IGIHE

Umwanditsi Ilibagiza yagarutse ku bihe yanyuzemo muri Jenoside no ku mabonekerwa y’i Kibeho

4 23-06-2019 - saa 16:19, Akayezu Jean de Dieu

Ilibagiza Immaculée ni umwanditsi w’Ibitabo ndetse n’inzobere mu gutanga ibiganiro mu ruhame byibanda ku mateka y’ibyabaye mu Rwanda birimo Jenoside yakorewe Abatutsi ndetse n’Amabonekerwa ya Bikira Mariya i Kibeho.

Ni umunyarwandakazi uvuka mu Mataba ku Kibuye mu Ntara y’Uburengerazuba ariko ufite ubwengegihugu bwa Leta Zunze Ubumwe za Amerika, aho kuri ubu atuye i New York n’umuryango we kuva mu 1998.

Uyu mubyeyi wavutse mu 1972, afite abana babiri, azwiho kuba yarahuye ndetse akagirana ibiganiro n’aba Papa babiri ba Kiliziya Gatolika. Yabonanye amaso ku maso ndetse aramukanya na Papa Benedigito wa XVI, anaherutse kubonana na Papa Francis i Roma.

Agira uruhare mu kuzana i Kibeho abanyamahanga bashaka kuhasura ngo bamenye amateka ajyanye n’amabonekerwa.

Yanditse ibitabo umunani birimo Left to Tell, Led by Faith, Our Lady of Kibeho, The Boy Who Met Jesus n’ibindi.

Igitabo cye Left To Tell cyasohotse mu 2006 cyakoze amateka akomeye cyane mu gusomwa mu bice bitandukanye ku Isi aho agaruka cyane ku mateka ye muri Jenoside yakorewe Abatutsi.

Yamaze amezi atatu yihishe mu bwiherero

Mu kiganiro na IGIHE, yavuze ko mu gihe cya Jenoside yakorewe Abatutsi, yari umunyeshuri muri Kaminuza Nkuru y’u Rwanda.

Ati “Jenoside itangira nari umunyeshuri muri kaminuza, ubwo twageragezaga kwihisha njye n’abandi bakobwa barindwi , twinjiye ahantu ku mupasiteri aduhisha mu bwiherero tumaramo amezi atatu.”

“Ikintu cyankoze ku mutima ariko cyane ni uko nasenze kuva mu gitondo kugeza mu masaha y’ijoro, amezi atatu yose ku buryo hagati aho nabonyemo ikintu cyo kuvuga ngo ubuzima ni buto icyampa ngakorera Imana, nkavuga nti ese Imana nitubaza icyo twayituye tuzayibwira iki ko yatugiriye Ubuntu?”

Yaje kurokoka Jenoside, ibintu avuga ko byamusigiye umukoro wo kwitura Imana yamurokoye, agakunda igihugu cye akanaharanira kucyubaka no kugiteza imbere uko ashoboye kose.

Ati “Nyuma ya Jenoside naje kubona akazi muri Loni hano mu Rwanda bigeze mu 1998, nimukira muri Leta Zunze Ubumwe za Amerika ari uko nshyingiranywe n’umuntu uturukayo. Ubwo nagendaga rero ndi mu ndege nasubije amaso inyuma ndavuga nti ndagiye ariko sinzibagirwa iwacu.”

Yakomeje agira ati "Navuga ko urukundo nkunda igihugu cyanjye ngenda mvuga hirya no hino aho mba ndi hose, rwashibutse mu byo nanyuzemo, uko narokowe n’umupasiteri binyuze mu Mubyeyi Bikira Mariya."

Izina rye, igihango na Bikira Mariya

Mbere ya Jenoside yakorewe Abatutsi, ababyeyi be bari abarimu kandi nawe yakuze akunda kwiga ari nayo mpamvu mu byo akomeje gushyigikira mu Rwanda uburezi buza imbere.

