Bushayija Emmanuel, ni umugabo w’igikwerere w’imyaka 56. Yikundira ka manyinya cyane byeri itutubikana ifuro, amafiriti n’isosi y’inyama izwi nka Gravy. Azwi nka Yuhi VI Bushayija wimitswe na Benzinge Boniface wahoze ari Umujyanama wa Kigeli V Ndahindurwa.

Kugeza ubu, Benzinge niwe wenyine ufata Bushayija nk’umwami kuko abo muryango wa Kigeli V bazwi nk’Abahindiro, bamwamaganiye kure.

Ubwo Benzinge yahihibikaniraga kugira Bushayija umwami, bamwe barabisetse abandi babiha inkwenene ariko we kuva ubwo ubuzima yabagamo bwarahindutse kuko umunsi ku wundi asigaye ahora mu ikamba n’imyambaro ya cyami hamwe n’umudali mu gituza. Abana bo hafi y’aho aba, iyo bamubonye baramushagara bati “Umwami, Umwami.”

Aba mu nzu y’ibyumba bitatu n’igikoni iherereye mu gace ka Sale mu Mujyi wa Manchester. Nta bagaragu, nta baja agira ndetse na Benzinge wagakwiye kuba umugaragu mukuru yibera muri Leta ya Virginia mu bilometero 5,908 kure ye.

Usibye iyi midali, nta cyahindutse kuko inzu yabagamo niyo akibamo ndetse kwitwa Umwami w’Umunyarwanda ntacyo bivuze kuri benshi kuko n’Abanyarwanda baba mu Bwongereza batamuzi, muri rusange ni Umwami mu bitekerezo bye na Benzinge.

Ibya Emmanuel Bushayija byo kuba umwami bijya gutangira, tariki ya 16 Ukwakira 2016, Umwami Kigeli V yaratanze, gutanga kwe bikurikirwa n’amahari yabaye hagati ya Benzinge n’Abahindiro bapfa aho umugogo we uzatabarizwa.

Benzinge yarabanje ahihibikanira ko atatabarizwa mu Rwanda ahubwo ashaka ko ajyanwa i Fátima muri Portugal, ku buryo byafashe amezi, amahari yarabaye amahari, biza kurangira umugogo ugeze no mu manza, ubutabera bwa Amerika bwinjira muri icyo kibazo bwanzura ko uzatabarizwa mu Rwanda.

Muri ayo mahari menshi, Benzinge yari akikijwe n’umugabo waje guhinduka umusangirangendo we, Bushayija, ari na we mu gisa no kwikuraho ikimwaro yahise atangaza nk’umwami.

Mu ibaruwa yanditse no mu mashusho yashyizwe kuri Facebook, Benzinge yatangaje ko Bushayija ariwe wagizwe umwami ndetse na nyir’ubwite inkuru yamugezeho ari mu nzira ava i New York.

Bushayija yahise afata izina rya Yuhi VI Bushayija, gusa imigirire ye nk’umwami iratangaje kuko nta gihugu atwara ahubwo ubu ayoborwa n’Umwamikazi Elisabeth II kuko ari umuturage w’u Bwongereza.

Mu miterere y’ingoma ya cyami, ntibibaho ko umwami ayoborwa n’undi mwami cyangwa se umwamikazi, keretse gusa iyo igihugu kiyoborwa n’umwami w’abami. Ntabwo kandi byigeze bibaho ko umwami ajya mu gikoni ngo abe yakwiha amata mu cyansi. Ubwo icyo gihe abagaragu baba bamaze iki? Ni amahano masa!

Usibye no kwiha amata, umwami ntiyabaga azi umubare w’ishyo ry’inka atunze, gusa yajyaga azinyuramo arambagira. Ni n’amahano kandi kubona umwami ufite ubwenegihugu bubiri.

Uburyo uyu muhango wo kwimika Bushayija wagenze ntibisanzwe mu mateka. Ukwimikwa kwe kwatangarijwe muri Video yashyizwe Facebook, [ubwo wasanga ari ukubera iterambere], na we abimenyeshwa mu butumwa bugufi kuri telefone.

Bushayija wafashe izina rya Yuhi V Bushayija atuye mu Bwongereza kuva mu 2000 ni mwene Bushayija Théoneste mwene Yuhi V Musinga, wavukiye mu Rwanda mu 1960.

