Uruganda rukora ibinyobwa bisembuye n’ibidasembuye(Bralirwa) rugiye kugeza amashanyarazi bu baturage bo mu Murenge wa Ndego, Akarere ka Kayonza, begereye imirima yarwo y’ibihingwa byifashishwa mu kwenga ibinyobwa.

Igikorwa cya Bralirwa gikubiye mu masezerano yagiranye n’Ikigo cy’Igihugu gishinzwe guteza imbere ingufu (EDCL) n’Akarere ka Kayonza, kuri uyu wa 11 Ukwakira 2017.

Ayo masezerano akubiyemo uruhare rwa buri ruhande mu gutanga amashanyarazi, birimo gukurikirana ibikorwa byo kuyashyira mu nzu bizakorwa na EDCL, kwishyura amafaranga azakoreshwa, kwiga umushinga, gusinya amasezerano na Rwiyemezamirimo, gukurikirana uko bikorwa no kuyashyikiriza abaturage bizakorwa na Bralirwa.

Umuyobozi Mukuru wa Bralirwa, Victor Madiela, yavuze ko ayo mashanyarazi akomoka mu mirasire y’izuba afite agaciro ka miliyoni 15 z’amafaranga y’u Rwanda, bayatanze muri gahunda y’uruganda yo kuzamura imibereho y’abatuririye ako gace.

Victor yasobanuye ko gukura mu kizima abaturage bo muri uyu murenge, ari igikorwa cyiyongera ku kubaha akazi n’imbangukiragutabara ibafasha kugeza abarwayi kwa muganga.

Yagize ati “Mbere na mbere, twishimira ko tubasha guha akazi abaturage batuririye uwo murima. Uramutse ugeze neza aho uri impande ya Pariki y’Akagera, wakwibonera uburyo abahatuye bafite amahirwe yo kuhabona akazi. Impande zawo, nta mashanyarazi ahari, yego tubaha akazi ariko nanone twatekereje uko twabagezaho umuriro. Kuri njye, mbona bizabagiraho ingaruka nyinshi kandi nziza. Si amashanyarazi yonyine tubaha, mu minsi ishize twanabahaye imbangukiragutabara bifashisha cyane iyo hari uwarwaye cyangwa abagore bagiye kubyara.”

Umuyobozi wa Bralirwa, Victor Madiela aganira n'itangazamakuru

Muri rusange, abaturage b’Akarere ka Kayonza bafite umuriro w’amashanyari ni 33%, by’umwihariko mu Murenge wa Ndego, abawufite ni 10% gusa, ibintu Umunyamabanga Nshingwabikorwa wako, Kiwanuka Musonera Ronald, avuga ko bizabafasha kuzamura iyo mibare.

Yagize ati “Umurenge wa Ndego, ni umwe muri 12 y’akarere wari ukiri inyuma mu gucanirwa. Kuba abaturage babonye iyi nkunga ni ibintu bidushimishije cyane kuko nabo biratuma binjira mu iterambere ryo gukoresha amashanyarazi kandi muzi ko iyo umuturage abonye amashanyarazi aba abonye iterambere.”

Umuyobozi w’agategenyo wa EDCL, Yves Nshuti, yavuze ko kuba Bralirwa iteye intambwe nk’iyo bitanga icyizere ko gahunda ya leta yo gucanira abanyarwanda bose izagerwaho vuba.

Ati “Turashima intambwe Bralirwa yateye nk’uwikorera mu mirimo itandukanye,kuba yatanze inkunga yayo mu bijyanye n’amashanyarazi ku baturage. Bigaragaza ubufatanye bafite kugira ngo intego z’igihugu z’uko buri munyarwanda agezwaho amashanyarazi mu 2024 zizagerwaho.”

Iki gikorwa cyo gushyikiriza amashanyarazi abaturage bo muri uyu Murenge batoranyijwe hakurikijwe ibyiciro by’ubudehe, kizatangira ku wa Mbere utaha aho Mobisol ariyo izakibafashamo.

Umuyobozi wa Bralirwa, Victor Madiela n’uw’agateganyo wa EDCL, Yves Nshuti bashyira umukono ku masezerano
Umuyobozi wa Bralirwa, Victor Madiela n'uw'agateganyo wa EDCL, Yves Nshuti bahererekanya amasezerano
Umuyobozi w'agateganyo wa EDCL, Yves Nshuti


Kwamamaza

ANDIKA ICYO UTEKEREZA KURI IYI NKURU

Izina

Email


IBITEKEREZO

ANDI MAKURU

2009 - 2017 ©. All rights reserved