Uretse kuba bari abarezi, bari abakirisitu bihebeye Umubyeyi Bikira Mariya ku buryo urwibutso yibuka yahawe na Se ari ishapule ndetse yanamufashije cyane ubwo yari yihishe mu bwiherero muri Jenoside yakorewe Abatutsi.

Azi neza ibijyanye n’amabonekerwa yabereye i Kibeho ndetse yananditseho ibitabo bitandukanye.

Ati “I Kibeho ni ahantu hantuje cyane, ikintu papa yampaye dutandukana ni ishapure, ubwo rero navugaga ishapure kuva mu gitondo kugeza nijiro, Bikira Mariya yajyaga atubwira ngo muvuge ishapure muyivanye ku mutima ntacyo muzabura.”

Yakomeje agira ati “Bikira Mariya yankoreye ibintu bikomeye, nitwa Immaculée, papa yajyaga ambwira ko nakurikije Bikira Mariya ari nawe yanyitiriye, nawe rero [Bikira Mariya] aranyifatira arandera kuko niwe wandeze niko nabivuga.”

Kuri ubu akomeje kugenda hirya no hino muri Amerika asobanura amateka y’amabonekerwa yabereye mu Ishuri ry’Urwunge rw’Amashuri rwa Nyina wa Jambo i Kibeho [GS Mère du Verbe Kibeho] mu Karere ka Nyaruguru.

Iri shuri ryabereyemo amabonekerwa riherutse kubakirwa amacumbi yatwaye miliyari 1.5 Frw, binyuze mu baterankunga bazanywe na Ilibagiza.

Ilibagiza kandi yashinze umuryango ufasha abana b’imfubyi n’abakene aho ubishyurira amashuri ukanagira uruhare mu gufasha abafite uburwayi bwa ‘autisme’ mu Rwanda. Ibi abifatanya no kwamamaza ubutumwa bwa Bikira Mariya ahanini ku mabonekerwa ya Kibeho mu bice bitandukanye by’isi.

Aha Ilibagiza yari ari gushimira Umuryango wa Stirling wateye inkunga ibikorwa byo kubakira amacumbi ishuri ryabereyemo amabonekerwa i Kibeho
Ilibagiza akunze kuzana mu Rwanda abihayimana bagasobanurirwa amateka y'amabonekerwa ya Kibeho
Ilibagiza yahuye anaganira na Papa Francis
Ubwo Ilibagiza yahuraga na Papa Benedigito wa XVI
Ilibagiza ni umwe mu bagize uruhare kugira ngo abanyamerika babe bagiye kubaka i Kibeho Kiliziya yasabwe na Bikira Mariya
Kwamamaza
Kwamamaza

Izindi nkuru wasoma

Kwamamaza

TANGA IGITEKEREZO

AMATEGEKO AGENGA IYANDIKA RY'IGITEKEREZO CYAWE

1
Karera Emile 2019-06-24 07:22:08

Imana ikomeze ikongerere imigisha n’imbaraga zo kuyikorera kandi komeza ukunde igihugu cyawe kuko niyo ingobyi yaduhetse. Kandi ukomeze gushima Nyagasani nyirububasha KO utarokokeye ubusa wowe Ilibagiza

2
lg 2019-06-24 06:38:06

Iribagiza imana yari ikuzi kurusha abantu gusa ubwiza numutima wawe yaguhaye uzabyiturwe nayo yonyine, twe abantu tuzaguma kugusabira kuko ntakindi twakwitura imana ikomeze nanone, ikurinde *

3
abahindi 2019-06-24 03:37:16

Imana ikongerere imbaraga umubyeyi amenywe na benshi....

4
Muhinda muhozi 2019-06-23 15:17:17

Nibyiza umuntu wese ukora icyubaka urwanda cg uvuga urwanda aho ali hose agaterwa ishema no kubona irwanda hatekanye hateye imbere imana ijye imuha imigisha. Alko kndi nshimishwa no kubona imbere ya papa bikwiza kugeza kugeza mumutwe nkabadame baba islam.

Kwamamaza