IGIHE

Kasada igiye gushora hafi miliyoni 40$ muri Hoteli Umubano; ni iki izanye cyananiye abandi?

0 25-06-2022 - saa 07:12, Ndahayo Emmanuel

Mu Rwanda rwo mu myaka ya 1980, ubwo ubukungu bw’igihugu bwari bukiri ku rwego rwo hasi, kubona amafaranga yo kwiteza imbere byari ingume. Uretse no kuyabona bigoranye, ikindi cyarushagaho gutera agahinda ni uko no mu gihe wagize utya ukayagwaho, kubona aho uyarira muri uyu Mujyi bitari ikintu cyoroshye.

Ku basirimu n’abakire b’icyo gihe, hamwe mu hantu hake bashobora guhurira bagasangira rimwe ariko nako bungurana ibitekerezo, ni ku rubaraza rwa Hotel Umubano yamaze igihe kinini iri mu zikomeye mu gihugu, aho abashyitsi b’imena b’igihugu n’abandi bakire bakundaga kumara igihe baganura ku byiza by’igihugu.

Muri iyi hoteli iri ku Kacyiru, ni hamwe mu hantu hake hari piscine muri ibyo bihe, hakaba ‘gym’ yari igezweho cyane, ukahasanga icyo kunywa gifutse ndetse n’ibindi byatumaga hahuza abakomeye mu gihugu.

Icyakora iby’iyi hoteli byaje guhinduka iza gutangira kugenzurwa na Leta y’u Rwanda binyuze mu Kigega ‘Agaciro Development Fund,’ hatangira urugendo rwo kuyishakira umushoramari wagombaga kuyibyaza umusaruro no kuyisana, kugira ngo ijye ku rwego mpuzamahanga.

Kugera mu 2011, iyi hoteli yari ifitwe n’Ikigo cya LAP Investment cyo muri Libya, aho yitwaga Laico Hotels. Nyuma yaje kugenzurwa n’ibigo nka Novotel, Meridian na Accord, mbere yo kwegukanwa na Madhavani Group mu 2017 nyuma yo kwiyemeza gushoramo agera kuri miliyoni 13$.

Amasezerano yari yasinywe hagati ya Leta na Madhavani Group ntiyubahirijwe, ibyo Umuyobozi Mukuru w’Urwego rw’Iterambere, RDB, Clare Akamanzi, yavuze ko byatewe ahanini n’ubushobozi buke butatumye ibigo byahawe kuyobora iyi Hoteli byubahiriza amasezerano byabaga byasinye na Leta y’u Rwanda.

Icyo gihe hatangiye urugendo rwo gushaka undi mushoramari, waje kuba Ikigo cya Kasada Capital Management cya Kasada Group, cyiyemeje kuvugurura iyi Hoteli mu masezerano afite agaciro gakabakaba miliyoni 40$ ni ukuvuga hafi miliyari 40Frw

Kasada izavugurura iyi Hoteli ariko iyirekere umwimerere wayo, gusa iyihindurire izina kuko izatangira kwitwa Movenpick Hotel. Imirimo yo kubaka iyi Hoteli izarangira mu 2025, uretse ko ibijyanye n’imiterere yayo imbere bitatangajwe, gusa ikazuzura ifite ibyangombya byo kujya ku rwego rw’inyenyeri eshanu.

Uburyo Kasada izaba igisubizo

Akamanzi yavuze ko bafite icyizere cy’uko bitandukanye n’izindi nshuro, Kasada izashobora gushyira mu bikorwa amasezerano yagiranye na Leta y’u Rwanda, bitewe n’uko ifite ubushobozi bw’amafaranga n’ubunararibonye mu micungire ya hoteli.

Yagize ati “Haba hakenewe ibintu bibiri kugira ngo ishoramari nk’iri ritange umusaruro, icya mbere ni ubushobozi bw’amafaranga bwo gutuma [ishoramari] rishoboka, ikindi ni ubunararibonye bwo kuyobora no kumva igikenewe kugira ngo ufungure hoteli uzayibyaze umusaruro.”

Yavuze ko ikigo cya Kasada Capital Management cyujuje ibyo byangombwa, ati “Impamvu dufite icyizere ni uko Kasada yujuje ibyo bintu uko ari bibiri. Urebye nko ku bushobozi bw’amafaranga…bafite ubushobozi bwo gushyira mu bikorwa uyu mushinga.”

