Ubushakashatsi bwakozwe na Kaminuza ya Cincinnati iherereye muri Leta ya Ohio, imwe mu zigize Leta Zunze Ubumwe za Amerika, bwagaragaje ko uburyo ababyeyi bitwara ku bana babo bigira uruhare runini mu kuba bacura umugambi wo kwiyahura ndetse bakawushyira mu bikorwa.

Ubu bushakashatsi bwashyizwe ahagaragara ku wa kabiri mu nama y’Ishyirahamwe ry’Abanyamerika bakora mu buvuzi rusange yabereye i Atlanta.

Bwakozwe nyuma y’uko byagiye bigaragara ko umubare w’abana bageze mu gihe cy’ubugimbi biyambura ubuzima muri Amerika ugenda wiyongera cyane.

Keith King uyobora ishami ryo guteza imbere ubuzima bwiza n’uburezi muri Kaminuza ya Cincinnati yavuze abana baba bifuza kumenya ko hari umuntu runaka ubashyigikiye, ariko ikibazo gikomeye kikaba ari uko benshi muri bo batamubona.

King na mugenzi we Rebecca Vidourek bakoze ubushakashatsi bwabo bifashishije ibyagaragajwe mu ibarura ryakorewe muri Amerika mu 2012, ryibanze cyane ku ruhare rw’ababyeyi mu kuba abana bafite kuva ku myaka 12 kuzamura batekereza kwiyahura.

Nk’uko AFP dukesha iyi nkuru yabyanditse, aba bashakashatsi basanze abana bagirwaho ingaruka nyinshi n’imyatwarire y’ababyeyi ari abafite hagati y’imyaka 12-13.

Byagagaraye ko abana batajya bumva na rimwe ababyeyi babashima cyangwa bababwira ko batewe ishema nabo, bafite ibyago byo gutekereza kwiyahura byikubye inshuro eshanu ugereranyije n’abandi.

Aba bana kandi basanze bafite ibyago byo gutegura umugambi wo kwiyahura no kugerageza kubishyira mu bikorwa, inshuro zirindwi ugereranyije na bagenzi babo bafite ababyeyi baba hafi uko bikwiye.

Ibi kandi ni nako bimeze kubana bafite hagati y’imyaka 16-17 bafite ababyeyi batabahora hafi.

Abashakashatsi King na Vidourek kandi bavuze ko umuti ari uko ababyeyi bagerageza kuba hafi y’abana babo, iteka bakabereka ko babishimiye kuko uretse kuba bibarinda gutekereza kwiyahura ngo ni n’intwaro ikomeye mu kurwanya ingeso zirimo kunywa ibiyobyabwenge no kwishora mu mibonano mpuzabitsina bakiri bato.

Raporo y’Ikigo cya Amerika gishinzwe kurwanya no gukumira ibyorezo yashyizwe ahagaragara mu ntangiriro z’uyu mwaka yagaragaje ko kuva mu 2007-2015, kwiyahura byikubye kabiri mu bakobwa, mu gihe mu bahungu byageze kuri 30%.

Abahanga mu bijyanye n’imyitwarire ya muntu bagaragaza ko mu bindi bishobora gutuma umuntu atekereza kwiyahura harimo kwiheba bikabije, uburwayi bwo mu mutwe, ibitekerezo bitandukanye abona ku mbuga nkoranyambaga, kubuzwa amahwemo na bagenzi be, ndetse n’ibibazo birebana n’amafaranga.


Kwamamaza

ANDIKA ICYO UTEKEREZA KURI IYI NKURU

Izina

Email


IBITEKEREZO

ANDI MAKURU

2009 - 2017 ©. All rights reserved