Pasiteri Antoine Rutayisire yanditse igitabo yise ‘Kubaka Urugo Rwiza’ cy’inyigisho zitegura abitegura kubaka urugo rwa gikirisitu.

Iki gitabo cy’amapaji 68 cyibanda ahanini ku byo abifuza gushyingirwa bagombye kumenya n’uko bagombye kwitwara mu gihe babana kugira ngo babane neza mu munezero.

Kigizwe n’amasomo icyenda agaruka ku kubwira abitegura gushakana ko bagomba kumenyana neza mbere yo gusezerana; kumva ko mu gihe urugo rushinzwe bagomba gusabana no kumenya uko bakemura amakimbirane yavuka; kumenya gucunga neza umutungo w’urugo; gushimangira urukundo nyuma yo gushakana ndetse no gukora icyerekezo cy’urugo rwiza n’izindi nyigisho zirimo izerekana ko gushaka bitagarukira ku mibonano mpuzabitsina.

Pasiteri Rutayisire avuga muri iki gitabo ko umugambi wo kucyandika wavuye mu kwitegereza uburyo ingo zisenyuka no kumva akababaro k’abantu benshi cyane cyane abakiri bato bakunze kwibaza icyo bakora kugira ngo bubake urugo rwiza.

Mu nama agira abifuza kurushinga, agaruka ahanini ku gushimangira ko urugo ari umushinga w’Imana, akibutsa ko nk’uko nta muntu usa n’undi bityo nta n’urugo rusa n’urundi ko kubaka urugo ari nko kugura igitambaro ukajya kudodesha umwambaro wawe ukidoderamo ugukwira kandi ukunogeye ukwawe.

Buri ngingo yose gikomojeho kiyivuga mu buryo bwagutse, hatangwa ingero ndetse ku musozo wa buri nyigisho umwanditsi akagufasha kumenya neza ibyo wagombye gusigarana nk’inama.

Icyo Rutayisire avuga ku mibonano mpuzabitsina

Imibonano mpuzabitsina ni imwe mu ngingo abantu benshi badakunze kuvugaho rumwe; aha Rutayisire nawe ayikomozaho muri iki gitabo; akavuga ko ari kimwe mu bintu bikoreshwa nabi ku isi, kandi ko iteshwa agaciro mu buryo bunyuranye.

Yanditse ko Imana yaremye imibonano mpuzabitsina nk’ikintu cy’agaciro kenshi cyane ndetse Pawulo we avuga ko urukundo rw’umugabo n’umugore rushushanya imibanire ya Kristo n’Itorero rye kandi ko ntacyo Imana yaremye ari kibi.

Avuga ari “Imibonano mpuzabitsina ntabwo ari yo igize kubaka urugo, nta nubwo ari yo irugira rwiza; ni agace gato cyane mu bituma ruba rwiza.” Yongeraho ko imibonano mpuzabitsina ari ikintu Imana yahaye abantu ngo bakinezerwe ariko batarenze umupaka.

Dr. Rutayisire agaragaza ko Imana yaremeye imibonano mpuzabitsina kugira ngo abantu bayinezerwe. Avuga ko kwigisha ku by’imibonano mpuzabitsina atari ibintu by’ibipagani ahubwo ko ari ikimenyetso cyo kuba umunyamubiri

Kuri iyi ngingo ashimangira ko Imana yaremye imibonano mpuzabitsina nk’inzira yo kororoka kw’abantu, nka bumwe mu buryo bwo kurinda abantu icyaha cy’ubusambanyi.

Anagira inama abashakanye ko imibonano mpuzabitsina igomba gukorwa neza, byaba mu gutegurana, kugera ku ndunduro, kandi buri wese akamenya ko hari itandukaniro riri hagati y’umugabo n’umugore mu kwishimira imibonano mpuzabitsina n’ibindi.

Iki gitabo cyanditse mu Kinyarwanda kiri mu byifashishwa cyane n’Ihuriro ry’Abagabo bubatse ingo mu buryo bwa gikirisitu (Fathers’ Union) rya Remera rishamikiye ku Itorero ry’Abangilikani mu Rwanda.

Iri huriro ryavutse mu 2007 muri Paruwase ya Remera rifite abanyamuryango barenga 270, rifitanye isano n’irya Mothers’ Union ryo rigizwe n’abagore.

Ni ihuriro ry’abagore biyemeje kugaragaza uruhare rwabo mu kubaka umuryango mwiza bahereye iwabo mu ngo. Bafatira urugero kuri Petero wo muri Bibiliya wari intumwa ya Yesu/Yezu, bityo bakifuza ko imibereho yabo babaho nka we mu kubaka ingo zabo.

Mu ngendo bakora, batanga iki gitabo nk’impano ngo kijye gifasha abasore n’inkumi bifuza gushinga urugo kugendera ku mahame agikubiyemo, bityo bakubaka ingo nziza.

Mu ntangiriro z’Ukwakira 2017, iri huriro ryabitangiye mu Itorero ry’Abangilikani bo mu Murenge wa Matimba, Akarere ka Nyagatare. Muri icyo gice cy’Uburasirazuba havugwayo amakimbirane mu ngo ateza ibibazo by’ubuharike, gusenyuka kw’ingo, kujya mu biyobyabwenge no kubicuruza, kubura kirera ku bana n’ibindi.

Abakirisitu bagaragaza ko izo nyigisho bahabwa mu kubaka ingo ari ngombwa mu kugera ku rugo rwiza, bahamya ko ruba ari umugambi w’Imana.

Penina Kayitesi Rutayisire, umugore wa Pasiteri Dr. Antoine Rutayisire(Ibumoso), atanga igitabo cy'umugabo we ngo kijye cyigishwa mu kubaka ingo
James Kazubwenge, Umuyobozi wa Fathers' Union muri EAR Paruwasi ya Remera ari kumwe na Alex Serubuga (Uwambaye indorerwamo), Umuyobozi wa Fathers' Union muri EAR Diyosezi ya Kigali
Ihuriro ry’Abagabo bubatse ingo mu buryo bwa gikirisitu (Fathers’ Union) biyemeje kujya bakangurira abandi kubaka ingo nziza
Abakirisitu b'i Matimba bakanguriwe gushikama ku nama zo kubaka ingo zizira amakimbirane


Kwamamaza

ANDIKA ICYO UTEKEREZA KURI IYI NKURU

Izina

Email


IBITEKEREZO

ANDI MAKURU

2009 - 2017 ©. All rights reserved