Kasada ni Ikigo gifite hoteli mu bihugu umunani bya Afurika yo Munsi y’Ubutayu bwa Sahara, ari nacyo gice yibandaho mu ishoramari ryayo. Ihafite hoteli 16 zirimo ibyumba birenga 2000.

Akamanzi yavuze ko ibi bituma baza mu bigo bikomeye ku Isi mu bijyanye no kuyobora hoteli, ahera aho avuga ko bazuzuza inshingano biyemeje.

Ati “Ku bijyanye n’ubushobozi bwo kwakira abashyitsi…bari mu bihugu umunani muri Afurika yo Munsi y’Ubutayu bwa Sahara aho bafite hoteli 16 ariko nka Accor iri mu bihugu 30 ku rwego rw’Isi. Urebye ubunararibonye bafite mu kuyobora no kubaka hoteli bagatuma zigera ku ntego zazo, [ubona ko bari mu bigo] biyoboye ibindi ku Isi.”

Yavuze ko ubu bushobozi butuma Leta y’u Rwanda ibagirira icyizere, ati “Ntekereza ko ari abantu bakomeye ku rwego mpuzamahanga, ntabwo ari abantu batazi ibyo baje gukora, ni abantu bafite ubunararibonye buhambaye ndetse n’ibyo bagezeho bikomeye. Kubera izo mpamvu ebyiri, Leta y’u Rwanda ifite icyizere cy’uko uyu mushinga uzabasha gushyirwa mu bikorwa no kugenda neza kurusha uko byagenze mu bihe byashize.”

Umuyobozi Mukuru wa Kasada, Olivier Granet, yavuze ko bahisemo u Rwanda nk’ahantu heza hari haberanye n’ubukerarugendo.

Yagize ati “Hari ibintu bibatu by’ingenzi uba ufite. Icya mbere ni igihugu ndetse n’ibyo ushobora kubona mu gihugu, kuko abashyitsi benshi baba bifuza ahantu bazagirira ibihe byiza, bakabona ibyiza nyaburanga ndetse n’ibikorwaremezo…ibyo ni ibintu bikurura abashoramari kandi biri mu Rwanda.”

Uyu muyobozi kandi yavuze ko u Rwanda ari igihugu cyigaragaje nk’ikirimo kwakira inama zikomeye ku Mugabane wa Afurika, atanga urugero ku Nama iri guhuza abakuru b’igihugu na za guverinoma z’ibihugu bikoresha Icyongereza, CHOGM, yahurije hamwe abarenga ibihumbi bitanu.

Kasada ni Ikigo cy’Ishoramari cyigenga gikorera muri Afurika yo munsi y’Ubutayu bwa Sahara. Cyashinzwe mu 2018 bigizwemo uruhare n’Ikigo cy’Ishoramari cya Qatar, hamwe na Accor, imwe muri Sosiyete zimaze kwandika izina ku Isi mu bijyanye n’amahoteli. Amahoteli ya Kasada aba akora mu izina rya Accor, Ikigo cy’Abafaransa gifite ubunararibonye mu kugenzura amahoteli.

Ubwo Umuyobozi Mukuru wa RDB, Clare Akamanzi, yari ageze kuri Hoteli Umubano aho yanayizengurukijwe
Umuyobozi Mukuru wa Kasada, Olivier Granet, yavuze ko bahisemo u Rwanda nk’ahantu heza hari haberanye n’ubukerarugendo
Umuyobozi Mukuru wa Agaciro Development Fund, Gilbert Nyatanyi, yari yitabiriye iki gikorwa
Umuyobozi Mukuru w’Urwego rw’Iterambere, RDB, Clare Akamanzi, yavuze ko bizeye ko iri shoramari rizatanga umusaruro
Umuyobozi wa Agaciro Development Fund yagenzuraga Umubano Hotel, Gilbert Nyatanyi, yayishyize mu maboko ya Kasada
Hoteli Umubano izuzura mu 2025 itwaye hafi miliyoni 40$
Kwamamaza
Kwamamaza

Izindi nkuru wasoma

Kwamamaza

TANGA IGITEKEREZO

AMATEGEKO AGENGA IYANDIKA RY'IGITEKEREZO CYAWE
Kwamamaza