IGIHE

Ikiganiro cyihariye: Habineza ‘Joe’ yavuze ku rwibutso rwe muri politiki, ahishura byinshi nk’intebe yarazwe na Se

16 12-07-2019 - saa 09:26, Uwiduhaye Theos

Abanyarwanda benshi bamenye Joseph Habineza nka Minisitiri w’Urubyiruko, Umuco na Siporo, Ambasaderi w’u Rwanda muri Nigeria ndetse na rwiyemezamirimo nk’ukora makaroni zitwa ‘Pasta Joe’, ariko ubu ni umwe mu bayobozi mu rwego rw’abikorera, aho arajwe ishinga no kugeza ubwishingizi kuri buri murimo umuntu ashobora gukorera mu Rwanda.

Ibyo ariko ntibikuraho ko afite uburyo bwihariye abonamo ibintu nk’imyidagaduro yigeze kuba akuriye, nubwo adakunda kubigarukaho ngo yerekane aho ahagaze ku ngingo runaka.

Yinjiye muri politiki mu 2004 ubwo Perezida Paul Kagame yamugiriraga icyizere akamuha inshingano muri Guverinoma, ayobora Minisiteri y’Umuco na Siporo yamazemo imyaka hafi irindwi, aza kwegura mu 2011.

Mu kiganiro yagiranye na IGIHE, yavuze byinshi haba ku nshingano ze uyu munsi, ubuzima yanyuzemo, imirimo ye nk’umuyobozi wa Radiant Insurance Yacu. Ni ikiganiro twagiranye ku cyicaro cy’iki kigo gitanga ubwishingizi giherereye mu Mujyi wa Kigali.

IGIHE: Guhabwa akazi muri Radiant Insurance byaje gute ?

Habineza: Mbere na mbere hari Radiant Insurance Company isanzwe inamaze imyaka irindwi ikora, ariko noneho abashoramari muri iki kigo baravuze bati reka dushore imari mu kindi gishya kizajya gikora ibyo bita ‘micro insurance’, ni ukuvuga ubwishingiza buciriritse bugera kuri buri muntu wese.

Nibwo bashyizeho icyo kigo, rimwe numva barampamagaye mpabwa akazi gutyo.

IGIHE: Hari izindi nshigano wari ufite nka rwiyemezamirimo. Wazisigiye nde ?

Habineza: Burya uba ugomba guhindura. Ikindi urareba nyine iyo amahirwe aje ugakora ibintu bifitiye abantu benshi akamaro. Nari umucuruzi ku giti cyanjye ariko urumva ari ukugira ngo ukore ako kazi nakoraga no guha ubwishingizi abantu, ufatanye n’abandi banyarwanda mu kwisungana, biragufasha.

IGIHE: Dusubiye inyuma, abantu benshi bakumenye kubera Politiki. Amateka ya kiriya gihe n’ayubu ubihuza ute?

Habineza: Ibintu byose umuntu anyuramo bimubera isomo. Kirya gihe cyanyigishije ibintu byinshi, kuba umuntu yavugisha abantu benshi akabaha ubutumwa bukabageraho. Ukamenya ko hari abashobora kubifata n’abandi bakabafata nabi. Hari umuntu wigeze kumbwira ko politiki ari siyansi, kandi koko nibyo.

Kuba narabaye muri politiki buriya rwose ni nko gukorera impamyabumenyi y’ikirenga, umuntu aba yarize byinshi bigenda bikakugirira akamaro mu buzima buzaza.

IGIHE: Abantu bavuga kwinshi uburyo byagenze ujya kuba Minisitiri ubwo wakoraga muri Heineken. Ubundi byagenze bite?

Habineza: Mbese wagize ngo si kera! Sinjya nkunda kwirata inkovu z’imiringa kuko umuntu abandi nibo bamuvuga, gusa icyo nibuka ni uko nagiye muri politiki ntabyiteguye ariko ngezemo ndayikunda.

