Iburengerazuba: Minisitiri Harerimana yagereranyije umusoro n’amaraso mu mubiri

1 13-09-2018 - saa 16:46, IGIHE

Umunyamabanga wa Leta muri Minisiteri y’Ubutegetsi bw’Igihugu ushinzwe Iterambere ry’Abaturage, Harerimana Cyriaque, yavuze ko umusoro ugomba gutangwa kuko ku gihugu umeze nk’amaraso mu mubiri, ugatuma gikora neza.

Uru rugero yarutanze kuri uyu wa Gatatu mu gihe hizihizwaga umunsi wo gushimira abasora ku nshuro ya 16, mu Ntara y’Iburengerazuba, no kwizihiza isabukuru y’imyaka 20 ikigo cy’Imisoro n’Amahoro (RRA) kimaze, ibirori byabereye mu karere ka Rutsiro.

Yagize ati “Umusoro ni nk’amaraso mu mubiri, gutanga imisoro ni ukubaka igihugu mu buryo buzaramba, kubaka u Rwanda ruzahoraho. Uko umubiri ukeneye kurya ni nako igihugu gikeneye imisoro kugira ngo gitere imbere. Tugomba gutanga umusoro.”

Harerimana yavuze ko mu gihe muri gahunda y’imbaturabukungu harimo kuvugurura imibereho y’abaturage, ari ngombwa ko imisoro itangwa kugira ngo intego igihugu cyihaye igerweho.

Avuga kandi ko muri gahunda y’igihugu yo kwigira, u Rwanda rudashobora kuyigeraho abarutuye badatanze imisoro uko bikwiye.

Yasabye inzego z’ubuyobozi bw’intara y’Iburengerazuba kureba ahava imisoro hose ndetse no kwigisha abantu ibyiza byo gusora kuko imisoro ariyo igira uruhare rukomeye mu mibereho myiza.

Komiseri Mukuru wungirije wa RRA, Ruganintwali Bizimana Pascal, yavuze ko imisoro yakusanyijwe mu Ntara y’Iburengerazuba mu mwaka w’ingengo y’imari wa 2017/2018 ingana na miliyari 23.3Frw, bigaragaza kwesa umuhigo ku 105.7% kuko intego yari miriyari 22Frw.

Naho imisoro yakusanyirijwe uturere ingana na miliyari 8.3Frw ku ntego ya miliyari 7.2Frw, iyo ntego ikaba yaragezweho ku kigero cya 116%.

Guverineri w’Intara y’Iburengerazuba Munyantwali Alphonse, yabwiye abaturage ko imisoro itangwa ibageraho bose, ati “dukwiriye gukomeza kongera ahava imisoro.”

Umuyobozi w’Urugaga rw’abikorera (PSF) mu Ntara y’Iburengerazuba, Twagirayezu Pierre Celestin, yashimye ibikorwa remezo bituma abikorera barushaho gukora neza imirimo yabo ibyara inyungu, bityo bagasora babikunze.

Yagize ati “Ibyiza biva mu misoro n’amahoro dutanga bituma turushaho gusora neza.”

Ikibazo cya magendu ariko kiracyagaragara muri iyi ntara bitewe ahanini n’uko ihana imbibe n’ibihugu bituranyi, gusa ubuyobozi buvuga ko buzakomeza gukorana n’inzego zose mu kurwanya icyo kibazo no gutuma aho umusoro uva hose utangwa neza.

Mu muhango wo kwizihiza umunsi mukuru w’Abasora, abasora 15 babaye indashyikirwa mu gutanga neza umusoro ku gihe bashimiwe, bagenerwa ibihembo n’abayobozi batandukanye.

Umunyamabanga wa Leta muri Minisiteri y’Ubutegetsi bw’Igihugu ushinzwe Iterambere ry’Abaturage, Harerimana Cyriaque
Abasora beza bafata ifoto y'urwibutso n'abayobozi i Rutsiro
Abasora beza bashimiwe
Komiseri Mukuru wungirije muri RRA, Bizimana Ruganintwali Pascal, ageza ijambo ku bitabiriye umunsi w'Abasora
Guverineri w’Intara y’Iburengerazuba Munyantwali Alphonse, yabwiye abaturage ko imisoro itangwa ibageraho bose
Umunyamabanga wa Leta muri Minaloc, Harerlimana Cyriaque, atanga ibihembo ku basora beza
Abayobozi mu Ntara y'Iburengerazuba bifatanije na RRA mu kwishimira isabukuru y'imyaka 20 iki kigo kimaze gishinzwe
Kwamamaza
Kwamamaza

Izindi nkuru wasoma

Kwamamaza

TANGA IGITEKEREZO

AMATEGEKO AGENGA IYANDIKA RY'IGITEKEREZO CYAWE

1
citoyen 2018-09-14 00:43:49

Nge ntababeshye uyu ni ubwa mbere mwumvise!! Ngo ni minisitiri w’iterambere ry’abaturage?!!!

Kwamamaza