Ngirabagenga Jean Marie Vianney uvuka mu Karere ka Gicumbi mu Ntara y’Amajyaruguru, ni umugabo wavukanye ubumuga bwo kutabona wemeza ko atunzwe no gucurangira abahisi n’abagenzi bo muri Kigali akoresheje umuduri.

Uyu mugabo w’abana batanu, ni umwe mu batangaza benshi bitewe n’imibereho n’uburyo umwuga wo gucuranga umutunze kandi atabona.

Avuga ko hari ubwo ku munsi abona amafaranga agera ku bihumbi 20 iyo yahiriwe bityo ibyo akora akaba abifata nk’akazi kamutunze.

Mu gihe cy’ibiruhuko by’abanyeshuri aririmbana n’abana be babiri bari munsi y’imyaka 10 y’amavuko, bikaba biri mu bituma abantu bamugirira impuhwe.

Ngirabagenga yatangarije IGIHE ko gucuranga umuduri abimazemo imyaka igera kuri 25. Kuririmba indirimbo imwe akoresheje umuduri yishyurwa amafaranga 500 akanashimangira ko hari n’abajya bayarenza bitewe n’ubushobozi bwabo cyangwa biturutse ku buryo yabashimishije.

Yagize ati “ Uyu mwuga urantunze, ni wo umfasha kwishyura inzu, amafaranga y’amashuri y’abana n’ibikoresho byabo n’ibindi birimo ibyo kurya no kubavuza.”

Avuga kandi ko yahisemo kwiga gucuranga umuduri mu rwego rwo kwirinda ko yajya asabiriza kimwe na bamwe mu bafite ubumuga butandukanye.

Yagize ati “ Nize gucurangisha umuduri kugira ngo mbashe kwitunga kuko nakuze mpabwa akato cyane, nyuma yo kubimenya abantu bagendaga bantumira ngo mbacurangire, ku buryo naje no kubikuramo inzu y’ibyumba bitanu ndanarongora, uretse ko nyine umugore yaje kunta anantwara abana batatu twari tumaze kubyarana."

Nyuma y’aho yahise arongora umugore wa kabiri na we waje kwitaba Imana bamaze kubyarana abana batatu maze ahitamo kujya mu Mujyi wa Kigali kuba ari ho ashakishiriza imibereho.

Ati “ Nyina w’aba bana na we amaze gupfa, nagize amahirwe abagiraneza bari baramaze kumenya batangiye kujya bantumira ngo nze mbacurangire i Kigali noneho maze kuhagera ubuzima barushjeho kuba bwiza, bituma nimukana n’abana.”

Ngirabagenga yemeza ko amaze kugera i Kigali uyu mwuga we wamufashije cyane kuko yaje kuwukuramo ikibanza cy’ibihumbi 700 by’amafaranga y’u Rwanda yaguze i Karuruma mu Murenge wa Jabana mu Karere ka Gasabo.

Gusa atangaza ko zimwe mu ngorane ahura na zo zirimo kuba hari igihe acurangira abantu bakagenda batamwishyuye kubera ko aba atababona cyangwa agafatwa n’inzego z’umutekano zimushinja guteza akajagari mu Mujyi wa Kigali, bitewe n’uko iyo atangiye gucuranga ashungerwa n’abantu benshi.

Ngirabagenga yasoje avuga ko ababazwa cyane n’uko hari Abanyarwanda bamufata nk’imburamukoro kandi umwuga akora umutunze; umufasha kwihesha agaciro umurinda gusabiriza nka bamwe muri bagenzi be bafite ubumuga.

Ngirabagenga afatanya kuririmba n'abana be bato iyo ari mu gihe cy'ibiruhuko
Iyo Ngirabagenga acuranga umuduri abantu baba bamushagaye bamwe bakanamwishyura
Ngirabagenga yemeza ko gucuranga umuduri ari byo bimutunze akaba yarabihisemo yirinda gusabiriza


Kwamamaza

ANDIKA ICYO UTEKEREZA KURI IYI NKURU

Izina

Email


IBITEKEREZO

ANDI MAKURU

2009 - 2017 ©. All rights reserved