IGIHE

Imishinga ikomeye iteganywa, uko yakiniye ikipe y’igihugu n’ibindi: Ikiganiro cyihariye na Meya w’Umujyi wa Kigali

12 24-04-2019 - saa 11:08, Rabbi Malo Umucunguzi

Muri Gicurasi 2018 nibwo Rwakazina Marie Chantal yatangiye kuyobora Umujyi wa Kigali, asimbuye Nyamurinda Pascal weguye amaze iminsi 418 ihwanye n’umwaka umwe, ukwezi kumwe n’iminsi 25.

Nyuma y’igihe kigera hafi ku mwaka, Rwakazina w’imyaka 46 avuga ko intego Umujyi wa Kigali ufite hari intambwe imaze guterwa nubwo hari ibindi byinshi bikeneye gukorwa.

Mu kiganiro cyihariye yagiranye na IGIHE, yavuye imuzi ibikorwa n’imishinga ihanzwe amaso, anagaruka ku buzima bwe bwite nk’umuyobozi, umugore n’umubyeyi.

Ikiganiro kirambuye yagiranye na IGIHE

IGIHE: Mu mezi umaze uyobora Umujyi wa Kigali ni iki wagezeho?

Rwakazina: Ni byo koko tariki 25 Gicurasi 2019 nzaba nujuje umwaka ntorewe kuyobora Umujyi wa Kigali. Umujyi wa Kigali ni umujyi uteye imbere, mu cyivugo tuvuga ko Umujyi wa Kigali ugomba kurangwa n’isuku n’umutekano, hanyuma abakozi bawukorera n’abayobozi bawo bakagira umurimo unoze kandi wihuse.

Muri ibyo bice byose dufite intambwe ishimishije tumaze kugeraho ariko nanone urebye aho dushaka kujya haracyari intambwe ndende yo gutera, haracyari byinshi yo gukora, twe nk’abayobozi n’abakozi b’Umujyi wa Kigali, ariko n’abawutuye muri rusange.

IGIHE: Ni iki wabonye gishya ugereranyije n’inshingano warimo mbere ?

Rwakazina: Inshingano twarimo mbere zari inshingano na zo dushima, dukunze, ariko zari inshingano zitaduhuza n’abaturage ku buryo buhoraho. Nakoreraga Ikigo cy’Umuryango w’Abibumbye cy’Iterambere ry’Abaturage (UNDP), twari mu bikorwa by’iterambere ry’abaturage ariko twabikoraga ku buryo wenda bunyuze ku bikorwa bya leta, ku bayobozi, kugira ngo ibikorwa dutera inkunga bigere ku baturage.

Ubu rero inshingano zarahindutse kuko ibyo nkora n’ibyemezo mfata ni ibigira ingaruka ku muturage mu buryo bwihuse, nta wundi muntu unyuzemo.

IGIHE: Hari gahunda y’isukura mu Mujyi wa Kigali izajya ihuriza hamwe amazi mabi. Igeze he?

Rwakazina: Ni umushinga munini ufite ibyiciro bitandukanye, icyiciro cya mbere nicyo cyanatangiye WASAC yaboneye ingengo y’imari. Icyicaro cy’aho hantu hazajya hasukurirwa ayo mazi mabi ni Nyabugogo hafi yo ku Giti cy’Inyoni, amazi mabi azasukurwa hazibandwa ku nzu nini z’ubucuruzi n’izikorerwamo ibindi mu Mujyi wa Kigali rwagati no ku Muhima.

Inzira iracyari ndende, hari ikindi cyiciro kizasukura amazi yo ku rundi ruhande rw’umujyi guhera za Kacyiru kugenda ugana mu Burasirazuba, naho icyo cyiciro kizahuza amazi ava ku nzu nini. Biragaragara rero ko amazi ava mu miryango yanjye nawe yo bishoboka ko tuzakomeza tuyavoma tukayatwara aho asukurirwa, ariko nabyo WASAC yabitekerejeho ikaba iteganya ahantu i Masaka mbere y’uko uyu mwaka urangira.

IGIHE : Gahunda yo kuvugurura imyubakire y’akajagari uyu munsi ihagaze ite?

Rwakazina: Igishushanyo mbonera kimaze imyaka itanu gishyirwa mu bikorwa kuva mu 2013, hari intambwe nziza imaze guterwa ariko nanone nyuma y’iyo myaka itanu twabonye ko hakirimo imbogamizi, aho twashakaga kugera ntiturahagera neza.

