IGIHE

Menya Graça Machel, wabaye umudamu w’abakuru b’ibihugu bibiri bitandukanye

0 23-08-2019 - saa 12:57, Iradukunda Serge

Graça Machel, ni umunyapolitiki wo muri Mozambique waciye agahigo ko kuba ari we mugore washatswe n’abakuru b’ibihugu bibiri batandukanye.

Graça ni umunyapolitiki umaze kubaka izina mu gihugu cye no ku mugabane wa Afurika dore ko yamaze igihe kirenga imyaka 10 ari Minisitiri w’uburezi n’umuco muri Mozambique, akaba yaranakoze nk’impuguke ku bibazo by’abana mu Muryango w’Abibumbye.

Ubusanzwe amazina yiswe n’ababyeyi ni Graça Simbine, nyuma yo kuvuka ku wa 17 Ukwakira 1945, Se amaze iminsi 17 yitabye Imana akaba ari umuhererezi mu bana batandatu.

Uyu mugore wari usanzwe yitwa Simbine yaje gufata izina rya Machel nyuma yo gushakana n’uwahoze ari umukuru w’igihugu cya Mozambique Samora Machel, ku wa 19 ukwakira 1975 nyuma y’amezi atatu uyu mugabo agejeje iki gihugu ku bwigenge.

Nyuma y’imyaka 11 bari bamaze babana nk’umugore n’umugabo, ku wa 19 Ukwakira mu 1986 Samora Machel yaje kwitaba Imana azize impanuka y’indege yabereye mu misozi ya Lebombo ku mupaka wa Mozambique na Afurika y’Epfo bituma Graça ahabwa akazina ka Jackie Kennedy wa Afurika.

Ibi byatewe n’uko Jackie Kennedy yari umugore w’uwahoze ari umukuru w’igihugu wa Leta zunze ubumwe za Amerika, bakaba bari bahuje ibyago byo gupfusha abagabo bakiri ku butegetsi.

Samola Machel yasigiye Graça abana babiri ari bo Josina na Malengane

Nyuma y’urupfu rwa Samora Machel, Graça yamaze imyaka itanu yambara imyenda yirabura nk’uburyo bwo kunamira umugabo we.

Mu 1998, mu birori by’ibanga Graça yashyingiranywe na Nelson Mandela wayoboye Afurika y’Epfo akaza kwitaba Imana mu 2013, bimugira umugore wa gatatu w’uyu mukambwe nyuma ya Evelyn Wase na Winnie Mandela anafata izina ‘Mandela’ guhera ubwo yitwa ‘Graca Machel Mandela’.

Ibitangazamakuru byagarutse cyane ku rukundo rwa Mandela na Graca Machel, kubera ikinyuranyo cy’imyaka cyarimo hagati yabo dore ko Mandela icyo gihe yari afite imyaka 80, Graça akagira 52.

Graça aganira n’ikinyamakuru The Guardian yavuze ko iki kinyuranyo ntacyo cyari kimutwaye.

Yagize ati “Ntago byari ikibazo. Nari nishimiye gushyingiranwa nawe, twari dukuze, dutuje kandi tuzi agaciro k’urushako n’umufasha”.

Ku wa 5 Ukuboza mu 2013 nibwo Nelson Mandela yitabye Imana, Graça apfakara kabiri.

Yasangije ikinyamakuru The Guardian iby’agahinda yatewe no gupfakara kabiri.

Yagize ati “Niba ushobora kwiyumvisha uburyo miliyoni z’abantu bafashe iki gihombo, ubwo ushobora kumva icyo bivuze kuri njye, kuhaba kwe, kuzuza buri gice cy’ubuzima bwanjye, buri gace k’ubuzima bwanjye arimo none ubu ni uburibwe, ubu icyo gice kirimo ubusa kandi kiri gushakisha, kugeza n’aho wishaka ubwawe. Wiyumva nk’aho nawe muri wowe hari icyahindutse kuko ibi ntibyakubaho ngo ugume uko wari umeze”.

Graça yabaye hafi ya Mandela no mu burwayi bwe kugeza yitabye Imana. Graça yagiye ahabwa ibihembo bitandukanye ku rwego rwa Afurika n’Isi muri rusange birimo nk’icyitwa World’s Children’s Prize yahawe muri 2005.

Graça Machel ni umunyapolitiki ufite amateka yihariye muri Afurika
Yashenguwe cyane n'urupfu rw'abagabo be babiri bombi babaye abakuru b'ibihugu
Kwamamaza
Kwamamaza

Izindi nkuru wasoma

Kwamamaza

TANGA IGITEKEREZO

AMATEGEKO AGENGA IYANDIKA RY'IGITEKEREZO CYAWE

Nta gitekerezo kirajyaho. Ba uwa mbere!  

Kwamamaza