IGIHE

Ubuzima bushaririye Miss Uwamahoro yabayemo mu Budage

4 31-05-2019 - saa 08:50, Uwiduhaye Theos

Dr. Uwamahoro Yvonne waserukiye igihugu mu irushanwa ry’ubwiza rya Miss Supranational mu 2011, yavuze uko yagiye kuba mu Budage akiri muto akiga mu buryo buruhije ndetse yapfusha ababyeyi bikaza kurushaho kuba bibi.

Dr. Uwamahoro akora akazi k’ubuganga, yize ubuvuzi ariko by’umwihariko yibanda cyane mu byerekeye kuvura amenyo abana mu Budage.

Uretse ibyo kuvura amenyo, Dr Uwamahoro ni we utoranya umukobwa userukira u Rwanda mu irushanwa rya Miss Supranational kuko ari we wabiherewe uburenganzira n’abategura irushanwa ku rwego rw’Isi.

Mu kiganiro yagiranye na Philly Yambo Makora yagaragaje byinshi ku buzima birimo uko yagiye mu Budage ubuzima bukamukomerera agahitamo kwiga kuvura amenyo kugira ngo ajye abona akanya ko gushabika.

Ati “Guhitamo kuba muganga w’amenyo ni ibintu byabaye uruhurirane […] njye nashakaga kwiga ubuganga kuko nifuzaga ikintu nakorera abantu cyangwa se cyerekeye ubuzima.”

Uyu mukobwa ubu ufite imyaka 33 avuga ko yageze mu Budage afite imyaka 19, akabanza gukubitika no guhura n’ubuzima bukomeye.

Ati “Icya mbere ni igihugu giteye ubwoba, kirimo indimi nyinshi zitandukanye, hari ibintu byinshi bishya kuri njye. Ku ntangiro byari ibintu bikomeye cyane.”

Akomeza avuga ko umuryango we wari uri kure bituma yisanga mu buzima buhenze cyane kuri we kuko kwishyura ishuri, kurya, gukodesha byose ari ibintu byakeneraga ubushobozi.

Ati “Iyo umuntu yihaye intego akanabiharanira nta kabuza abigeraho. Narwanye intambara nyinshi ku bwanjye. Uretse kuba nari ndi hano njye nyine no kwiga amasomo akomeye, nahuye na byinshi mu myigire yanjye, nabuze ababyeyi banjye; bwa mbere data abanza gupfa hashize iminsi na mama aragenda. Byansabye gufata akaruhuko kuko byari bimaze kuba byinshi ntanashobora kubyihanganira.”

Arakomeza ati “Nari mfite guhitamo kuba umunyantege nke nkemera ko natsinzwe cyangwa se kwishyiramo akanyabugabo nkakomeza urugendo. Nahisemo rero kuba umunyembaraga nirengagiza ibisitaza byose.”

Mu myemerere ya Uwamahoro avuga ko nta gihe na kimwe ubuzima buzigera bworoha ari nayo mpamvu nawe atigeze acika intege.

Yakomeje avuga ko kwitabira amarushanwa y’ubwiza atandukanye arimo Miss Wahl n’andi yagiye yitabira akegukana ikamba byatumye yitinyuka akiyubakamo icyizere.

Uwamahoro umwaka ushize yahawe ishimwe nk’Umunyarwandakazi wabaye indashyikirwa agakoresha neza ubumenyi yakuye mu mashuri mu Budage akaba ari umwe mu baganga bahagaze neza.

Iki gihembo Dr Yvonne Uwamahoro yagihawe nyuma y’ibindi yahawe mu Budage mu 2016 ndetse na 2017 nk’umwe mu Banyafurika wize akigeza ku rwego rushimishije. Mu mwaka wa 2017 nabwo yahawe icyitwa African Youth Education and Achievement Award.

Uwamahoro atuye ahitwa Mainz agakora akazi k’ubuganga mu Mujyi witwa Wiesbaden uhana imbibi n’agace atuyemo. Yize ubuvuzi rusange ariko yihugura cyane mu byerekeye kuvura amenyo abana.

Ubu arashakisha impamyabumenyi y’ikirenga [PhD] muri Kaminuza ya Cambridge mu Bwongereza.

Mu 2017, Dr Uwamahoro Yvonne yahembwe nk'umwe mu bakobwa bakomoka muri Afurika bahagaze neza nyuma yo kurangiza amasomo mu Budage
Dr Uwamahoro Yvonne niwe wahagarariye u Rwanda bwa mbere muri Miss Supranational
Dr Uwamahoro Yvonne aherutse guhabwa ishimwe nk'Umunyarwandakazi w'indashyikirwa mu batuye mu Budage
Kwamamaza
Kwamamaza

Izindi nkuru wasoma

Kwamamaza

TANGA IGITEKEREZO

AMATEGEKO AGENGA IYANDIKA RY'IGITEKEREZO CYAWE

1
Mico 2019-06-02 01:52:51

Muduhe amakuru ye neza ese ningaragu cyangwa yararwubatse?

2
tete 2019-06-01 01:19:43

frectation ivonne mukobwa wa kamanda na arphonsine courage disi wahuye nabyinshi komeza,urwane kandi uzatsinda utere icyirenge mucya papa wawe wari umugabo wumunyabigwi nishimiye kukubona kandi uzadusure kucyinamba

3
Kibwa 2019-05-31 13:33:53

Yumva azarongorwa na nde? Ndabona ari keza

4
Mukunzi 2019-05-31 03:11:56

Yvonne,nibyiza kuba warabashije kwigirira ikizere ntucike intege nibyo koko muriy’isi yacu harimo ibyiza ni bibi kdi siko twese twahora tunezerewe gusa, haribyishi umuntu anyuramo kugirango bikubere isomo ugashikama ugakomera none c IMANA nayo igusaba gutera intabwe imwe ibindi ikabyikorera , IMANA igufashe ikube hafi

Kwamamaza