Kugeza ubu, ni umwami utagira igihugu, ufite ubwenegihugu bubiri kuko abarwa nk’umuturage w’u Bwongereza. Kuba mu Bwongereza, igihugu kiyoborwa n’Umwamikazi bituma Bushayija yiharira uduhigo twinshi tubonwa nk’urwenya kuri bamwe. Tekereza umwami uyoborwa n’umwamikazi, ujya mu gikoni, akiha amata yo kunywa, akajya no mu kabari n’ibindi.

Mu mateka y’u Bwongereza, Bushayija ni we wa mbere wiswe umwami kuva mu 1936 nyuma y’urupfu rwa George VI mu 1936. Yavutse mu Ugushyingo 1960, akurira muri Uganda aho yacuruzaga ibinyobwa bya Pepsi mbere yo kujya muri Kenya no mu Bwongereza mu 2000.

Umwami ushaka ubutumire mu muhango w’ibwami

Mu Cyumweru gishize, igikomangoma cy’u Bwongereza, Harry, cyatangaje ko mu 2018 kizashyingiranwa n’Umunyamerika, Meghan Markle; ni nyuma yaho Umwamikazi Elizabeth wa II abahaye umugisha bombi akabemerera kubana nk’umugore n’umugabo.

Mu mateka ntaho byigeze biba ko umwami nk’umuntu wubashywe asaba kwitabira umuhango runaka ahubwo ubutumire yabuhabwaga rugikubita, mbese na mbere y’uko batekereza kuzatumira abandi we yabaga yaramaze kumenyekanishwa ko azitabira.

Bushayija mu kiganiro yagiranye n’ikinyamakuru The Times cyo mu Bwongereza, yavuze ko yifuza kuba yahabwa ubutumire bwo kwitabira ubu bukwe, gusa ashidikanya ko bizamushobokera ati “birashoboka ko bazaba bafite abashyitsi benshi”.

Iki kinyamakuru cyamuganirije ari mu gikoni cye mu rugo atuyemo mu Mujyi wa Manchester. Yavuze ko akunda cyane Umwamikazi w’u Bwongereza, ati “Ndi umufana ukomeye w’Umwamikazi w’u Bwongereza. Ngomba kuba ari njye njyenyine w’umuturage we ariko w’umwami.”

Uyu mugabo abana na Lilian, umugore we w’imyaka 49 akaba afite akazi ko kwita ku barwayi bo mu mutwe muri ako gace. Bafitanye abana batatu barimo abahungu babiri, umwe wiga Civil Engineering n’undi wiga ikoranabuhanga mu gihe uw’umukobwa aherutse gushyingirwa.

Ubusanzwe umwami yatorwaga n’undi umubanjirije, ntagire uwo abibwira n’uwo yatoye ntabimubwire ahubwo akabibwira umwiru mukuru bikaba igihango cy’uko atazagira uwo abibwira kuko yizeraga ko icyo gihango cyamwica.

Nyuma ngo iyo undi yatangaga mbere yo kumutabariza, wa mwiru yavugaga amazina y’umwami mushya gusa ngo ibyo byose Kigeli V Ndahindurwa yasize atabikoze, atavuze uzamusimbura.

Iyo byabagaho ko umwami atanga atavuze uzamusimbura, abakuru b’umuryango n’abandi b’inararibonye bo mu gihugu barateranaga kugira ngo abana b’umwami batarwanira ubwami akaba aribo batora umwami mushya.

Pasiteri Ezra Mpyisi wabaye Umujyanama wa Kigeli V yigeze kubwira IGIHE ati “Uriya yashyizweho n’umuntu umwe, umwami w’umuntu umwe murabona ari umwami nyabaki? […] Uha agaciro ikigira aho gikomoka. Ntaho bikomoka kwimikwa kwe. None se wowe umuntu umwe yakwimika umwami koko? Ko ari umuntu umwe wimitse umwami bakaba ari babiri gusa, urumva se bitazabakomerera?”

Kuva inkuru ya Bushayija yamenyekana ikurikiye itanga rya Kigeli V Ndahindurwa, benshi bashimangiye ko ari umwami wa Benzinge ku giti cye nk’umuntu wamwimitse.

Bashayija kuva mu 2000, aba mu Bwongereza ngo akunda cyane Umwamikazi Elizabeth II
Bushayija asangira inzoga n'inshuti
Aha yari mu gikoni cye, yihereza amata.Ni mu gihe kera umwami yabaga atazi aho igikoni kiba ahubwo agemurirwa n'abaja


Kwamamaza

ANDIKA ICYO UTEKEREZA KURI IYI NKURU

Izina

Email


IBITEKEREZO

ANDI MAKURU

2009 - 2017 ©. All rights reserved