Hari imbogamizi zabaye, hari abantu bagituye mu kajagari batitabiriye gutura muri ya gahunda inoze, ibyo nibyo rero byatumye habaho ivugurura ry’igishushanyo mbonera ryatangiye umwaka ushize ariko duteganya kurangiza muri uku kwa gatanu.

Mbahaye isura y’imiturire mibi, dufite ahantu hanini muri Kigali hatuwe neza cyane cyane ahagiye haturwa mu gihe cya vuba, ariko Kigali ya kera iracyarimo akajagari.

Iyo tubibaze mu mibare y’imiryango n’ubwoko bw’imiturire yayo, dusanga hafi 70% y’imiryango yo mu Mujyi wa Kigali ituye nabi. Ariko bitavuze wenda ko aho batuye ariho hanini, aho batuye niho hato ariko imiryango myinshi yo mu mujyi niyo ituye nabi.

IGIHE: Gutuza neza iyo miryango byo bihagaze ite?

Rwakazina Gahunda zo gukemura ibi bibazo ziteye mu buryo butandukanye ugereranyije na bya byiciro. Ba bantu batuye nabi hatari mu manegeka, icyo umuntu akora ni ugushakisha inzira muri baba bantu batuye bacucitse kugira abahatuye bashobore kubona serivisi zaba umuriro, amazi ndetse n’ibikorwa remezo byo kubona imbangukiragutabara iyo umuntu yarwaye.

Ibyo rero bijyana no guca imihanda, ariko nyuma yo guca imihanda umuntu ntakomeza atuye inzu imwe ireba hirya indi isigaye ireba hino, umuntu akangurira abo bantu bahatuye kugira icyo bongera ku gaciro k’inzu batuyemo.

Abatuye nabi bandi bo mu manegeka no mu bishanga, abo bo bagomba kuvamo barengera ubuzima bwabo n’ibyo bidukikije ngo tubungabunge ubuzima bw’umujyi.

IGIHE:Abagomba kwimuka bose hamwe bangana iki?

Rwakazina: Uyu mwaka icyo twibanzeho ni ukubamenya ngo ese ubundi abo bantu tuvuga bangana bate uretse kubabona tukumva ko batuye nabi? Twasanze hari imiryango myinshi ituye mu manegeka hafi ibihumbi 13, abatuye mu bishanga barenga 7000, ni ukuvuga ngo tubifashe muri rusange dufite nk’imiryango irenga ibihumbi 20 mu Mujyi wa Kigali ituye nabi.

Gahunda yo gutuza abantu neza tuyihuza na gahunda y’imiturire ikoresha neza ubutaka. Tugaruke hahandi mu kajagari turimo dukora imihanda ariko hakiri utuzu tutajyanye n’iyo mihanda turiho dukora.

Turahamagarira abashoramari ngo baze bumvikane n’abo bantu batuye muri ibyo bice, agaciro k’inyubako bahafite bagashyire mu nyubako bashobora kububakira ariko bakoresheje neza ubutaka, zizamutse, hanyuma bwa butaka busagutse wa mushoramari abe yabukoresha ikindi.

Rwakazina Marie Chantal yavuye imuzi imishinga iteganywa mu Mujyi wa Kigali

IGIHE : Hari ikibazo cy’abaturage ba Kangondo (Bannyahe) batishimiye uko bagiye kwimurwa n’umushoramari muri ubwo buryo. Kuki ikibazo cyageze aho bitabaza inkiko?

Rwakazina: Kubimura byo nta n’ikibazo gihari iyo uganiriye na bariya baturage ba Kangondo, kuba hariya bagomba kuhimuka ntabwo bikiri ikibazo. Ikibazo ni ukuvuga ngo turahimuka bigenze bite? Twe nka leta abaturage ba Kangondo ntabwo dushaka kubaha amafaranga ngo tubirukane ngo mugende ntabwo tubashaka mu Mujyi wa Kigali, turabemera nk’amaboko y’umujyi.

Gutanga amafaranga abantu bakagenda, bashobora kujya muri ya manegeka bakajya kuduteza ibibazo byo kubirukaho no kubasenyera aho bubatse nabi, gahunda ni uko iteye ni icyo kibazo cy’imyumvire ni cyo mbona.

