IGIHE

Danny Vumbi yahishuye byinshi ku rukundo rwe n’umugore bamaranye imyaka 15

6 9-07-2019 - saa 21:04, Uwiduhaye Theos

Semivumbi Daniel wamamaye mu muziki nka Danny Vumbi, yavuze byinshi ku muryango we na Jeannette Muhawenimana, yitsa ku ipfundo riziritseho urukundo rwabo rumaze imyaka 19.

Danny Vumbi w’imyaka 41 ni umwe mu bahanzi bakomeye mu Rwanda, by’umwihariko ari mu bafite urugo rukomeye uhereye kubigaragarira amaso. Danny Vumbi na Muhawenimana bafitanye abana 2 b’abahungu; Henry Jayz Ineza na David Ihirwe.

Danny Vumbi yahoze ari umwe mu bagize itsinda rya The Brothers, aza kurivamo mu 2011 atangira gukora umuziki ku giti cye ndetse ari mu bahanzi bafite ubuhanga bwihariye kandi bakora ibihangano birimo ubutumwa bufasha benshi.

Uretse kuba umuhanzi, ni n’umwanditsi ukomeye w’indirimbo kuko benshi mu bahanzi bakomeye mu Rwanda bamwitabaza kugira ngo bakore indirimbo zifite icyanga.

IGIHE yaganiriye na we ku rukundo rwe na Muhawenimana n’andi mabanga y’urugo ye atazwi na benshi.

IGIHE: Bakunze kuvuga ko ingo z’ibyamamare zikunze kutamara kabiri. Nawe ni ko ubibona?

Danny Vumbi: Nibyo. Ikintu kiba ku Isi yose twirirwa tureba ntabwo nagihakana n’ubwo nta bushakatsi nakoze njye nka Danny Vumbi, ariko hari abagiye babukora. Twirirwa tubona ingo nyinshi zisenyuka, na hano iwacu mu Rwanda tubona abantu bazwi babana ariko ukajya kumva ngo nyuma y’amezi atatu, atandatu cyangwa umwaka se, batandukanye.

Ntabwo biba byoroshye kubana n’umuhanzi, keretse nawe uri we kubera ko abahanzi baba mu Isi yabo, kuko producer aguhaye gahunda ya saa munani z’ijoro urayubahiriza.

Urumva niba ufite umugore ukagenda izo saha ntabwo byoroha. Nko mu minsi ishize byambayeho nari mfite indirimbo ngomba kurangiza kandi ngomba kuyiririmbira abantu mu gitondo nka saa yine ahantu kure, kandi yari itararangira; producer arambwira ati nubona akanya saa munani z’ijoro uze tuyirangize. Mbwira madamu nti ‘saa munani z’ijoro nibwo ndi bugende’, aransubiza ati ‘nta kibazo.’

Nk’ibyo hari udashobora kubyakira. Kuba muba mudahuje gahunda, ikindi kivugwa mu bahanzi urabona ibintu by’ibiyobyabwenge nk’amayoga, n’abafana bari mu bintu bituma ingo zitaramba cyane. Urugero wenda niba uri wa musitari w’umufana ufite abakobwa birirwa bakwandikira bakubwira ko bagukunda, hari umuntu udashobora kubyumva akavuga ati ‘ibyo aribyo byose ntabwo ari umuziki gusa’.

Hazamo ikintu cyo kumvikana n’uwo mubana no kuba muziranye, ni cyo cyatuma urugo rw’umuhanzi rwaramba rugakomera.

IGIHE:Wadusangiza ku rugendo rwawe n’umugore wawe mumaranye imyaka 15?

Danny Vumbi: Ntabwo tumaranye imyaka 15 gusa kuko twakundanye imyaka ine duhuriye muri Kaminuza, urumva imyaka 15 yo niyo tumaze nk’umugabo n’umugore.

Habayeho kumenyana bihagije no kwihanganirana ku tuntu tumwe na tumwe kuko nta muntu shyashya kuko ntabwo habura agatotsi mu mubano wanyu ariko mukakaganiraho mukakumva. Nicyo cyamfashije kuba maranye iyi myaka yose n’umugore wanjye.

