IGIHE

Ibidasanzwe kuri Nyirakaragire, umuganga wa mbere w’ingagi ukomoka mu Rwanda (Amafoto & Video)

10 29-08-2019 - saa 10:32, Rabbi Malo Umucunguzi

Nyirakaragire Elisabeth ni umugore w’imyaka 56, akaba umwe mu bakomeje kugira uruhare mu gutuma umubare w’ingagi mu Rwanda wiyongera kubera ubuhanga bwe mu kuzivura, umurimo akoze imyaka myinshi kandi n’ubu akiwukomeje.

Ni umuganga muri Pariki y’Igihugu y’Ibirunga guhera mu 1987, ubu amaze imyaka 32 akorana n’ingagi umunsi ku munsi; kubera umuhate no gukunda akazi ke, ku myaka ye aterera ibirunga haba mu mvura n’imbeho, intego ari ukuramira ubuzima bw’ingagi ngo hato izi nyamaswa ziri mu zigeramiwe ku Isi zidacika, kandi bimaze kugaragara ko ari isoko ihamye ivubura amadevize mu Rwanda.

Yagize ati “Ubu mfite imyaka 56 ariko ndacyafite imbaraga kandi nkunda akazi kanjye ko gukora mu bidukikije.”

Nyirakaragire wavukiye mu gace k’ibirunga, yibuka ko mbere yo gutangira aka kazi, ubwo yari afite imyaka 12 yagiye gusura bene wabo babituriye, abona ingagi isa n’umusaza ubasuye, yihutira kubibwira sekuru wamusobanuriye ko icyo abonye ari ingagi.

Ati “Ikintu cya mbere cyanjemo naravuze nti ‘ninkura nzaba umwe mu itsinda ribungabunga ingagi. Icyifuzo cyanjye ubwo nari ndangije amashuri yisumbuye mu buvuzi bw’amatungo, nibuka ko hari mu 1987, kubera ko twari duturiye ibiro bya ORTPN (Office Rwandais de Tourisme et des Parcs Nationaux, kimwe mu bigo birindwi byabyaye RDB mu 2008), hari umwanya w’umuganga w’inyamaswa, nasabye akazi muri Gashyantare, guhera ku wa 15 Werurwe 1987 ntangira kuvura ingagi.”

Ni we wa mbere ukomoka mu Rwanda watangiye kuvura ingagi, yunganiraga umuganga wa mbere wakoze uyu murimo mu Rwanda, Dr. James Foster.

Ntabwo kari akazi koroshye, kuko yibuka ko ku munsi wa mbere yinjira muri Pariki yari kumwe n’abakozi bagenda baranga aho ingagi ziri, bazwi nka trackers.

Ati “Ntabwo byari byoroshye ku mukobwa muto kwinjira muri pariki, ndibuka ko ubwa mbere ndi imbere y’ingagi, zari izo muri ‘13 Group’ ubu uyu umuryango wahinduye izina witwa Agashya. Kubona ingagi ku munsi wa mbere, Haah, nari mfite ubwoba, ndibuka ko dusubiye ku biro nahise njya ku muyobozi wanjye ndamubwira nti ‘ntabwo nshoboye gukorana n’ingagi.’

“Nubwo ari akazi kagoye, kwinjira mu ishyamba, ubusanzwe kuva hagati ya Werurwe kugeza muri Gicurasi aba ari igihe cy’imvura nyinshi, ntabwo byari byoroshye, ndavuga nti ‘ntabwo nzasubirayo, nzajya mvura inyamaswa zisanzwe nk’inka n’amatungo yo mu rugo, ntabwo nabasha akazi gakomeye nka kariya.”

Icyo gihe ariko umuyobozi wa pariki yaramuhumurije, amwumvisha ko afite imbaraga n’ubushobozi bwo gukora ako kazi, bityo adakwiye gucika intege kuko ku zindi nshuro azamenyera kuvura ingagi.

Ni nako byagenze kuko yamenyereye akazi, ubu nyuma y’imyaka 32 avura ingagi, Nyirakaragire ni umugore wishimye kubera akazi ke n’uruhare kagira mu gutuma umubare w’ingagi wiyongera.

Iyo bagiye kuvura ingagi ni ukubanza kuyirasa ikinya bakayisinziriza kugira ngo idatera amahane, bakayivura mu buryo bwose bitewe n’ikibazo ifite. Iyo iri kumwe n’izindi na zo bisaba kuzisinziriza, kuko mu muco wazo zigira uburyo bwo gutabarana.

Nyirakaragire yagize ati “Nishimira kubona nk’urugero twaravuye ingagi nto y’ingabo, nyuma y’igihe nkabona ikomeje gukura, igize umuryango, nshimishwa cyane no kubona umubare w’ingagi ukomeje kwiyongera, ariko bikaba akarusho nk’iyo uvuye ingagi ukabona irakize neza.”

“Nibuka ingagi nto y’ingore twavuye, yari ifite ibimenyetso by’indwara z’ubuhumekero, ubu imaze kubyara abana batatu. Iyo mbonye abana b’iyo ngagi biranshimisha cyane nkavuga nti ‘uyu ni umusaruro w’akazi kanjye’, ni umusaruro w’uruhare rw’abaganga. Niteguye kandi nishimiye gukomeza gutanga umusanzu wanjye mu itsinda ririmo kubungabunga ingagi n’ibidukikije muri rusange.”

Iyo asura ingagi, Nyirakaragire kimwe n’abandi baganga agenda afotora, yitegereza ko nta ngagi yaba ifite ikibazo, hagira ikigaragaza ikavurwa. Yitegereza uko ingagi ikora ibintu binyuranye nko kurya, gukina n’izindi, imbaraga ifite n’ibindi, akagenda yandika.