Batubwira ko ari ingo 1000, ntabwo ariko bose badashaka iriya gahunda. Ejo bundi hari inzu zimwe zizaba zirangiye, tuzasaba ababyifuza n’abiteguye bazijyemo, turizera ko abadashaka kuzijyamo batazakomeza ari wa mubare, hari abazabona bagenzi babo bagiye bakumva ko kuhatura bishoboka.

Twashyize imbaraga mu gukomeza kuganira na bo, tukabereka ko gahunda ihari atari iyo kubakandamiza cyangwa kubirukana mu mujyi cyangwa kubakenesha, ntabwo gahunda y’igihugu n’iy’Umujyi wa Kigali ari iyo gukenesha abantu.

Twizeye ko iyi gahunda bazayitabira kuko nta mahitamo manini dufite. Mu kuvugurura igishushanyo mbonera, tubara ko mu cyerekezo 2050 Umujyi wa Kigali ushobora kuba ugize nk’abaturage miliyoni enye. […] Ariko dukomeje tugatura uko dutura uku, waturwa gusa na miliyoni imwe, ubwo twaba dufite miliyoni eshatu zisaguka zitazaba zigira aho zituye.

IGIHE: Mufite icyizere ko ziriya nzu hari abazahita bazijyamo?

Rwakazina: Yego, Yego barahari.

IGIHE: Hari gahunda yo kugira ibice bitandukanye byo kuruhukiramo muri Kigali. Uyu munsi ihagaze ite?

Rwakazina: Iyo urebye igishushanyo mbonera, nta hantu na hamwe mu midugudu kitateganyije ahantu nubwo haba na hato, abaturage bajya bahurira, batunganya mu bushobozi bwabo, abana bakahakinira, ariko sinakubwira intambara ziba zihari mu Mujyi wa Kigali abantu bashaka kuhubaka cyangwa kuhashyira ibindi bintu.

Igitekerezo cya mbere cyaje ni ahantu hari ibishanga. Mu gice cya Nyandungu ahazasigara amazi niho hato, hafite ibice nka bitatu bizaba birimo ahantu abantu baruhukira. Ahandi twanatangiye no gutunganya ariko twanabaye dutegereje gato kubera ikibazo cyo kwimura abantu ni mu gice cy’inganda i Gikondo ndetse hari n’agace ka mbere twatunganyije.

Hari n’ibindi bice dufite nka rond-point yo kwa Minisitiri w’Intebe abantu bakorera siporo iruhande ariko nayo turifuza ko itunganywa mo imbere hagakoreshwa, ibyo bikorwa bya siporo bikahakorerwa ariko abantu banaharuhukira. Ahandi rero dufite hateganyirijwe icyo gikorwa n’ibindi by’ubucuruzi, ni muri Car Free Zone.

IGIHE: Gahunda yo gutunganya Car Free Zone igeze he?

Rwakazina: Car Free Zone gahunda ntabwo yari uko hakomeza nk’uko hari, yari uko hatezwa imbere hakabyazwa umusaruro kurushaho, abantu bakaba baharukukira, hakaba n’igice abanyamujyi baruhukiramo bakahafata ifunguro, icyo kunywa, bakicara bakaganira.

Car Free Zone imeze neza yasabaga ibintu nka bitatu, ko tuvugurura ibikorwa remezo byari bihari, umuhanda ntukomeze kuba iriya kaburimbo dufite wenda tugashyiraho n’amapave, inkengero zaho hagaterwa ibiti, ba bantu bicaye baganira bugamamo, hakaba za kiosk nziza atari nk’imitaka tubona, zisa, umuntu aza agafatamo akantu ameze neza.

Igice cya kabiri cyari icyo kuvuga ngo ba bantu bazatanga izo serivisi, twabashyiriyeho ibikorwa remezo ariko hari umuntu uzaza kuhakorera, aho niho abikorera baza. Icya gatatu ni ibikorwa remezo biri hirya ya Car Free Zone, niba ari ahantu hazajya habera nk’imikino runaka, abantu bakeneye aho za bus zizajya zibageza, zikabururutsa, bakabona kuza.