Nayijemo mvuye mu bindi bintu bitandukanye nayo cyane, muri 2004 muri Nzeri tariki 24. Ni ibihe numva byantunguye ariko byanguye neza.

IGIHE : Uracyabona umwanya wo gukurikirana siporo?

Habineza : Nk’umukunzi wayo ndacyayikora n’ubu nidutandukana, ndajya gukina Tennis yanjye, noneho gukirikirana imikino na mbere yaho narabikoraga, urumva ko byose tujyamo, ntabwo siporo nayitererana. Nyuma y’akazi uba ugomba gukora ikintu uhugiraho nyuma y’akazi.

IGIHE: Iyo urebye siporo nk’uwabaye Minisitiri muri kiriya gihe, ugereranyije n’aho igihe kigeze ubona ubu bimeze bite ?

Habineza: Nakubwira ko ntakurikirana siporo muri urwo rwego gusa iyo numva ukuntu amaradiyo ayivuga, nkumva ukuntu Azam ishyira amafaranga mu mupira w’amaguru nkumva uko BK (Banki ya Kigali) iyashyira muri basketball, numva ari ibyo kwishimira.

Ariko ibintu bigomba guhora bizamuka, bizanshimisha nitubona tugeze aho amakipe abasha kwitunga, ugasanga atangiye no gusora. Muri rusange bizagenda biza, biba byiza.

IGIHE: Turebye ku bikorwa remezo bya siporo, ubona byihuta ku kihe kigero ugereranyije n’uko wabitekerezaga ukiri Minisitiri?

Habineza: Nk’ubu, wenda sinzi ukuntu stade z’ahandi zimeze ariko iyo urebye ubona ari ibintu byiza cyane ariko nk’ubungubu iyo nciye kuri stade nkabona inyubako iri kubakwa izajya iberamo imikino y’imbere, ndishima. Harimo haberamo ibintu byinshi, erega u Rwanda ruri kwihuta mu iterambere!

Habineza Joseph yagarutse ku ngingo zitandukanye zirimo n'ubuzima bwe bwite

IGIHE: Utekereza iki ku ikipe y’igihugu Amavubi y’uyu munsi?

Habineza: [Aseka cyane] Icyo nta kintu nakivugaho.

IGIHE: Ujya ukurikirana sinema yo mu Rwanda ?

Habineza: Nasaga nk’utakibikurikira cyane ariko nk’ubu akazi ngiye gukora sinema ni ingirakamaro cyane. Njya ndeba nka tuno tuntu duca kuri Youtube nka Papa Sava, kariya kantu karanshimisha. Birerekana ko abantu bari kugenda bahanga udushya.

Biranshimisha kugira ngo umuntu abe yigisha abantu akoresha utuntu nka turiya. Numvise Umunyarwanda wahawe igihembo muri Burkina Faso [Joel Karekezi] na Nyakubahwa Perezida Paul Kagame ahari, birerekana ko ishyigikiwe. Sinema ni ikintu gikomeye cyane.

IGIHE: Hari umushinga wa filime waratangije ukiri Minisitiri, yari kugaragaramo Miss Aurore Kayibanda, Ramsey Nouah wo muri Nigeria, Kate Bashabe n’abandi. Waheze he?

Habineza: Ibyo byasigaye muri Minisiteri urabyumva, iyo Minisitiri avuyeho ntabwo ajyana ibitekerezo bye. Tuba twabikoze nk’ikipe, buriya muzabibaze abahasigaye.

Urumva Ramsey Nouah yashakaga ubufatanye bwo kugira ngo yamamaze u Rwanda. Agafatanya n’ibigo akagenda yamamaza ahantu nyaburanga mu Rwanda kugira ngo ba mukerarugendo bazarugane.

Na RDB yari irimo, hari igihe umuntu atangira ikintu akabona kitazagira umusaruro ukaba washaka ikindi kizihuta.

IGIHE: Ujya ukurikirana umuziki wo mu Rwanda?

