Ibintu buri mugore aba yifuza gukorerwa n’umugabo we

2 11-01-2018 - saa 16:32, Mukaneza M.Ange

Kimwe mu bibazo ingo nyinshi zihura na byo ni ukutamenya icyo umugore yifuza ku mugabo we, ugasanga nubwo iteka wowe uba uziko wakoze iyo bwabaga ngo umushimishe ntabwo ubigezeho. Nyamara iyo buri umwe azi icyo mugenzi we amwifuzaho, bituma barushaho kubaho mu munezero.

Nk’uko buri mugabo aba afite icyo yifuza ku mugore we, ni nako n’undi hari ibintu by’ingenzi aba yumva yahora amukorera ariko ntabimubwire kuko aba yumva agomba kubyibwiriza cyangwa se akabura n’aho abihera.

Uretse kuba ibi bintu bikurikira byafasha urugo rwanyu kurushaho kubana neza, ni ngombwa ko buri mugabo amenya ko uko afashe umugore we byereka abahungu be agaciro umugore akwiye guhabwa, ndetse bigaha abakobwa be ishusho y’uko abagabo babo bazitwara.

Kumuganiriza ntacyo umukinze

Nk’uko mu buzima bwa buri munsi, kuganira no guhanahana amakuru ari ingenzi cyane kubera uruhare bigira mu mibanire myiza y’abatuye isi, ni na ko bimeze hagati y’abashakanye.
Nubwo ashobora kutabikubwira, burya buri mugore wese aba yifuza ko umugabo we afata umwanya uhagije bakaganira, ndetse akirinda kugira amabanga amukinga.

Amagambo umubwire ni yo atuma arushaho kukugirira icyizere cyangwa se kigatakara. Irinde ibishobora kukurangaza byose nka telefoni cyangwa televiziyo, kuganira ubihe umwanya wa mbere kuko bizatuma atuza, akumva akunzwe ndetse yubashywe.

Kurindwa

Ugomba kuba wa mugabo uba uwa mbere mu guhoza umugore we igihe agize ikibazo, aho kuba utuma ahorana amarira, intimba n’agahinda.

Ihe gahunda yo gukora ibishoboka byose ku buryo igihe muri kumwe yumva afite umutekano usesuye, nta kintu na kimwe kimuteye ubwoba. Wirinde ko umutuzo awubona igihe udahari.

Gira ishyaka ryo kurwanirira umuryango wawe ndetse igihe ucitse intege wiyambaze Imana kugira ngo ikongerere imbaraga.

Umwanya wawe

Urubuga Patheos rwandika ku bintu bitandukanye birimo n’imibanire rugaragaza ko umwanya uha uwo mwashakanye ugira uruhare runini mu gutuma wubaka cyangwa usenya.

Niba wifuza gushimisha umugore wawe, muhe umwanya uhagije, wirinde kumwereka ko afite agaciro gake ugereranyije n’akazi kawe, cyangwa ibindi biguhuza igihe ukavuyemo.

Nibyo koko ugomba gukora ngo mutere imbere, ariko wibyitwaza ngo ube kure y’uwo mwashakanye. Ikindi kandi n’igihe uri mu rugo habe koko, wirinde kurangazwa na mudasobwa yawe, televiziyo cyangwa ikindi cyatuma utita ku muryango wawe.

Mwiteho nk’uko byari bimeze ukimubenguka

Nk’uko bigenda kuri bimwe mu bigo by’ubucuruzi bitanga serivisi nziza bigitangira, ariko abakiliya bamara kuba benshi bagatangira kubafata uko biboneye, hari bamwe mu bagabo usanga bafata abagore babo neza bakimara gushyingiranwa gusa, uko imyaka ishira ugasanga kumwitaho bigenda bigabanuka.

Nubwo utabizi ariko bibabaza umugore wawe cyane kuko icyo aba yifuza ari ukubona no kwiyumvamo ko ukimukunda nk’uko byari bimeze mu minsi ya mbere ukimubenguka.

Guhabwa umwanya wa mbere

Niba wifuza ko umugore wawe abaho yishimye kandi ari wowe biturutseho, haranira ko iteka yumva ko aza ku mwanya wa mbere mu buzima bwawe kuko ari cyo akwifuzaho.

Wituma yumva ko hari abandi akurwanira na bo ngo umwereke ko iteka uhora witeguye gutandukana na we igihe hari icyaba kitagenze uko ubyifuza.

Muhe ibyawe byose wumva ko ari byiza, aho kumuha ibyasizwe n’abandi, kuko uretse gutuma arushaho kugira umutima ukeye, na we bizahindura uburyo wabagaho ndetse n’urugo rwanyu rurusheho kubaho mu munezero.

Kwamamaza
Kwamamaza

Izindi nkuru wasoma

Kwamamaza

TANGA IGITEKEREZO

AMATEGEKO AGENGA IYANDIKA RY'IGITEKEREZO CYAWE

1
Imela 2018-01-12 00:26:11

@Kamana, ese kuri wowe nta kosa umugabo agira, byose bituruka ku bagore? Nta mugore muzima ubaho se, nyamara akagira umugabo ukeneye kugirwa izo nama? Umugabo ni ugirwa inama

2
Kamana Alain 2018-01-11 09:19:55

Ibi mwanditse ni ukuri kandi ni nako byahoze .
Umugore akwiye gukundwa no kurindwa , ni inshingano z`umugabo wese wiyemeje gushinga urugo.

Gusa rero, abagore b ubu ngo bari mu buringanire . Cyakora njye mbona bicuramye ! Arashaka gukundwa ariko akanaba ingare !
Arashaka kurindwa , ariko akanategeka (muri make , murinde kandi umugaragire nk`umugaragu mwiza , apana umugabo)....
Ngaho guca inyuma (ibi kera byari iby`abagabo akenshi. Ubu abagore nabo barakataje . rero mama ngo ni uburinganire ! )

Umunsi abagore basubiye kuba abagore ! Nta mpamvu yo kubwiriza abagabo icyo gukora izaba igihari. Ariko ibintu nibikomeza mu cyerekezo birimo ubu ... ahubwo mwitege akazaza (no matter the amount of preaching comes along) !

Kwamamaza