Mbere hari hifujwe ngo ariko uwabikorera icyarimwe dusanga ingengo y’imari itabitwemerera. Birasaba ko nabyo tubikora mu byiciro, ariko bitavuze ngo kimwe tugitekereze ari uko icya mbere tukirangije. Umwaka utaha mu kwa Karindwi, turashaka gukora icyiciro cya mbere cyo kunoza ibikora remezo byo hagati muri Car Free Zone.

Uko tubitangira kubishyira mu bikorwa, ugatangira kubihamagarira n’abikorera, ba bandi bazahatangira serivisi na bo bakitegura, niba ari amasoko bagapiganwa kugira ngo igihe ibikorwa remezo bya ngombwa tumaze kubigezamo, na bo bazahite batangira.

Hanyuma hagati aho tube dukoresha uburyo buhari muri bya bikorwa remezo byo ku ruhande, hanyuma umwaka ukurikiyeho, noneho dukore bya bikorwa remezo bifasha inyuma ya Car Free Zone, bizajya bifasha abantu kwitabira.

Igishushanyo mbonera cya Car Free Zone ni uku cyari cyatekerejwe mbere

IGIHE :Hari imihanda imaze iminsi yagurwa, hari n’imishya yubatswe. Mubona bizakemura ikibazo cy’umubyigano w’imodoka?

Rwakazina: Umubyigano w’imodoka ufite impamvu eshatu, iya mbere ni iy’imihanda mito cyangwa itanahagije, icya kabiri ni amasangano y’imihanda. Dufite ahantu henshi amasangano y’imihanda mato ugasanga imodoka ntizibisikana neza.

Icya gatatu ni uko Abanyakigali bagura imodoka nyinshi cyane, ugasanga hari ingo mu Mujyi wa Kigali usangamo imodoka ebyiri, eshatu, umugabo, umugore n’umwana mukuru na we afite imodoka.

Ariko ibyo ikibitera ntabwo ari ingeso mbi cyangwa gushaka gupfusha ubusa amafaranga, ni ukubera ko itwara ry’abantu mu buryo bwa rusange muri za bus rigifite ibibazo.

Icyo umujyi ukora rero ni ugukemura ibyo bibazo mu kwagura imihanda, kwagura amasangano ndetse muri gahunda yo kwitegura inama ya CHOGM y‘ibihugu bivuga Icyongereza, hari amasangano tuzagura kugira ngo imodoka zijye zishobora guhana inzira neza.

Ikindi ni ukunoza uburyo bw’imitwarire y’abantu mu buryo bwa rusange muri za bus mu Mujyi wa Kigali. Icyo ntiriwe mvuga ni udushya duteganywa nk’uburyo budasanzwe dutekereza bwo gutwara abantu benshi.

Haratekerezwa imodoka ntoya zigendera ku nsinga z’amashanyarazi, haratekerezwa uburyo bwihuse bwo gutwara abantu cyane cyane abazaba bava ku Kibuga Mpuzamahanga cy’Indege cya Bugesera ku buryo bwa rusange ariko bafite n’inzira zabo z’umwihariko.

Ikindi ni uko nitumara kunoza uburyo bw’imitwarire y’abantu mu buryo bwa rusange, hazabaho no kuvuga ngo abantu ko dufite bus nziza abantu bishimiye, uwajya aziha umwanya zikabanza kugenda mu masaha runaka, mu masaha yo kujya no kuva ku kazi.

Hashize iminsi imihanda myinshi y'Umujyi wa Kigali iri kuvugururwa

IGIHE: Hari igice giteganye City Tower kimaze igihe kitubakwa kandi kiri mu marembo y’umujyi. Ikibazo cyabaye ikihe?

Rwakazina: Hano tuhita muri Projet Amarembo, habaye ikibazo cy’imikorere n’imikoranire no kwemera gukorera hamwe nabyo bikiri mu bintu Abanyarwanda n’Abanyakigali tugomba guhinduramo imyitwarire n’imitekerereze.

Umuntu aracyashaka kubaka akantu ke ku butaka bwe, kandi ya gahunda yo gukoresha neza ubutaka iradusaba ko n’aho tuhahindura. Ikintu cyawe ntikibe icyawe kubera ko gishinzwe hasi, gishobora kuba icyawe kubera ko ari apartment ku rwego rwa kabiri cyangwa rwa gatatu. Ariko iyo mitekerereze iracyatera ikibazo.

