IGIHE

Ibiteye amatsiko kuri Kayishema, umwanditsi w’ikinamico watoje Madamu Jeannette Kagame

6 18-03-2019 - saa 08:52, Muvunyi Arsène

Madamu Jeannette Kagame aherutse gushimira umusaza witwa Kayishema Jean Marie Vianney wamutoje ibijyanye no gukina amakinamico hambere. Yabivugiye mu muhango wo guhemba abahanzi bahize abandi mu irushanwa rya ArtRwanda-Ubuhanzi mu mpera za 2018.

Ntabwo abantu benshi bari bazi ko Madamu Jeannette Kagame yigeze kujya mu by’ubuhanzi ndetse icyo gihe ntiyavuze icyiciro cy’ubuhanzi yabarizwagamo.

Byaduteye amatsiko maze IGIHE iganiriza uyu musaza atubwira byinshi ku nganzo ye n’uko yatoje Madamu Jeannette Kagame.

Kayishema Jean Marie Vianney ni umusaza w’imyaka 72. Yaminuje mu bijyanye n’indimi ari nabyo yigishaga muri Kaminuza y’u Rwanda ishami ry’Uburezi mbere y’uko atangira ikiruhuko cy’izabukuru.

Ari mu ntiti z’Inteko Nyarwanda y’Ururimi n’Umuco akaba n’Umwungiriza w’Intebe y’Inteko. Ni umwanditsi w’ikinamico n’ubwo amaze igihe kinini asa n’uwabihagaritse.

Yanditse ikinamico zakinwe ahantu hatandukanye nk’i Burundi, Repubulika Iharanira Demokarasi ya Congo no muri Canada zaciye kuri radiyo zitandukanye zo mu bihugu bikoresha Ururimi rw’Igifaransa.

Ku bw’amateka mabi yaranze u Rwanda, Kayishema yabaye mu buhingiro i Burundi ari naho yatangiriye ibyo kwandika ikinamico.

Mu 1972 nibwo yatangiye kwandika ikinamico ubwo yari umwarimu mu ishuri ryisumbuye i Bujumbura. Yavuze ko igitekerezo cyo guhimba ikinamico cyamujemo nyuma yo kubona ko bagenzi be bize bameze ‘nk’abandagaye’ kuko iyo bavaga mu kazi nta kindi bakoraga kitari ukunywa inzoga.

Ati “Twarahuraga tukaganira, tukanywa inzoga tugataha; bigeze aho nsanga ubwo buzima hari ikintu kibuze mu by’ukuri ku bantu bize. Noneho ndatekereza nti ‘ko nize ibintu byo kwandika, uwakwandika’."

Yahisemo kwandika ikinamico kuko ari yo yabonaga ishobora gukurura abantu kurusha ibitabo.

Yibanze cyane ku mateka mu rwego rwo gufasha abanyarwanda bari mu buhungiro kutibagirwa igihugu cyabo.

Irushanwa ryateguwe na Radiyo Mpuzamahanga y’Abafaransa, ni ryo ryamuteye imbaraga ahita atangira kwandika. Ikinamico ya mbere yanditse yitwa ‘Pitié pour la reine’.

Iyi yakurikiwe n’iyitwa Vengeance du Roi (Ukwihorera k’umwami) yagaragazaga uko Umwani Rwabugiri yihoreye nyuma yo kumenya ko umubyeyi we bamushyeye akicwa.

Ikinamico ya nyuma yanditse mu zamenyekanye ni iyitwa Ruganzu nayo yavugaga ku mateka y’umwami Ruganzu wari warameneshejwe mu gihugu cye.

Ikinamico ze zafashije urugamba rwo kubohora u Rwanda

Kayishema yavuze ko ikinamico ze zari zikunzwe mu Mujyi wa Bujumbura n’ibindi bice bitandukanye by’iki gihugu. N’ubwo zatsinze amarushanwa menshi ntiyigeza abona ibihembo birimo amafaranga kuko yari impunzi.

Make yabonaga ni ayabaga yavuye mu bitaramo we n’abandi babaga bakoze hirya no hino, kandi nayo bakuragaho ayo bohorerezaga ingabo zari ku rugamba rwo kubohora u Rwanda.