Hari ubwo ushobora gufata icyemezo mugenzi wawe ntagishyigikire, ibyo rero bisaba kwigomwa ku ruhande rumwe, iyo bitayeho nibwo usanga byageze mu nshuti byakwanga mukitabaza inkiko kuko zo zitananirwa zikabatandukanya. Kumenya mugenzi wawe, kwihanganira mugenzi no kumwumva, nibyo byatuma urugo rukomera.

IGIHE: Dusangize uko wowe n’umugore wawe mwamenyanye!

Danny Vumbi: Twamenyaniye mu ngando z’abanyeshuri, njyewe nari ngiye mu mwaka wa kabiri we agiye kujya mu wa mbere. Turamenyana, turakundana, kuko nigaga imibare nawe ariyo yiga kuko nigaga mu mwaka uri hejuru akajya ambaza nkamusobanurira, bitavuze ko murusha imibare ahubwo ni uko nigaga mu mwaka wisumbuye uwe, ibyo atarasobanukirwa akabimbaza nkamusobanurira kugeza ndangije ndamutegereza nawe akirangiza duhita tubana.

IGIHE: Umunsi wa mbere muhura byagenze bite?

Danny Vumbi: Umunsi wa mbere duhura yari arimo atembera. Urumva ahantu habera ingando z’abanyeshuri akenshi haba hari udushyamba, yari arimo atembera mbona adashaka kwegera abantu, ndavuga nti ese uyu mwana uri gutembera wenyine uwamwegera, ndabikora ndamubaza nti ‘ese bite ko uri wenyine ati ndabikunda, nti ku buryo utaba uri kumwe n’abandi? Nawe arambwira ati ‘none wowe uje hano utari wenyine?’ Kandi nanjye koko natambutse ubona ari nk’aho ndi njyenyine turahura. Ni uko twahuye muri make ibintu birakomeza gutyo.

IGIHE: Umubwira bwa mbere ko ushaka ko mukundana hari hashize igihe kingana gute mumenyanye ?

Danny Vumbi: Duhura bwa mbere, twaraganiriye bisanzwe birakomeza amezi aba abiri, atatu… ndumva naramubwiye ko mukunda hashize amezi nk’umunani. Twabanaga bisanzwe nk’umuntu nshobora kubaza ikibazo akansubiz, nk’uwo twajyana kureba umupira mu kigo, ariko hagati aho abantu baratangiye kugenda bavuga ngo ‘aba bantu ni inshuti’, ariko ntawe urahingutsa ijambo ry’urukundo.

IGIHE : Umubwira ko umukunda wabikoze gute? Waramutunguye?

Danny Vumbi: Ibintu byo gutungurana rero mu nkundo ntabwo abantu babikora nko gutungurana kuko ushobora kubikora gutyo we akakubwira ko atagukunda. Ni umwanya ushaka wihariye ukegera uwo ukunda, ukamubwira uti ‘ndagukunda ndumva bishobotse wazambera umugore cyangwa se bishobotse wazambere umugabo’ bitewe n’uwo ubwira cyangwa n’ukubwira. Njye sinibuka neza isaha cyangwa umunsi cyangwa se uburyo nabivuzemo icyo nibuka ni uko nabimubwiye tumaranye icyo gihe tuziranye.

IGIHE: Yabyakiriye ate?

Danny Vumbi: Yarishimye na we ambwira ko ankunda kandi cyane, turakomeza.

IGIHE: Icyo gihe ntabwo wari uzwi mu kigo?

Danny Vumbi: Mu kigo bari banzi kuko nari naratangiye kuririmba, hari ibikorwa bimwe byabaga akagaragaza ibimenyetso by’urukundo. Hari ukuntu nabaga ndi kuririmba akanzanira indabo ku rubyiniro abantu bakabyishimira.

Hari indirimbo ya The Brothers yitwa ‘Ijambo Ryawe’, ndibuka ko nigeze kuyiririmba akanzanira indabo ku rubyiniro abantu bakishima cyane, abanyeshuri bakabifata nk’ikintu kidasanzwe kuko iyo ndirimbo yarayikundaga n’abandi banyeshuri benshi bayikunda mu kigo kuko ntabwo yari yagasohotse yari izwi n’abo muri KIE aho twigaga gusa.