Ukabona abantu batatu bafite amafaranga, bafite ubutaka bufite n’agaciro, ariko urababwira uti ’muzane igishushanyo kimwe, kirabahendukira kukizanira hamwe, kubaka birabahendukira bubakiye hamwe, hanyuma buri wese agire imigabane muri iyi nzu’. Uko bigaragara rero nibyo byatwaye umwanya, ariko ejo tubifatanyije n’Ikigo cy’Igihugu cy’Iterambere, RDB, twabonye baduha icyizere.”

IGIHE : Mu nzego z’ibanze abagore bakunze kuba ba Visi Meya n’indi myanya, ariko wowe uyobora Umujyi wa Kigali. Iyi ntambwe uyibona ute?

Rwakazina: Abadamu cyangwa igitsina gore kigize 50 ku ijana karenga y’abaturage b’Umujyi wa Kigali. Ni ibintu ubundi bisanzwe ko uwo mubare wakagombye no kugaragarira no mu bahagararira abo baturage. Tugira amahirwe rero mu Rwanda ko icyo cyumvikanye, ko uretse umubare w’abagore bagize abaturage b’igihugu, abagore na bo bafite n’ubushobozi bazana nk’inkunga, nk’abakozi b’igihugu.

Hari imyanya imwe nka ba Meya n’abanyamabanga Nshingwabikorwa b’imirenge aho usanga umubare w’abagore ukiri muto. Ibyo rero njyewe mvuga ko ari ibintu bishoboka guhinduka kuko kuba naratorewe kuba Meya w’Umujyi wa Kigali ntabwo mbifata nk’igitangaza, ni muri iyo gahunda yo kongera ubushobozi n’icyizere abadamu bigirira.

Ahubwo babandi icyo cyizere batarakigira cyangwa bagifite ukwitinya, bahera kuri twe bakareba uko twitwaye, uko dukora nuko twemera izi nshingano tukazikora, bakabona ko ari ibintu bishoboka.

IGIHE: Mu buto bwawe wigeze utekereza ko umunsi umwe uzayobora Umujyi wa Kigali?

Rwakazina: Naba mbeshye mvuze ko natekereje kuba Meya w’Umujyi wa Kigali, ariko numvaga inshingano zose z’ubuyobozi nabona nkunze, nshoboye zo muri iki gihugu, nazifata kuko icyo nari nariyemeje ni ukugikorera.

IGIHE: Ni iki cyahindutse umaze gutorerwa uyu mwanya?

Rwakazina: Iyo umaze kugera mu nshingano nshya hari ikintu kigomba guhinduka. Ntabwo uhinduka ariko uburyo ukora bwo burahinduka, niba wari usanzwe ufite akazi gafite amasaha abaze ukora kuva mu gitondo kugeza 5:00 ukaza noneho gukorera umuturage ugomba kukubona no guhabwa serivisi cyangwa ubufasha ku isaha iyo ariyo yose y’umunsi, urumva hari ikintu gihinduka.

Bisaba rero uhindure na we uburyo wakoraga n’uburyo witwaraga n’uburyo wabonekaga, kugira ngo ushobore kunoza neza inshingano zijyanye n’umurimo mushya.

Itandukaniro ubu ni uko binsaba kuboneka amasaha menshi, hanyuma bikansaba ngo uburyo nakoreshaga umwanya mbutunganye mu bundi buryo. Wenda nkabyaza umusaruro umwanya muto ngira muri weekend kugira ngo nite ku muryango no ku zindi nshingano nk’umudamu.

IGIHE: Iterambere ry’ikoranabuhanga hari bamwe mu rubyiruko barikoresha nabi nk’abifotoza bambaye ubusa. Ni uruhe ruhare abakuru bagira mu kubihindura?

Rwakazina: Ikoranabuhanga, iterambere rihari ubu mu buryo bw’itumanaho, ubundi ni amahirwe atagira uko asa. Ahubwo urwo rubyiruko turukurikirana dute ngo ayo mahirwe ruyakoreshe mu byiza, bafate umwanya munini internet bayikoresha mu kumenya amakuru, akazi, amasomo meza n’ibindi byateza imbere igihugu n’Isi, aho kugira ngo bajye ku mashusho mabi no ku y’abambaye ubusa?

Ibyo ni uruhare rwacu nk’abantu bakuru rwo kubegera ngo ayo mahirwe meza tuyabereke, aho kugira ngo kubera ko bari bonyine, badafite ababareberera, bayakoreshe n’iryo terambere ry’ikoranabuhanga mu buryo bubi.