Ubwo ku Cyumweru yasuraga umuryango w’ingagi w’Umubano, ugizwe n’ingagi 15, yabonyemo ingagi ifite igikomere kiri kuma, icyo gihe ngo nta mpungenge ziba zihari nubwo bitabuza ko abitangira raporo kuri buri muryango yasuye.

Avuga ko kugeza ubu ingagi nta bibazo bikomeye zikigira, kuko mu gihe kera habaga ibibazo byinshi bizibasira bituruka ku mitego ya ba rushimusi, ubu byakemutse ku buryo izi nyamaswa zifite umutekano uhagije.

Ati "Uko ndimo kugenda nkura, bigaragara ko ntagifite imbaraga nko mu ntangiriro, ariko ubwo natangiraga kuzamuka ibirunga, kubera igihe gishize namaze kubimenyera. Ngomba gukoresha imbaraga zanjye, ndabimenyereye, nkunda ingagi, mu mutwe byangiyemo ko ngomba kugera aho ingagi ziri, kuko nkunda gukorana nazo, ntabwo njya ninubira aho ingagi ziri uko haba kure hose, intego yanjye ni uko mba ngomba kuhagera.”

“Kandi kugeza ubu ku myaka 56 ndacyashobora kuzamuka mu gitondo, ubu urabona uko ndimo kugenda. Iyo ukunda ikintu, ufite umuhate, ugomba kugera ku ntego wiyemeje.”

Nubwo bisanzwe ko mu mategeko ko umuntu ajya mu kiruhuko cy’izabukuru ku myaka 65, Nyirakaragire avuga ko azakijyamo ku myaka 60.

Umurimo wa Nyirakaragire na bagenzi be watanze umusaruro, kuko ubushakashatsi bwashyizwe ahagaragara mu mwaka ushize bwerekanye ko imibare y’ingagi ziri mu birunga kugeza muri Kamena 2016 zari 604 zivuye kuri 480 zabaruwe mu 2010.

Imibare yashyizwe ahagaragara kandi ntirimo ingagi ziri mu ishyamba rya Bwindi muri Uganda kuko ho ubushakashatsi bugikorwa. Ibarura ryaho mu 2011 ryari ryerekanye ko harimo ingagi zigera kuri 400, bivuze ko ubu ingagi zibarurwa muri iki gice zirenga 1000.

Ubu bwiyongere ngo bushingiye ku mbaraga zashyizwe mu kubungabunga ingagi binyuze mu Kigo cy’Igihugu cy’Iterambere (RDB) n’uruhare rw’abaturage bamaze gusobanukirwa akamaro k’ibidukikije.

Nyirakaragire agenda yitegereza ingagi, akandika uburyo ayibona
Amaze imyaka 32 avura ingagi kandi ni umwuga akunda
Yitegereza ingagi, akanafotora kugira ngo asangize abandi uko zimeze
Nyirakaragire arimo kwandika ibimenyetso yabonye ku ngagi
Imwe mu ngagi zigize Umuryango w'Umubano
Buri ngagi igira uko itandukanye n'indi uyirebeye ku zuru
Kuvura ingagi ni ibintu akunda, ni umwuga akoze imyaka myinshi
Nyirakaragire ufite imyaka 56 azamuka ibirunga, akongera akabiminuka ajya kwita ku ngagi

Amafoto: Niyonzima Moses

Kwamamaza
Kwamamaza

Izindi nkuru wasoma

Kwamamaza

TANGA IGITEKEREZO

AMATEGEKO AGENGA IYANDIKA RY'IGITEKEREZO CYAWE

1
FRANK 2019-08-31 11:46:38

Kandi ubwo apfuye wasanga bamuhaye ibikombe n’imidari’ n’utamuzi azarara amumenye, uzasanga bahuruje n’abo mur’amerika n’uburayi ngo baze bashingure umubyeyi witangiye ingagi, maze binjize amadovize,

2
Vigilant 2019-08-30 05:54:28

Buri Ngagi igira uko itandukanye nindi uyirebeye ku Zuru.

3
Jeanne 2019-08-30 05:28:54

Biratangaje kubona Rdb itaramugenera igihembo na efforts yakoze en plus umugore koko.come on Clare Akamanzi na Bailyse muri he?

4
Ngabo 2019-08-29 16:31:38

yewe iyi nkuru imaze imyaka 2 ica kuri Canal . Uyu mubyeyi arakaze

5
Karl 2019-08-29 12:52:42

Yabyigiye hehe?

6
Ecolo 2019-08-29 11:45:01

Uyu mu mama RDB yagomye kumuha umudali wishimwe.

7
mn 2019-08-29 10:05:04

Muri iyi minsi mwandika byinshi ku ngagi zo mubirunga:
Ntangazwa no kuburamo n’interuro n’imwe ivuga Kumunyamerikakazi, waguye mu birunga mugihe yitaga ku ngagi.

8
Kalisa 2019-08-29 08:23:59

Akwiye kubishimirwa by’umwihariko.

9
Igitekerezo 2019-08-29 08:12:55

Arashimishije ariko ari kwerekeze mu izabukuru akwiriye kuba ari gukorana n’undi cg abandi bakiri bato ngo ejo bazamwakire nta cyuho kibonetse

10
umusomyi sarah 2019-08-29 07:15:22

Nyirakaragire arashimishije, gukunda igihugu n’ibigitatse ni byiza, ubu buzima yiberamo nibwo butuma adasaza kuko akora sport kandi akibanira n’inyamaswa nziza nibyo bimuha morale

Kwamamaza