IGIHE

Louise Mushikiwabo yaburiye ibihugu bigifata Afurika nk’umugabane wo gufashwa gusa

1 11-06-2019 - saa 13:44, Evariste Nsengimana

Umunyamabanga Mukuru w’Umuryango w’Ibihugu bikoresha Igifaransa(OIF), Louise Mushikiwabo, yagaragaje ko nubwo umugabane wa Afurika ugizwe n’ibihugu byinshi bikiri mu nzira y’amajyambere udakwiye gufatwa nk’uzahora uterwa inkunga kuko ufite ubushobozi n’amahirwe byerekana ko ariyo izaba moteri y’iterambere mu minsi iri imbere.

Ibi yabitangaje ubwo yafunguraga inama mpuzamahanga y’iminsi itatu yiga ku iterambere ry’ubukungu mu bihugu byo ku mugabane wa Amerika, yabereye i Montreal muri Canada kuri uyu wa Mbere.

Mushikiwabo yavuze ko abantu bose bakwiye gusaranganya kandi bukagira uruhare mu iterambere ry’ubukungu kuko bitabaye ibyo bishobora gutera ibibazo abatuye Isi, birimo amakimbirane.

Mushikiwabo yavuze ko n’abagore bakwiye gahabwa umwanya mu nzego z’ubukungu kuko bagira uruhare rukomeye mu guharanira impinduka, nkuko ikinyamakuru Actualite cyo muri Canada cyabitangaje.

Ati “Iterambere ryose ridasangiwe, ridasaranganjijwe ni ikibazo ku Isi yacu, mu rwego rw’ubucuruzi, ni ikibazo ku Isi muri rusange. Iyo risangiye, biba intambwe igana ejo hazaza”.

Yabihereyeho avuga ko kuba hakiri ubusumbane bukabije hagati y’ibihugu bikize n’ibikennye ku isi, ingaruka mbi zitazabura.

Ati “Iterambere ry’ubukungu bw’ibihugu bikennye ni imbogamizi ku miryango mpuzamahanga. Ubukene n’ubusumbane bitera amakimbirane, bihungabanya umutekano kandi ni nayo mpamvu nyamukuru y’abimukira.”

Mushikiwabo yavuze ko nubwo bimeze gutyo, ibihugu bya Afurika bifite ingamba z’igihe kirekire zizabifasha guhangana n’icyo kibazo.

Yasabye ibihugu byateye imbere kwikuramo imyumvire yo kumva ko Afurika icyo ikeneye ari uguhora ifashwa .

Ati “Afurika ntikwiye gukomeza gufatwa nk’ikeneye ubufasha, Afurika ikwiye kuba umufatanyabikorwa.”

Mushikiwabo yavuze ko hari icyizere kuko uwo mugabane ufite ibishoboka byose ngo mu gihe kizaza uzabe moteri y’iterambere ry’isi. Ibyo byangombwa ni urubyiruko, imico itandukanye, abaturage biyongera umunsi ku wundi n’umutungo kamere.

Yashishikarije ibigo by’abashoramari kubyaza umusaruro amahirwe agaragara muri Afurika kugira ngo habashe kubaho iringaniza.

Umuryango wa Afurika Yunze Ubumwe guhera mu 2013 wihaye icyerecyezo 2063 cyitezweho kuzawugeza ku rundi rwego. Guhera muri Nyakanga uyu mwaka, haratangizwa isoko rusange ribumbiye hamwe ibihugu bigize uwo muryango. Iryo soko ryitezweho koroshya urujya n’uruza rw’abantu n’ibintu no gukuraho imbogamizi mu bucuruzi.

Louise Mushikiwabo yaburiye ibihugu bigifata Afurika nk’umugabane wo gufashwa gusa
Kwamamaza
Kwamamaza

Izindi nkuru wasoma

Kwamamaza

TANGA IGITEKEREZO

AMATEGEKO AGENGA IYANDIKA RY'IGITEKEREZO CYAWE

1
Ntakirutimana Oscar 2019-06-12 06:09:38

Mpora mbabazwa niki kintu cyo kuba Africa itigenga duhora dufatwa nkabadashoboye abantu ahari bakekako tutuzuye ikimbabaza kurushaho nuko bamwe muri benewacu tutabyumva kimwe

Kwamamaza