Inama y’abaminisitiri yateranye kuri uyu wa 5 Ukuboza 2017, yemeje uburyo burambye bwo gushakisha umutungo wunganira gahunda y’ubwisungane mu kwivuza, nyuma y’uko bigaragara ko amafaranga atangwa atasha kwishyura serivisi zose z’ubuvuzi.

Mu kiganiro n’abanyamakuru cyakurikiye iyo nama, Umunyamabanga wa Leta muri Minisiteri y’Ubuzima ushinzwe Ubuzima Rusange n’Ubuvuzi bw’Ibanze, Dr Ndimubanzi Patrick, yavuze ko abanyarwanda bagana abaganga biyongereye ndetse n’icyizere cyo kubaho kikazamuka, bigatuma amafaranga yatanzwe muri mituweli aba atagihagije ngo gutanga serivisi zose bishoboke.

Dr Ndimubanzi yavuze ko ubwo buryo buzanyura mu kureba zimwe mu nzira leta yinjirizamo amafaranga, akagenda aharirwa gukoreshwa mu bwisungane mu kwivuza gusa.

Yakomeje agira ati “Tukaba twaravuze ngo kubera izi serivisi nshya tugenda tuzana, kubera ubuvuzi butera imbere, turebe uburyo bwakunganira imisanzu abaturage batanga. Tuza kuvuga ngo ni iki twakwigomwa ngo twunganire mutuweli ngo turebe uko muri uyu mwaka twayunganira dushatse ubushobozi ahandi.”

Ubusanzwe ukurikije itegeko rya mituweli, amafaranga ava mu misanzu abanyamuryango batanga, andi akava ku ngengo y’imari ya leta, ku buryo nibura 13% by’ingengo y’imari leta ishyira muri Minisiteri y’Ubuzima ajya mu gufasha bantu kwivuza.

Dr Ndimubanzi yakomeje agira ati “Muri make ni ukuvuga ngo mu mafaranga leta yari isanzwe yinjiza, ni ayahe twafata tukayinjiza muri mituweli? Kubera ko ubusanzwe usanga amafaranga tuba twabashije kubona adashobora kwishyura serivisi za mituweli. Ayo mafaranga rero azaziba icyo cyuho.”

Ubusanzwe mituweli yishyura nibura 95% by’indwara zose ziboneka mu Rwanda, gusa hari icyizere ko ubu buryo buzatuma icyo kigero cyongerwa ndetse na serivisi idafasha nk’insimburangingo zikazagerwaho.

Dr Ndimubanzi yakomeje agira ati “Hari aho tuzatangirira, nk’urugero niba ubu dukeneye miliyari 10 tuzashobora kuyabona, ariko buri gihe tugenda tureba ngo ni angahe ari kubura, noneho mu kubinyuza muri ya ngengo y’imari isanzwe, ayo tugenera ingengo y’imari isanzwe akagenda yiyongera.

“Nubwo bwose ariko dushyizeho ubu buryo bwo kunganira mituweli, turacyashishikariza abaturage gutanga rwa ruhare rwabo kugeza igihe bose bayitangiye.”

Umunyamabanga wa Leta muri Minisiteri y’Ubuzima ushinzwe Ubuzima Rusange n’Ubuvuzi bw’Ibanze, Dr Ndimubanzi Patrick

Umunyamabanga wa Leta muri Minisiteri y’Ubutegetsi bw’Igihugu ushinzwe Imibereho Myiza y’Abaturage, Dr. Mukabaramba Alivera, yabwiye IGIHE ko mu nama y’abaminisitiri bagaragaje ahantu hatandukanye hazagenda hava amafaranga, ku buryo nibura leta yabasha kubona miliyari 16 Frw buri mwaka, azunganira asanzwe atangwa muri mituweli.

Yakomeje agira ati “Ntabwo twabijya kure namwe mujya mubibona, ntabwo turatangira gutanga serivisi zimeze nka RAMA, MMI, nk’ubu nakubwira ko tutarashobora gukorana na farumasi zigenga, iyo wivurije kuri mituweli baguha imiti y’ibanze iri aho ku bitaro yaba idahari bakakohereza kwigurira.”

“Harimo rero utuntu tutarakemuka, ku buryo ntabwo ari ikindi n’indwara zindi itishyurira ni ukubera amafaranga makeya, ni na yo mpamvu hazamo icyuho.”

Kuzongera amafaranga ngo bizatuma na serivisi ziyongera, ku buryo nka Minisiteri y’ubutegetsi bw’igihugu ikora ubukangurambaga bizayorohera kurushaho.

Yakomeje agira ati “Dutangiye buriya buryo, turaza kureba ukuntu bigenda. Amafaranga bazegeranya nabonye hari aho agera kuri miliyari 16 Frw (mu mwaka), azibe icyuho cy’imyenda yajyaga iba mu bitaro. Nituziba icyuho bizanazamura na serivisi za mituweli.”

Mu kongera serivisi nziza umuntu wivuriza kuri mituweli bizatuma abantu bayitanga biyongera, kuko ubu bageze kuri 78% kandi ntibyabaga mu gihembwe cya mbere, ahubwo 80% yageraga umwaka wenda kurangira, ku buryo byerekana ubushake abaturage bafite.


Kwamamaza

ANDIKA ICYO UTEKEREZA KURI IYI NKURU

Izina

Email


IBITEKEREZO

ANDI MAKURU

2009 - 2017 ©. All rights reserved