuze ko abantu batagize amateka akomeye nk’ay’u Rwanda bashobora kumva ibishinjwa u Rwanda kutagira indangagaciro, ariko ashimangira ko Abanyarwanda babyumva neza.

Ati "Nta somo na rimwe dukeneye kuri BBC cyangwa se undi uwo ariwe wese. Ibi ndabikubwira mbihagazeho. Demokarasi n’ibindi uvuga bya gereza; nta muntu n’umwe mu Rwanda uri muri gereza udakwiriye kuba arimo kuko dufite inzego z’ubutabera zikora neza … Ahubwo reka nkubwire, hari abantu batari muri gereza bakwiriye kuba bariyo.”

Yatanze urugero kuri Ingabire Victoire. Ati “Ntabwo ari muri gereza ubu ariko yagakwiriye kuba arimo ubu.”

Yagarutse ku buryo yahawe imbabazi, akarekurwa, mu gihe inkiko zari zaramukatiye igifungo. Ati “Yari yahamijwe ibyaha biturutse ku bimenyetso byatanzwe n’ubutabera bwo mu bihugu by’u Burayi bwakoranye n’inzego z’ubutabera z’u Rwanda.”

Yatanze urugero ku wundi muntu [Paul Rusesabagina] ushimirwa n’ibihugu by’amahanga, ko ari intwari yarokoye abantu. Yavuze ko ibyo bihugu bivuga ibyo mu gihe ku rundi ruhande bitanahakana ibyaha ashinjwa, ariko bikumva ko akwiriye gufungurwa.

Yavuze ko ari umugabo wahamijwe ibyaha hamwe n’abandi bagera kuri 20 kandi ko ari we wari ubakuriye.

Perezida Kagame yavuze ko nta muntu ukwiriye kwigisha u Rwanda indangagaciro kuko ruzifitemo
Ikiganiro n'abanyamakuru cyabaye gikurikira umwiherero w'abakuru b'ibihugu ba Commonwealth wasoje iyi nama
Perezida Kagame yavuze ko nta muntu n'umwe uri muri gereza mu Rwanda ufunzwe mu gihe adakwiriye kuba afunzwe
Kwamamaza
Kwamamaza

Izindi nkuru wasoma

Kwamamaza

TANGA IGITEKEREZO

AMATEGEKO AGENGA IYANDIKA RY'IGITEKEREZO CYAWE
Kwamamaza