IGIHE

Hakorwa iki ngo buri munyarwanda amenye iby’ibanze ku mategeko amurengera?

1 4-08-2019 - saa 11:27, Evariste Nsengimana

Inzobere mu by’amategeko n’ubutabera zigaragaza ko mu buzima bwa buri munsi abantu bakenera amategeko barenganyijwe cyangwa bashinjywa kurenganya abandi.

Ni na ngombwa kuyamenya no kuyakurikiza hagamijwe kubana mu bwumvikane ntawe ukandamije uburenganzira bw’abandi.

Gusa iyo uganiriye na bamwe mu baturage si benshi bakubwira ko bafite ubumenyi bw’ibanze mu by’amategeko cyangwa boroherwa no kubona ubufasha igihe babukeneye.

Ubushakashatsi Komisiyo ishinzwe kuvugurura amategeko yamuritse mu 2016, bwagaragaje ko umubare munini w’abanyarwanda batazi amategeko ndetse batabasha no kuyabona ngo bayasobanukirwe.

Ubushakashatsi Ihuriro ry’imiryango itanga ubufasha mu by’amategeko(LAF) yamuritse mu 2017 bugaragaza ko abantu bakoraga urugendo rurerure bagiye gushaka serivisi z’ubutabera naho bake cyane aribo bafite ubumenyi buhagije mu by’amategeko, ku buryo bagize ikibazo bazi inzira banyuramo kigakemuka.

Uzamushaka Josephine, umuturage wo mu Karere ka Gisagara, yabwiye IGIHE ko benshi badafite ubumenyi bw’ibanze ku mategeko, bityo rimwe na rimwe bumva ko barenganyijwe ariko bakayoberwa inzira banyuramo ngo barenganurwe.

Ati “Nkanjye hari ubwo narenganye[Yishyujwe umutungo bivugwa ko wafashwe n’umugabo we hashize imyaka ine apfuye] twakiranuwe n’inzego z’ibanze ariko kubera kutamenya inzira nanyuramo ngo ndenganurwe ndicecekera.”

IGIHE yagerageje kuganira n’abarebwa n’iki kibazo, bagaragaza icyakorwa n’ibirimo gukorwa ngo abanyarwanda bagire ubumenyi bw’ibanze ku mategeko.

Umuvugizi w’Ihuriro ry’Imiryango Itari iya Leta, Dr Nkurunziza Joseph Ryarasa, avuga ko imbaraga za buri muntu, cyane cyane imiryango itari iya Leta, mu kwigisha abaturage ibijyanye n’amategeko ari ingenzi.

Ati “Hakenewe imbaraga za buri muntu, ntibikwiye guharirwa Leta. Imiryango itari iya Leta ikwiye kugira uruhare mu kuziba icyo cyuho. Ikwiye gushyiramo imbaraga mu gufasha abaturage kumenya no gusobanukirwa amategeko n’inzego zishobora kubafasha gukemura ibibazo bagizemo.”

Umuyobozu w’Umuryango Uharanira Uburenganzira bwa muntu n’iterambere mu Karere k’Ibiyaga Bigari (GLIHD), Tom Mulisa, yavuze ko ubushakashatsi bakoze bwagaragaje ko ‘Abatuye mu Mijyi bibeshywaho ko bazi amategeko, bakabona n’ubwunganizi igihe babukeneye’ nyamara atari ko biri.

Ati “Byagaragaye ko mu Mijyi ariho hari abantu benshi badashobora kubona ubwunganizi mu by’amategeko. Uzasanga hari abantu benshi baburana n’abo batanganya ubushobozi, nk’umuturage wimurwa, uwirukanwa ku kazi n’ibindi.”

Mulisa yavuze ko hamwe n’indi miryango bakora ubukangurambaga ku baturage kugira ngo abakenera kunganirwa mu by’amategeko n’ubundi bufasha babibone nta mbogamizi.

Ubusanzwe amategeko asohoka mu Igazeti ya Leta ariko usanga abantu benshi batabizi, n’ababimenye ntibiborohere kuyibona.

Mulisa ati “Hakwiye gukoreshwa amaradiyo n’ubundi buryo buhari, amategeko yose uko asohotse, ay’ubutaka, umuryango, imisoro, tugashaka uburyo agera ku muturage byoroshye. Dushobora gukoresha umugoroba w’ababyeyi, inama z’abaturage n’iziba nyuma y’umuganda.”

Uretse kuba Guverinoma yarashyizeho inzego zitandukanye zifasha abaturage mu bijyanye n’ubutabera, inagira gahunda y’ubukangurambaga bwo kumenyekanisha amategeko na serivisi z’ubutabera ku baturage.

Umuhuzabikorwa w’Ubunyamabanga bw’Urwego rw’Ubutabera mu muri Minisiteri y’Ubutabera, Nabahire Anastase, yavuze ko Leta izi ko abatazi amategeko ari benshi ariyo mpamvu nyuma yo gushyiraho amategeko hakorwa ibikorwa byo kuyamenyekanisha.

Ati “Abaturage bamenye ko kujijuka ari umurimo umuntu ashyira ku mutima akijijura. Abanyamakuru mufashe abaturage kumva ko ari ngombwa kwirinda icyaha, amacakubiri, amakimbirane adafite ishingiro cyangwa mu gihe hari ubwumvikane bucye babikemurire mu muryango batagombye kwiruka mu nkiko.”

Ihuriro ry’imiryango itanga ubufasha mu by’amategeko rigaragaza ko ryatangije uburyo bw’ikoranabuhanga abaturage bashobora kwifashisha mu gukemura ikibazo cy’abakora urugendo rurerure bagiye gushaka serivisi z’ubwunganizi mu by’amategeko.

Iryo koranabuhanga hari aho riteganya ko uhamagara 845 ukamenya amategeko atandukanye ku buntu cyangwa ukaba wavugana n’umunyamategeko waryo.

Igika cya kabiri cy’ingingo ya 176 mu Itegeko Nshinga rya Repubulika y’u Rwanda kigira kiti “Nta we ushobora kwitwaza ko atazi itegeko iyo ryatangajwe mu buryo buteganywa n’amategeko.”

Kwamamaza
Kwamamaza

Izindi nkuru wasoma

Kwamamaza

TANGA IGITEKEREZO

AMATEGEKO AGENGA IYANDIKA RY'IGITEKEREZO CYAWE

1
Nathan 2019-08-04 04:52:39

Batangire kuyigisha mumashuri abanza

Kwamamaza