Minisitiri w’Intebe, Dr Edouard Ngirente, yasabye abashoramari mu by’amahoteli bakorera muri Afurika kubyaza umusaruro amahirwe ari mu Rwanda nk’igihugu cya mbere gikurura abakerarugendo kurusha ibindi kuri uyu mugabane.

Ubwo yahaga ikaze abitabiriye inama y’Ihuriro Nyafurika ry’Abashoramari mu by’Amahoteli, AHIF, kuri uyu wa 11 Ukwakira 2017, Minisitiri w’Intebe, Dr. Ngirente, yavuze ko u Rwanda rumaze kugera ahashimishije mu bukerarugendo no gucumbikira abashyitsi.

Yasobanuye ko amahoteli yinjiza 8% by’umutungo w’imbere ku mugabane wa Afurika, iyi nama ikaza gufatirwamo ingamba zo kugira ngo uwinjizwa n’amahoteli ndetse n’ubukerarugendo urusheho kuzamuka.

Minisitiri w’Intebe, Dr Ngirente, yatanze urugero ku Rwanda agaragaza ko urwego rw’amahoteli rwazamutse vuba cyane kubera ingamba zihariye za guverinoma.

Yagize ati “Mu Rwanda ku buyobozi bwa Perezida Paul Kagame, twateye imbere cyane mu rwego rw’ubukerarugendo, byagezweho kubera gushyira ingufu mu kubaka ibikorwaremezo, amahoteli no gukorana n’ibigo biyacunga bifite amazina akomeye ku isi.”

Yongeyeho ko kuba umubare w’amahoteli akorera mu Rwanda ukomeza kuzamuka bituma Abanyarwanda benshi babona akazi.

Minisitiri w’Intebe yasobanuye ko Leta y’u Rwanda yiyemeje gukuba kabiri umubare w’inyungu iva mu bukerarugendo kugira ngo igihugu gikomeze kuzamuka vuba mu bukungu dore ko n’icyegeranyo cya World Economic Forum cyo mu mwaka wa 2017/2018 cyashyize u Rwanda ku mwanya wa kabiri muri Afurika mu bihugu bifite ubukungu buzamuka vuba.

Yakomeje agira ati “Muri iyi nama muzerekwa amahirwe ari mu Rwanda mu rwego rw’amahoteli, abayobozi ba RDB biteguye kubakira no kuganira namwe aho mwashora imari mukunguka. Ndabizeza ko gushora imari mu Rwanda byunguka cyane, ni igihugu gitekanye kandi gifite ubukungu buhagaze neza.”

Minisitiri w’Intebe kandi yasuye imurikabikorwa ryitabiriwe n’amahoteli akomeye arimo Marriott, Minor Hotels, Carlson Rezidor, … ibigo bikora indege, iby’ibaruramari n’ibindi bikora ibijyanye n’ubukerarugendo.

Inama y’Ihuriro Nyafurika ry’Abashoramari mu by’amahoteli yahuje abayobozi b’ibigo by’ubucuruzi bishora imari mu mahoteli muri Afurika aho baganira ku mahirwe ari mu bucuruzi bw’ubukerarugendo, ku bikorwaremezo no kuzamura amahoteli agezweho kuri uyu mugabane.

Yabanjirijwe no guhemba ibihugu n’ibigo by’ubucuruzi byitwaye neza mu bukerarugendo ku mugabane wa Afurika muri uyu mwaka, aho u Rwanda rwahawe igihembo cy’igihugu gikurura abakerarugendo kurusha ibindi.

Minisitiri w’Intebe, Dr Edouard Ngirente yasabye abashoramari mu by’amahoteli bakorera muri Afurika kubyaza umusaruro amahirwe ari mu Rwanda nk’igihugu cya mbere gikurura abakerarugendo kurusha ibindi kuri uyu mugabane


Kwamamaza

ANDIKA ICYO UTEKEREZA KURI IYI NKURU

Izina

Email


IBITEKEREZO

ANDI MAKURU

2009 - 2017 ©. All rights reserved