IGIHE: Ni iki ukunda gukora muri weekend?

Rwakazina: Iyo weekend igeze, icya mbere ni ukuba hamwe n’umuryango, ndi umubyeyi w’abana, abo bana bakeneye no kuganirizwa, gufungurirwa ya marembo tuvuga. Ikintu cya mbere ntekereza ni ukubona umwanya wo kuba ndi hafi n’umugabo n’abana, ngo tuganire kugira ngo menye ibyo bamazemo iminsi n’ibyo bapanga mu gihe kizaza.

Ikindi kintu nkora muri weekend ni ukuruhuka, kuruhuka kwanjye ntabwo ari ukuryama gusa, ahubwo no kumva umuziki no gukora siporo iyo binshobokeye.

IGIHE: Ni ubuhe bwoko bw’umuziki ukunda?

Rwakazina: [Aseka] Njyewe nkunda umuziki nyarwanda, uririmbwa n’Abanyarwanda, ubwoko ngira ngo buba butandukanye bihereye no ku bacuranzi, ngira ngo n’imyaka, nkunda umuzika nyarwanda w’abajene b’Abanyarwanda ariko n’abakuze ho gato.

IGIHE: Watubwira abahanzi nka batatu ukunda?

Rwakazina: Batatu ubwo si benshi? Reka mvuge ubu ugezweho nkunda, ni Buravan.

IGIHE : Buravan umukundira iki ?

Rwakazina: Namukundiye ko njyewe namumenye mu kanya gato, ntabwo yigeze agera aho ngo avuge ngo arimo ariga umuzika, yatangiriye ku rwego rwo hejuru anabona ibihembo ku rwego rw’Isi. Nabonye ko hirya no hino hashobora kuba hari urubyiruko rwihereranye impano, ariko nakunze ko yasohotse ari ku rwego rwo hejuru n’ibihembo yahawe byarabigaragaje.

IGIHE: Ujya ureba umupira?

Rwakazina: Eh… nta mwanya ngira wo kureba umupira. Kera nari umukinnyi wa Basketball ariko nta mwanya nkibigirira. Imipira myiza ya Basketball muri Amerika iba itinze kandi njye ntabwo ndi umuntu utinda ureba televiziyo, ayo masaha mba ndyamye.

IGIHE : Basketball wayikinnye ku ruhe rwego ?

Rwakazina: Nayikinnye ku rwego rukomeye. Mu bigo n’amashuri nizeho, nize muri Kaminuza y’u Rwanda i Butare, nari umukinnyi wa Kaminuza mu ikipe y’abakobwa icyo gihe, ariko icyo gihe muri za 1995-2000. Abenshi mu bo twakinanaga nibo bari bagize n’ikipe y’igihugu, ubwo nanjye rero nagize amahirwe yo kuba mu ikipe y’igihugu y’abakobwa y’icyo gihe, bakina Basketball.

IGIHE: Mu bana bawe hari uwagukurikije agakunda Basketball?

Rwakazina: Yego, Yego, barayikunda, umwana wanjye w’umuhungu mukuru arayikunda.

Isura nshya ya Car Free Zone ihanzwe amaso n'abatari bake
Umuhanda mushya utunguka Nyacyonga uvuye Gasanze watangiye gushyirwamo kaburimbo
Kwamamaza
Kwamamaza

Izindi nkuru wasoma

Kwamamaza

TANGA IGITEKEREZO

AMATEGEKO AGENGA IYANDIKA RY'IGITEKEREZO CYAWE

Paji: 1 | 2  

1
mironko patrice 2019-04-28 11:41:52

Madame Mayor,nakurikiye imigambi myiza ufitiye Umujyi ariko mu ikubitiro ry’iri vugururwa ry’Umujyi wa Kigali ndagusaba kuba wamaze gutunganya umuhanda n’irimbi bya Rusororo.Tubeshya abacu twagiye gushyingura ngo ntituzibagirwa ibyiza byabaranze ariko twagejejeyo bajanjanjaguritse kubera igisoro cy’ingirwa muhanda ubundi wazasubirayo ugasanga biriya byondo bubakisha ngo ni umucanga byararidukiye mugishugunda.Twese tuzapfa bityo rero nibiba ngombwa abagihumeka twikoreho twitegurire aho tuzajya kuko Gasabo ntiyigeze ibyitaho.Njye nemeye kubabimburira ngatanga 10,000frw.Mwe mwemeye angahe ngo ririya rimbi ribe iry’abanyamuryango ntituzongere kwishyura(urugero ni amashuri y’ababyeyi)!