Ati “Abantu bazaga kureba bakaduha amafaranga uretse ko atari menshi. Twarakinaga, amafaranga avuyemo abantu baduhaye akaba ari yo twohereza.”

Uko yatoje Madamu Jeannette Kagame

Ubwo yandikaga ikinamico ye ya mbere yise ‘Pitié pour la reine’, yatoranyije abagomba kuyikinamo hazamo na Madamu Jeannette Kagame wari ukiri umwangavu.

Icyo gihe ni nawe wakinnye nk’umukinnyi w’imena ari Umugabekazi. Kayishema yavuze ko yari akwije ibisabwa byose kugira ngo akine muri uyu mwanya.

Ati “Umugabekazi ntashobora kuba umuntu uwo ari we wese. Agomba kuba umuntu ugaragara, uko asa, uko areshya, uko ameze muri make. Icyo gihe rero nabonaga ari we ushobora kuba yakina uwo mwanya.”

Uyu musaza yavuze ko Madamu Jeannette Kagame yari umukobwa ufite ikinyabupfura kandi ukora ibintu byose ku murongo.

Ati “Nta na rimwe nigeze mbona asiba isubiramo. Ikindi ugasanga afite koko imico nk’iy’umuntu namushakagaho.”

Yibuka neza uko yamusabye gukina mu ikinamico akabyemera nyamara ubusanzwe yari umutoza.

Ati “Nigeze kwigisha abantu uko bakina, uko bajya kubika umwami, noneho birabananira. Arandeba arambwira ati ‘ariko se ko ubikina neza kandi bikaba ari bigufi bitakubuza indi mirimo wabikinnye’? Ntabwo nari nabitekereje ariko numvise ambwije ukuri ndemera ndabikina.”

“Ni umuntu wari ufite akantu ko gushaka ko ibintu bigenda neza, ikintu cy’ubuyobozi. Naramwumviye rwose ndemera ndakina. Sinzi niba iyo bivugwa n’undi nari kwemera kubikina.”

Baje gutandukanira mu buhingiro n’aho bagarukiye mu Rwanda ntibakunze kubonana, gusa avuga ko ku nshuro ya mbere amushimira mu ruhame byamweretse ko ari imfura.

Kayishema ntiyigeze agira igitekerezo cyo kumushaka ngo bongere baganire kuko yumvaga nta mpamvu ikomeye yabyo, gusa arateganya kubisaba ubwo azaba yongeye gusubukura ibyo kwandika ikinamico, akaba yatanga umusanzu muri gahunda ya ArtRwanda-Ubuhanzi.

Kayishema Jean Marie Vianney ubu ari mu kiruhuko cy'izabukuru

Yirukanywe mu Burundi azira kwandika ikinamico

N’ubwo yandikaga ikinamico zivuga ku muco nyarwanda, abayobozi b’u Burundi ntibabyishimiraga, ku buryo umwe muri bo yirinze gutangaza amazina ye wamudindije muri kaminuza ari cyo amuziza.

Ati “ Njya muri kaminuza hari umuntu ntavuze wari umuyobozi arandindiza pe! Anziza ayo makinamico, avuga ngo twebwe tuza kubereka imico yacu, ngo abanyarwanda bitwara nk’abari mu gihugu batsinze.”

Ikinamico yise Ruganzu yanditse mu 1974 niyo yabaye rurangiza kuko yarakaje cyane Leta ya Habyarimana, bituma isaba u Burundi ko bwamwirukana akava ku butaka bwabwo.

Ati “Iyitwaga Ruganzu niyo yabariye cyane. Bavuga ngo kiriya gitekerezo cya Ruganzu kirababangamiye, kubera iyo mpamvu basaba u Burundi ngo ni bunyirukane.”

Iyi kinamico yateje umwuka mubi avuga ko yayanditse ashaka kugaragaza ko ‘Ruganzi ari we shingiro ry’amateka ya cyami mu Rwanda’.

Mu 1989 nibwo yirukanywe mu Burundi, abona ubuhungiro muri Canada mu 1992. Kuva ubwo ntiyongeye kwandika ikinamico.