Habineza: Umuziki wacu ndawukunda cyane. Nkura ingofero ku bacuranzi bacu. Iyo wumva nka ba Meddy cyangwa The Ben bajya gukorera indirimbo muri Nigeria, wumva ari ibintu byiza.

Kugira ngo barenge urwego rw’u Rwanda bagere hejuru, ibyo abo muri Tanzania cyangwa Nigeria bakora kuki twe tutabikora? Icya ngombwa ni ubushake.

IGIHE: Ukurikije uko umuziki wa Uganda, Kenya na Tanzania uhagaze, ubona u Rwanda ruhagaze rute?

Joe Habineza: Ibyo nibyo nakubwiye, ibyo ntabwo ari inshingano zanjye. Ubwo keretse ngiye kwicara umuntu akabagira inama, ariko abakeneye inama bazaze mbibabwire. Abahanzi bazane udushya bareke kwiganana cyane.

IGIHE: Muri iyi minsi ni iyihe ndirimbo ukunda kumva?

Habineza: Hari indirimbo namwe murayizi yitwa ‘Igisupusupu’ n’indi yashyize hanze ejo bundi, uriya niwo mwimerere, usanga akubita umuduri we ugasanga ni byiza. N’abandi ahubwo barebereho, Alain Muku dusanzwe tuziranye ariko kariya kantu yakoze [ko gufasha Nsengiyumva Francois wayiririmbye] ni keza.

IGIHE: Uyu munsi iyo witegereje urubyiruko nyuma y’amateka u Rwanda rwanyuzemo, ubona rugaragaza isura koko y’ahantu igihugu kigana no guhindura amateka?

Habineza: Nicyo kintu buri mubyeyi wese aba yifuza ko ataba mu byo we yabayemo, nta mubyeyi n’umwe wakwifuza ko umwana we aca mu byo twanyuzemo.

Ikindi kandi nacyo ndacyizeye kuko nzi ko gahunda ya leta ari ukugira ngo urubyiruko barutegure ejo hazaza, rero narwo ntabwo rukwiye kwirara, rukamenya ko ibiriho hari ababiruhiye, ikindi kintu cyiza ubu haje ikoranabuhanga.

IGIHE:Utekereza iki ku kwiyongera kw’ikoreshwa ry’ibiyobyabwenge mu rubyiruko?

Habineza: Icyo cyo kirababaje cyane kinantera ubwoba, hari abo njya mbona nkabona nabo atari bo. N’iyo wafata ikiyobyabwenge ayo masaha make wamara, iyo ashize usanga bya bibazo byiyongereye ahubwo. Ikindi ni ibigare. Hari abavuga ngo nta kazi, ariko ikoranbuhanga ryaraje.

Bareke ibiyobyabwenge kuko ni iraha ry’umunsi umwe ritamara kabiri, kandi icyo bamenya ni uko uko ubyimenyereza, kubireka birakugora.

IGIHE: Iyo ugiye ku mbuga nkoranyambaga ukabona nk’umunyarwandakazi yasakaje amafoto ye yambaye ubusa, icyo gikorwa ucyakira ute?

Habineza: Numva mbabaye. Ariko na none biterwa n’ubwo busa uko bungana. Hari uwo usanga yambaye umwenda wo kogana cyangwa ikabutura, yambaye mini, kubera iki njye nambara ikabutura? Ariko kuvuga ngo noneho yerekanye umubiri we wose, hari nabo njya numva ngo ni konti ye bwite (private account), kandi koko nibyo! No mu mategeko ntaho wamurega. None se wowe uba uyijyaho, ugiye kureba iki?

Bituma umuntu yibaza ibintu.

IGIHE: Muri iyi minsi hari abagore bavuga iby’ihohoterwa ryababayeho mu myaka myinshi yashize, uyu munsi akaba aribwo bavuga ibyabaye icyo gihe. Ubona biterwa n’iki?