2
mironko patrice 2019-04-28 04:44:12

Nimushyireho gahunda ihamye abifite bashaka gukora inyubako z’ubucuruzi n’utuganda tutangiza(boulangerie,petite brasserie,atelier de couture,supermarché,clinique,pharmacie)babonerwe ibibanza ahantu hatuwe na benshi hanyuma abari bahatuye bashakirwe ahandi ho gutura no guhinga hitaruye umujyi kugirango biteze imbere mu gihe mu mujyi rwagati bitwaga abanyabibazo.Ibice by’inganda biharirwe abashoramari bahanitse.Nizere ko igishushanyo mbonera cyateganyije izo facilities ahantu hose hatuwe

3
tuyizere fabrice 2019-04-28 00:24:50

Bwanaminisitiri wubutegetsi bwigihugu muturenganure abacuruzi mukarere karusizi
kubibazo dufite byabuze ubikemura
tumaze imyakaitatu baranze yuko dutora umuyobozi uduhagarariye munamajyanama yakarere, ese meya abona ntaco tumaze twateza akarere imbere kwatanatwegera? byibuze na feredi we yaratwegeraga ibibazo byishi dufite tubura ubituvugira nibwo tuja gucururiza muri congo naho duhurira nibibazo byishi. Kuberayuko twanze uwo aduhatira kuberinyungu ze nico tuzira?

4
gigi 2019-04-26 00:34:23

Mayor wacu arasubizanya ikinyabupfura nubuhanga, nta mugayo ariko yabyawe na MWARIMU ise yari mwalimu birumvikana ko atariguha abandi uburere nubumenyi ngo hanyuma Umukobwa we abibure, abajya barambagiza abayobozi bajye bita kutuntu twinshi kuko byose biba bifite icyo bitanga nkamakuru. Umwana wa Mwarimu, umwana wize Mw’Iseminari, Umuntu wabaye Umusirikare, Umuntu wize mu mashuri y’Ababikira. abantu bose mvuze usanga bafite qualites zihagije kugira ngo babe abayobozi beza ariko nanone nisegure ko atari ko bose baba abayobozi beza kuko exception ntizibura. Murakoze

5
Murinda 2019-04-25 15:16:45

Mayor rwose birabaje kubona umuhanda nka Sgeem -kimisange kuri pefa muri Kigali.

6
Michel 2019-04-25 06:04:54

Ibishanga nk’ahari parc industriel bazabihingemo indabo zo kohereza hanze(exportatiions),byaha akazi abantu benshi,bigatuma n’umugi usa neza

7
mayor 2019-04-25 03:27:39

ariko se twe Abaturage batuye mukagali ka Nyakabungo mumurenge wa Jali nta mazi , nta muriro , ntamashuri, nta poste de sante mbese twibaza niba dutuye mu rwanda rwa kigali bikaducanga. Nyabuna abagera i bukuru mutuvuganire. umwijima abacura barawitwaza bakatwiba

8
Gihozo 2019-04-24 14:56:26

Uyu muyobozi arasubizanya ubushishozi.natwe nukuri dukennye umuhanda hano Murambi Gatenga Nyanza ya Kicukiro.kandi uyu muhanda wagira umumaro wagabanya embouttillage ya Kicukiro Centre kuko imodoka zijya Nyanza cg se Nyamata bawifashisha cyane bakareka kuzengura kicukiro centre.muzadukorere ubuvugizi pe

9
Le Sage 2019-04-24 12:34:44

Mayor Chantal ni umuhanga cyane kandi agira ikinyabupfura. Nibatamuvangira azaba umuyobozi mwiza. Ibi ndabyizeye.

10
murerwa 2019-04-24 09:59:28

Mayor,bravo nkunda ukuntu usubizanya ubushishozi kandi ucisha bugufi biraboneka ko uri umuhanga rwose icyizere bakugiriye kirabaye ntibibeshye.Ndagukunda rwose

Paji: 1 | 2  

Kwamamaza