IGIHE

Ntiyumvaga ko azajya muri Politiki: Ibyo wamenya ku rugendo rwa Yolande Makolo, Umuvugizi wa Guverinoma

0 10-01-2024 - saa 08:29, Jean de Dieu Tuyizere

Tariki ya 31 Nyakanga 2021, Ibiro bya Minisitiri w’Intebe byatangaje ko Inama y’Abaminisitiri yemeje ko Yolande Makolo aba Umuvugizi wa Guverinoma. Yari asanzwe akora mu biro by’Umukuru w’Igihugu.

Makolo yahawe izi nshingano nyuma y’imyaka 10 hashyizweho ibiro by’Umuvugizi wayo, bishingwa guhuza ibikorwa byose by’itumanaho bya guverinoma.

Yatangiye imirimo y’itumanaho mu nzego z’u Rwanda mu 2003, ubwo yari avuye kwiga muri Canada.

Aherutse kugirana ikiganiro kirambuye na Aya Chebbi, Umunya-Tunisia wabaye Ambasaderi w’urubyiruko mu Muryango wa Afurika yunze Ubumwe (AU) mu 2018, amusobanurira byinshi ku buzima bwe n’akazi akora muri Guverinoma y’u Rwanda.

Ni Podcast yitwa ‘I Am Nala’, igaruka ku bigwi by’abagore bo ku mugabane wa Afurika.

IGIHE yifuje kubagezaho ibibazo Chebbi yabajije Makolo ndetse n’ibyo yamusubije.

Mu magambo atatu, Yolande ni muntu ki?

Yolande ni umukozi wa Leta.

Irindi jambo rimwe?

Ndi umubyeyi.

Ndatangirira ku buzima bwawe hagati ya Canada n’u Rwanda. Wakuze ute? Wahinduranyije aho kuba ute?

Mu by’ukuri navukiye muri RDC, ndi Umunye-Congo ho igice. Papa yari Umunye-Congo, Mama yari Umunyarwandakazi ariko nakuriye muri Kenya nk’impunzi, nari kumwe na Mama. Papa yitabye Imana ubwo nari muto, twaje mu Rwanda ndi umwana, Mama yari umupfakazi, afite abana batanu. Nize amashuri abanza n’ayisumbuye i Nairobi, njya muri Canada ubwo nari ngiye muri kaminuza.

Ubwo wagiye i Nairobi ufite imyaka ingana iki?

Nagiye i Nairobi ubwo nari mfite imyaka ine.

Ese wiyumvamo ubunyafurika? Kubera ko wabaye ahantu hatandukanye.

Byuzuye. Kubera ko navukiye i Lubumbashi muri RDC, ubwo nari umwana navugaga Ikiluba, rumwe mu ndimi zaho, Igiswahili n’Igifaransa. Ubwo najyaga i Nairobi nize Icyongereza n’Igiswahili cyo muri Kenya. Ubwo nagarukaga mu Rwanda, Ikinyarwanda cyanjye cyariyongereye. Ndiyumva cyane nk’Umunyafurika, niyumvamo ubunyafurika bwinshi.

Ese muri urwo rugendo, cyane cyane uvuye muri kaminuza, watekerezaga ko wakorera guverinoma? Ubwo wari umukobwa muto wari ufite izihe nzozi?

Nabifashijwemo n’itangazamakuru. Nk’umwangavu muto, niyumvagamo kuba nahagararira abantu. Uko abantu bahagararira abandi, ubahagararira, ni nde uvuga ku bunararibonye, by’umwihariko mu itangazamakuru.

Ubwo nakuraga, CNN yari iri guhinduka ikintu kinini, twakurikiranaga amakuru amasaha 24, nkabona abantu mu makuru bahagarariye impamvu zitandukanye, bahagararira za guverinoma n’ibindi.

Ntibari abagore benshi ariko bake barabikoraga. Natekereje ko umuntu yaba umuvugizi w’umuryango cyangwa igihugu. Natekereje ko byari ibintu umuntu yakwifuza, numva ko najya muri urwo rwego.

Ubwo watangiye ukorera mu itangazamakuru?

Yego. Nize indimi muri kaminuza, ngaruka mu Rwanda gukorera guverinoma. Jenoside yakorewe Abatutsi yabaye mu Rwanda mu 1994 ubwo nari muri kaminuza, ntabwo nateganyaga kugaruka mu Rwanda bitewe n’ibyo nabonye byabaye hano.