Habineza: Kubona abantu babivuga nabyo birabaruhura. Ntabwo uziko abantu bagiye bagirira ibibazo muri Jenoside [gutanga ubuhamya] bibaruhura? Kera wumvaga utatinyuka kubivuga ariko ubu umuntu arabivuga byaba birimo no gukurikiranwa bikabaho. Na Leta yashyize imbere abagore. Ubishoboye wumva bikuruhura, bikore.

IGIHE: Ubona ute ukwihagararaho k’umuco nyarwanda muri iki gihe cy’ikoreshwa ry’imbuga nkoranyambaga?

Habineza: Nta kintu nabivugaho.

IGIHE : Hari abavuga ko kwifotoza wambaye ubusa cyangwa kwambara imyenda migufi bishobora gukurura ihohoterwa.

Habineza: Abanyarwanda bajye bambabarira. Ko uca kuri banki uragenda, ugahita, ufata amafaranga?

IGIHE: Hari ikintu wumva mu buzima wakoze neza cyangwa icyo ujya uvuga ‘uti uwasubiza ibihe inyuma nabikora mu bundi buryo’?

Habineza: Hari indirimbo ya Frank Sinatra yitwa ‘My Way’, aho abavuga ati ‘nabikoze mu buryo bwanjye’. Uko nabikoze ntabwo mbyicuza, sinshaka kubisubiramo ahubwo bimbera isomo ry’ibizaza. Numva ibyo nakoze byarabaye amasomo mu buzima bwanjye.

IGIHE: Ujya utekereza ku buzima bwawe umunsi wagiye mu kiruhuko cy’izabukuru ?

Habineza: Sinzi ko nzabishobora kuko nkunda gukora. Nzashaka ikindi kintu nkora kuko nkunda umurimo. Sinzareka siporo yanjye, umuziki wanjye nzawukunda n’abashaka ko mbagira inama nzabikomeza. Ntabwo njya ntekereza gusezera akazi kubera iza bukuru.

IGIHE: Week-end yawe iba imeze ite?

Habineza: Ku wa Gatanu njya gukina Tennis, nkaba ndi kuganira n’abantu aho, nkahava njya kureba Karaoke. Nyuma nkaca nk’ahantu hari umuziki nkumva.

Ku wa Gatandatu nicara mu rugo, saa tanu nkajya gukina Tennis, ku mugoroba nkaruhuka. Ku Cyumweru nkajya gusenga, nsengera mu rusengero rwa Eglise Presbytérienne. Sinakundaga kujyayo cyane ariko umusaza [Utumabahutu Jean, witabye Imana mu mwaka ushize] yansigiye misiyo y’uko ngomba kujya nicara ku ntebe ye, ubu buri cyumweru mba ndiyo.

Iyo mpavuye njya gusura mama, nava kumusura nkajya gukina Tennis, nkahava njya ahantu nganira n’abantu cyangwa tukajya i Nyamata ku mugoroba nkaruhuka.

IGIHE: Iyo ntebe nta wundi muntu ujya uyicaraho ?

Habineza: Nta wundi muntu wayicaraho, urumva uwo murage ntabwo wawukinisha.

IGIHE: Uwo murage uwakira ute ?

Habineza: Uramfasha kuko urupfu rwa Papa rwanyigishije byinshi kandi ibyo yansabye ngomba kubikora.

Yitabye Imana ku wa 15 Kanama 2018 twari twaganiriye ku wa 14 ambwira ati ujye ujya gusenga. Turi kumushyingura nibwo Pasiteri yambwiye ati ni wowe mukuru w’umuryango, iriya ntebe ntizajye ishoma. Njyewe rero nafashe icyemezo kandi iyo niyemeje ikintu ndagikora. Keretse wenda ntari mu Rwanda cyangwa se ntari i Kigali.

Kwamamaza
Kwamamaza

Izindi nkuru wasoma

Kwamamaza

TANGA IGITEKEREZO

AMATEGEKO AGENGA IYANDIKA RY'IGITEKEREZO CYAWE

Paji: 1 | 2  

1
Umunyarwandakazi 2019-07-16 18:13:03

Tekereza kujya mu rusengero ujyanywe no kwicara aho so yicaraga ni ukuri! Nk’aho wagiye gusenga, ukabikorera so n’abandi bantu ngo babone ko wubashye so! Ni akaga!!!!