Aho niho abantu batangiye kugenda bahwihwisa ko dukundana ariko nta kintu cyo gukundana cyari kiri hagati yanjye na we ariko urumva ko yishimiraga ibyo nkora.

IGIHE: Nta ndirimbo n’imwe kugeza ubu uramuhimbira cyangwa se ngo uyihimbe ariwe biturutseho ?

Danny Vumbi: Oya. Nta ndirimbo yihariye ndamukorera irebana n’urukundo rwacu cyangwa ubuzima bwe. Ntayo.

IGIHE: Kubera iki ?

Danny Vumbi: Urumva umugore wawe kuririmba ubuzima bwanyu bw’urukundo ntabwo bishobokera abahanzi bose, hari abahanzi badakunda kuririmba inkuru mpamo kandi nanjye ndimo.

IGIHE: Ugira gutya wibaruka umuhungu umwita Jay Z!

Danny Vumbi: Umuhungu wanjye ntabwo arinjye wamwise Jay Z ahubwo akivuka hari murumuna wanjye wabaga mu rugo hanyuma akimubona ahita asakuza aravuga ngo mwabyaye Jay Z, ndavuga nti Jay Z wuhe? ati wa wundi w’umuririmbyi, ati reba mu mafoto urebe ko adasa n’uyu mwana. Hanyuma ngiye kureba koko nsanga barasa n’ubwo wenda uko umuntu agenda akunda isura igenda ihinduka, ariko barasaga.

Uwo murumuna wanjye niwe wakomeje kugenda amwita Jay Z n’abandi bana bararimwita birangira ku ishuri bamwise gutyo, turavuga tuti ‘ibyo aribyo byose ubwo ari izina rimuzwiho reka turishyire no mu byangombwa.’

IGIHE: Hashize igihe kinini ufite abana babiri, ujya uteganya kuzabyara bangahe?

Danny Vumbi: Nteganya kubyara abana babiri gusa, nta wundi mwana nteganya. Ntabwo nabihamya neza ariko niko mbitekereza. Ikindi kubera ko abana babiri mfite bakuze, umutoya afite imyaka 11, mba numva kumukurikiza umwana w’ukwezi haba harimo intera ndende cyane ku buryo byaba ari ikibazo, mba numva kubyara undi mwana bitazapfa kubaho muri iyi minsi.

Danny Vumbi n'umugore we bafitanye abana babiri b'abahungu

IGIHE: Ntabwo uri mu batekereza kugira hungu na kobwa cyangwa ngo umugore abe yakubwira ngo mubyare undi mushaka umukobwa?

Danny Vumbi: Hari ikintu nabwira abantu, abateganya kubyara cyangwa se ababyaye. Umwana wese ni umwana, wagize amahirwe yo kubyara umwana wuzuye ufite amaso, amatwi, amaguru… ni umwana umeze neza, ntugahangayikishwe n’uko atavutse ari umukobwa cyangwa se umuhungu.

Ibyo ni ibibazo bikunze kuba mu miryango imwe n’imwe, hari n’ababisenyeraho ingo zabo ariko mba mbona ari ubujiji kuko umwana wese ni umwana kandi urubyaro rwose rutangwa n’Imana, hari n’abashakana ntibabyare.

Mba numva umuntu yakabaye yishimira umwana wese wavutse gusa iyo wabyaye ibitsina byombi aba ari umugisha ugize, ariko ntabwo biba bivuze ko ubyaye abakobwa gusa cyangwa abahungu uba utarabyaye, uba ufite abana. Icyo kibazo ntacyo nigeze ngira kuko kuva na kera nasengaga nsaba Imana umwana, ntabwo nigeze nyisaba umuhungu cyangwa umukobwa. Ubwo rero kuba mfite abana babiri ni ibyo nyishimira.

IGIHE: Mu muryango ntabwo abantu bajya bagusaba agakobwa?

Danny Vumbi: Abavuga amagambo ntabwo babura mu bijyanye n’ingo z’abantu, hari n’uza akavuga ati ariko mwagerageje mukabyara umukobwa. Umwereka ko icyo yavuze wacyumvise ariko ntabwo ucyitaho, ntabwo ugiha agaciro cyane.