Ubuhanzi bushingiye ku kwandika buri inyuma mu Rwanda

Kayishema yavuze ko mu Rwanda hari abana bafite impano mu gikina ikinamico, gusa ngo ikibazo kiri mu bahanzi bazo babikora mu buryo budateye imbere.

Ati “Guhanga bishingiye mu kwandika, ari sinema, ari ikinamico usanga bidateye imbere rwose. Hari abana bazi gukina, wamufasha ukamuha ibyo akina, icyo nenga ni ibijyanye no kwandika.”

Yemeza ko impamvu y’ibi ari uko indimi zitacyigishwa neza ku buryo ubuhanzi bw’ikinamico bushobora kuzimira mu gihe iki kibazo kidakosowe.

Ati “Aho bipfira ni uko nta ndimi zikigwa neza. Indimi izo ari zo zose zarapfuye ntabwo imyigishirize yazo iboneye ku buryo nibidasubirwamo ngo baboneze neza imyigishirize y’indimi, ubuhanzi bwandika ntabwo buzaboneka vuba.”

Madamu Jeannette Kagame yashimiye Kayishema wamutoje ikinamico ubwo yasozaga icyiciro cya mbere cy'irushanwa rya ArtRwanda-Ubuhanzi
Kayishema Jean Marie Vianney ubwo yerekanaga ikinamico ye yise Ruganzu
Muri iyi kinamico, Umwanditsi yagaragazaga umuco nyarwanda n'ubwo bari mu buhungiro
Kayishema yifashishije n'abakuze bakina mu yitwa Ruganzu
Ikinamico yitwa Ruganzu ni yo yirukanishije Kayishema i Burundi
Kwamamaza
Kwamamaza

Izindi nkuru wasoma

Kwamamaza

TANGA IGITEKEREZO

AMATEGEKO AGENGA IYANDIKA RY'IGITEKEREZO CYAWE

1
Kagabo 2019-03-18 10:02:49

iyo kinamico Ruganzu twayikura he.................kimwe nizindi mwaba mwaranditse

2
Mico 2019-03-18 10:01:34

Professor Kayishema J.M.V ni umusaza benshi batazi ariko uyu musaza ni inyangamugayo rwose, yanyigishije imyaka 4 muri kaminuza y’ U Rwanda, imyaka myinshi yayimaze mu Burundi mu buhungiro ariko nyuma yaje kujya muri Canada gukomeza amasomo ye muri Université Laval yarangije ari mu bantu bake bagaragaje ubuhanga mu gihe bari mu masomo.

3
BAKUSI Alphonse 2019-03-18 08:06:01

Izo theatre zombi (Pitie pour la Reine na Vengeance du Roi) nyuma ya Kayishema zongeye gukinwa mu mashuri yisumbuye i Burundi. Urugero ni 1984 na 1985 aho nari mu bazikinnye zombi muri Lycee de Rutovu i Bururi zitozwa na Malimu Munyaburanga Basengo. Zarimo akanyarigabo gakumbuza abantu u Rwanda. Nanjye bimwe bireba u Rwanda n’urungano twakinanaga icyo gihe niho twabimenyeye dutangira no kubikunda.
Bravissime Prof Kayishema!!

4
Kanyange 2019-03-18 07:00:59

Muraho, mushobora kumutubariza aho twabona video y’iyo kinamico yitwa Ruganzu ?

5
venuste Nkurayija 2019-03-18 06:56:59

j’ai eu la chance d’être son élève au Burundi
J’avais alors 16 ans
c’est un grand homme
c’est une de mes meilleurs années....
et c’est en partie grâce àlui !!!!

6
G 2019-03-18 04:49:42

Yaya yaya, baraguhohoteye kweri? Kuzira ikinamico? Ariko ntacyo, nubwo wasize inshuti zawe, abavandimwe mwabanaga i BURUNDI, kujya CANADA nabyo hari icyo byakwigishije, ariko ikingenzi, ubu uri mu gihugu cyawe; Imana shimwe. Mu mbaraga zawe ugifite, wakwongera ugakora mu nganzo maze ugatoza urubyiruko, burya n’ubwo batazi ikinyarwanda, ariko ikinamico ntiryabananira. Nizo mwakinnye uwazisubiramo ntizabura kwigisha no gukundwa.

Kwamamaza