2
Ndandambara Lena 2019-07-16 03:02:18

Joe,
Turagushima warakoze pe!
Nemera ko mu kazi dukora turiga. Twiga imikorere myiza, tukiga nuko abo dukorana bateye. Harubwo bitugora kuko aknshi kmenya abantu bitoroha! Haba abavugisha ukuri nkawe ukaba wabizira! Haba abatifuriza abandi amahoro, ishyari bakaba babadoderaho ibitarabye, hari nabandi bigira beza cyane bakambara uruhu rw’intama kandi ar’ibirura aliko bakagera kubyo bashaka byose kandi batabikoreye!
Icyo nemera nuko ntawe utakosa kuko turi abantu. Ikndi nuko mu Rwanda ababarirwa ari benshi kandi barakoze amakosa y’indengakamere!
Nzongeraho ubutaha!

3
darius kay 2019-07-16 01:11:52

Joe yeyote anaemjua anamkubali<ni genius kdi arasabana>!

4
umusomyi sarah 2019-07-15 06:56:31

Kuyicaraho ni byiza, ariko ajye ayicaraho asenga, ashima Imana, yihana kuko iyo ukunda iraha rishobora kugukururira mu cyaha, naho bibaye kuyicaraho gusa byaba bibaye guterekera.

5
Mahoro 2019-07-14 02:53:44

IBISUBIZO BYAWE NDABIKUNZE KDI NDAKUBASHYE. KOMEREZAHO UDUFASHE KUBAKA IGIHUGU KITAGENDERA KUMARANGAMUTIMA, AHUBWO KIGENDERA KUKURI NO GUKORA CYANE.

6
Mukiza 2019-07-13 06:31:45

Urubyiruko ruheruka morale Joe akiyoboye. Joe akwiye kuyobora urubyiruko rwose

7
Jabana 2019-07-13 05:42:50

Wapi iyo ntebe ntijye ishoma, ujye ujya gutanga icyacumi. Abo twitaga kera abaporoso bari bazi gukama ariko bisanze hari kabuhariwe ubarusha, ariya madini yadutse ayoborwa n’abanyamulenge bo no mwihembe bazi kurikonoza.

8
lg 2019-07-13 00:41:53

Abantu bakwiye kugira ikinyabupfura cyangwa bakajya, bakosorwa kuko dufite, inzego zibishoboye imbuga sizo gutukaniraho nibigambo byamafuti, iyo wise umuntu, escrocs uba umwise umujura uba ugomba gukurikiranwa hali, amategeko Habineza, numunyacyubahiro ni ambassadeur, ikndi aho yicara ayo batuye ibyakora ntawe ubishïnzwe abazi nyakwigandera bazi ibyo bavuga yabakoreye hariya simunzu ziwanyu abatukana ntibakwiye kwikingira imbuga ngo bumveko ho bataboneka ngo bisobanure *

9
Mujyanama 2019-07-12 12:10:20

Darren we? I Shinga ni mu Karere ka Nyanza, Umurenge wa Busoro, Akagali ka Masangano. Sinzi uwaharaye icyo yari agendereye, gusa ashobora kuba ari Nyarwaya Karuretwa ka Yuhi Mazimpaka, waharaye buri buke atera mu Birangirwa bya Ntaga/Burundi. Yaba yaraharaye rero ashishikajwe n’icyo gitero. Bibaho rero ariko babyandika nabi; ntabwo bavuga "Ntibindaje Ishinga" , bavuga "Ntibindaje i Shinga".

Ndacyashakisha ubusobanuro bwa nyabwo, nimbubona nzabushyira kuri uru rubuga rwa igihe.com. Urakoze.

10
mc.matatajado 2019-07-12 06:21:19

wow ndakwemera

Paji: 1 | 2  

Kwamamaza