IGIHE: Mu bahungu bawe hari uwari wagaragaza impano yo kuririmba?

Danny Vumbi: Impano barazifite abana banjye. Umuhungu wanjye ntabikunda ariko afite ijwi ryiza ryaririmba, hanyuma umukurikira azi kubyina cyane ugereranyije n’abandi bangana ndetse azi no gukina umupira w’amaguru ku buryo twamushyize no mu ishuri ryabyo hamwe abana baba bakina cyangwa se biga ibintu bijyanye n’umupira mu biruhuko. Ubu ari mu mashuri yisumbuye n’ubundi aba akina.

Ariko iyo ndebye mba mbona batabikunda cyane ahubwo bikundira amasomo, baba bibereye mu bintu by’ubuzima busanzwe. Nanjye nk’umubyeyi ntabwo nabahatira gukora ikintu badakunda.

IGIHE: Ntabwo ujya wicara nko mu rugo ngo wigishe abana gucuranga ?

Danny Vumbi: Gitari bavutse bayibona, bakura bayibona. Umwana rero ubona gitari ukabona ntacyo bimubwiye, ukagerageza no kuyimwigisha akakubwira ko ntabyo ashaka, ntabwo wabimuhatira.

IGIHE: Ni ikihe kintu utakundaga umugore wawe yagukundishije?

Danny Vumbi: Ibintu madamu wanjye yankundishije harimo kuganira cyane, ntabwo nabikundaga nari umuntu ugira make ariko kuba ndi kumwe na we akanganiriza cyane, byatumye nanjye nganira cyane bituma numva kubana n’umufasha ari byiza.

Ibindi yankundishije ni ugusenga. Numvaga ari ngombwa ariko atari ngombwa cyane, ariko buriya siyankundishije ibintu byinshi ra!?

IGIHE: Ni ibihe byo kurya yagukundishije?

Danny Vumbi: Nta biryo runaka mvuga ngo ndabikunda cyane kuruta ibindi, ibihari ndarya. Hari ibyo ntakunda cyane nk’ibijumba na we ntabwo yabashije kubinkundisha.

‘Ijambo ryawe’ indirimbo umugore wa Danny Vumbi yakundaga cyane

Danny Vumbi aherutse gushyira hanze iyo yise ‘Abana Babi’

Urugo rwa Danny Vumbi na Muhawenimana ruzira induru n'intugunda
Urugo rwa Danny Vumbi ruri mu ngo nke z'ibyamamare mu Rwanda zibanye mu mutuzo
Kwamamaza
Kwamamaza

Izindi nkuru wasoma

Kwamamaza

TANGA IGITEKEREZO

AMATEGEKO AGENGA IYANDIKA RY'IGITEKEREZO CYAWE

1
Nd 2019-07-10 23:34:26

Muravuga ngo Barasa Nonese Abasa Ntibasabirana (Nihitiraga da).😎😎😎

2
Joseph 2019-07-10 16:08:25

Ibyo Danny Vumbi yavuze nibyo peee; namenyanye na Danny ubwo nigaga ULK ariko muri weekend najyaga KIE gusura mushiki wanjye ubwo amasaha yo kuryama nkarara kwa Vumbi. nakunze cyanee ukuntu bakundanaga nkajya mvuga ngo nanjye ningira inshuti nzayikunda nkuko Danny akunda inshuti ye.
benshi cyane iyi couple twayigiyyeho byinshi cyanee; ikindi Danny ni umuhanga mukuvuga Imivugo iyo nakoreshaka event luri ULK yaramfashaga cyanee; mukomereze aho mwikundanire Imana ihire urugo rwanyu.

3
mmc 2019-07-10 03:18:25

Ahubwo se ko wagirango ni mushiki we. barasa pe.

4
Seka The Promoter 2019-07-10 01:29:11

Yabihishuye se ninde wamubwiye ko twabishakishaga!

5
Aly 2019-07-09 16:20:00

Harya ngo iyo abantu babanye cyane barasa, ndabona wagirango baravukana

6
Peter 2019-07-09 15:47:24

Uyu mutipe ariyubaha kbsa. Nakomereze aho afite gahunda

Kwamamaza