Ntacyo nari mbaye ubwo nabaga muri Canada, nari nyuzwe, nari ntuje. Naje kumenya ko nubwo ntifuzaga kujya muri politiki, politiki yo yanyifuzaga aho nari ndi hose.

Kandi nta hantu ku Isi hatekana, abantu batabikoreye. Numvise ngomba kubijyamo, ngakora ibintu bisobanutse, bigirira akamaro abantu banjye, sinihishe ibibazo aka karere kari karimo, cyane cyane iki gihugu.

Kandi kubera ko ndi uwo mu bihugu bitatu muri aka karere. Nafashe icyemezo cyo kugaruka, ngakorera Guverinoma y’u Rwanda. Ku bw’amahirwe nabonye akazi muri guverinoma, mu itumanaho.

Ubu hashize imyaka 20, biri kwihuta cyane, umutwe wanjye ukomeza uzenguruka kuva nagera hano muri Mutarama 2003 kugeza ubu. U Rwanda rukomeje urugendo. Hari akazi kenshi, impinduka nyinshi ziraba byihuse, birashimishije, ni ugukora cyane ariko ni byiza kuri njyewe.

Njye n’umuryango wanjye turi ab’iki gihugu, turagikorera, bifite icyo bisobanuye. Ntekereza ko nafashe icyemezo gikwiye cyo kuza mu rugo, si mu Rwanda gusa, ahubwo muri Afurika kugira ngo ngire uruhare mu kugira ngo iki gihugu n’umugabane bibe byiza.

Mu 2014, Yolande Makolo yari Umwanditsi w’imbwirwaruhame za Perezida wa Repubulika

Ni ryari uheruka guhohoterwa kubera ko uri umugore? Kubera ko ni ibintu tunyuramo umunsi ku wundi.

Ndatekereza ko ari ikintu twakwita nk’urugomo ruto cyane, aho uhagarara ku murongo mu iguriro ry’imiti, ntabwo ngendana ikarita igaragaza ko ndi Umuvugizi wa Guverinoma, ukabwira umugabo uti “Hano hari umurongo.” Ntabyiteho. Muri Supermarket, mu muhanda utwaye buri munsi…, mu kazi ho ntabwo nabibonye cyane.

Igihe nari muto mu kazi, gusuzugurwa byarabaga ariko ubwo nakoraga cyane, nkerekana ko nshoboye, narabitsinze. No kudaceceka, iyo ubona ibintu bitagenda neza, uba ukwiye kubivuga.

Mpora ku mbuga nkoranyambaga cyane cyane Twitter, hari ubwo mbyirengagiza kubera ko ari imbuga nkoranyambaga. Hari ubwo umuntu ahohoterwa ariko agakora ibishoboka ngo bitamubabaza. Bibabaza abana banjye kundusha.

Nkubona mu itangazamakuru, ni ibintu ukora buri munsi, uvugana n’itangazamakuru, utanga ubutumwa. Hari ubwo mbona unandika inkuru ku mbuga zitandukanye. By’umwihariko ku bagore bakiri bato bifuza gukora umwuga wawe, ni iki wababwira kuri gahunda yawe y’umunsi?

Mu mwaka ushize, guverinoma yafashe icyemezo cyo guhindura gahunda y’akazi, kakajya gatangira saa tatu. Twatangiraga saa moya, bigera saa tatu.

Imwe mu mpamvu yari uguteza imbere ubuzima bw’umuryango. Mbere yo gutangira akazi, njyana abana ku ishuri. Ibyo biranshimisha. Njye na bo dufatira hamwe ifunguro rya mu gitondo, ubundi nkabajyana mbere yo kuza ku kazi. Ni byiza.

Igikurikiraho, mfite bagenzi banjye hano mu biro by’itumanaho bya guverinoma, duhuza ibikorwa by’itumanaho bya guverinoma, haba amahugurwa menshi, inama zo gutegura ibikorwa hamwe n’izindi nzego za guverinoma, inama nyinshi zifashisha ikoranabuhanga, yewe no kuvugana n’itangazamakuru, ngerageza gusoma byinshi mu gitondo, ibibera ku Isi, ibibera mu Rwanda, kumva radiyo, amakuru ya mu gitondo kugira ngo nshobore kumenya ibiri kuba mbere y’uko umunsi wira.

Ni inama, gutegura inyandiko, guhamagara, kwakira abahamagara, bagenzi bacu bakorera mu nzego za guverinoma, ngataha mbere y’uko umuhungu wanjye muto ajya kuryama kugira ngo mubaze uko amasomo yagenze, mufashe umukoro wo mu rugo, nkagerageza kubikora byombi, weekend yagera ngasura inshuti, nkaba ndi kumwe n’umuryango.

Ku rubyiruko rukiri ruto rukurikira iki kiganiro, warushishikariza gushora mu zihe nzego mu Rwanda?

Ubu turi gushishikariza abantu kujya mu rwego rw’ubucukuzi bw’amabuye y’agaciro kubera ko hari amabuye y’agaciro menshi ariko rusaba igishoro cyinshi, kubaka ibigo bisaba igihe kinini.

Turi kuvugurura uru rwego twifashishije politiki nshya irebana no kurinda umutekano w’abarukoramo no kubungabunga ibidukikije kugira ngo bitangirika.

Ndatekereza ko ari urwego rwiza rwo kujyamo kubera ko amabuye y’agaciro arakenerwa mu gutunganya ingufu nka Lithium, Tantalum, Cassiterite, ariko igisabwa ni ukubaka uruganda ruzayatunganyiriza hano kuko turohereza amabuye arimo ibyagateje imbere igihugu cyacu. Ariko ubucukuzi bw’amabuye y’agaciro busaba amafaranga menshi.

Ubukerarugendo na bwo buri gutera imbere cyane nyuma ya Covid-19, bugaha akazi benshi, inama zirabera muri Kigali Convention Centre. Ubwubatsi ni urwego runini, rwiza rwo gushoramo…

Abakiri bato bari mu biro byanyu ni bangahe?

Ntekereza ko ari bo benshi. Uramubaza uti “Ufite imyaka ingahe?”, “Mfite imyaka 22.” Ntekereza ko abarenga 1/2, nk’urugero abashinzwe amajwi n’amashusho, keretse umuntu umwe, bose bari munsi y’imyaka 30.

Navuga ko abarenga ½ bari munsi y’imyaka 30. Ntekereza ko ndi kongera impuzandengo y’imyaka hano, igihe cyanjye kirageze ngo ngende [atebya, anaseka].

Ndashaka kukubaza ku kwandika imbwirwaruhame kwawe. Ndashaka kumenya zimwe mu mbwirwaruhame wanditse.

Imbwirwaruhame zose zandikwa n’itsinda. Ntabwo mfite imwe yihariye ariko ndatekereza ko nagize ibihe byiza ubwo nari umwanditsi w’imbwirwaruhame wa Perezida Kagame kubera ko Perezida afite uruhande rusobanutse ruhoraho kuva mbere ya 1994, muri za 90.

Urebye imbwirwaruhame ze mu rugamba rwo kubohora igihugu, ni zimwe, hari amahame shingiro iki gihugu kigenderaho.

Narabyishimiye kubera ko Perezida yasobanuraga neza ibyo ashaka kuvuga, afite amahame shingiro y’icyerekezo abonamo u Rwanda, mu iterambere no mu bumwe. Ni uburararibonye bwari bwiza.

Buri mbwirwaruhame yari ibyishimo mu by’ukuri. Byari ibyishimo gukorana n’umuyobozi uzi icyo ashaka muri buri mbwirwaruhame. Byoroheje akazi.

Umwe mu mirongo y’imbwirwaruhame uri kuri ‘Bio ya Twitter’. Ni imbwirwaruhame y’igihe yasozaga umwiherero. Yavuze ikintu cyankozeho cyane, avuga ngo “Icyo twakoze si icy’abafite umutima ucagase, nkanswe abatagira umutima.”

Ni ibiki wagezeho bigutera ishema kurusha ibindi muri iyi myaka 20?

Ni ibihe byinshi byanteye ishema kuva naba umwe mu bagize iri tsinda mu by’ukuri. Ibintu byinshi twakoreye hamwe. Ntekereza ko igikorwa kinini twateguye cyari gikomeye, buri wese areba ikiri kuba hano, twakiriye inama y’abakuru b’ibihugu na za Guverinoma ya Commonwealth.

Yari yarasubitswe kubera Covid. Twabashije kuyisoza nta kibi kibaye, abashyitsi barishimye. Ni ibihe byanteye ishema. Abakiri bato benshi babigizemo uruhare, by’umwihariko abagore, kubona ibintu nkibi bigenda neza, bitera kunyurwa cyane. Kandi natewe ishema no kuba umwe muri iri tsinda.

Kwamamaza
Kwamamaza

Izindi nkuru wasoma

Kwamamaza

TANGA IGITEKEREZO

AMATEGEKO AGENGA IYANDIKA RY'IGITEKEREZO CYAWE
Kwamamaza